ވަޒީފާދޭ ފަރާތްތަކުން ޖިންސީ ފުރައްސާރަ ކުރުމުގެ ޤާނޫނުތަކާއި ޚިލާފުވާނަމަ ޒިންމާދާރުކުރުވުމުގެ ޤަރާރެއް އދ.ގެ އާންމު މަޖިލީހުން ހޯމަ ދުވަހު ބަލައިގަނެފިއެވެ.
މި ޤަރާރުގެ ދަށުން އަންހެނުންނަށް ކުރާ އެކިއެކި އަނިޔާތައް ހުއްޓުވޭނެ ނިޒާމެއް ޤާއިމުކުރުމަށް އދ ގެ މެމްބަރެއްގެ ގޮތުގައި ހިމެނޭ ދައުލަތްތަކަށް އިލްތިމާސްކޮށްފައި ވެއެވެ. އެގޮތުން އެމީހަކު ނިސްބަތްވާ ޤައުމަކަށް ނުވަތަ އުމުރަކަށް ނުބަލައި މި ހައްޤުތައް ކަށަވަރުކޮށްދިނުމަށް މި ޤަރާރުގައި ބާރުއަޅާފައިވެއެވެ.
އދ ގެ އާންމު ޖަލްސާގެ މި އަހަރުގެ 3 ވަނަ ކޮމިޓީން ބަލައިގަނެފައިވާ މި ޤަރާރުގައި އިތުރަށް ބަޔާން ކޮށްފައިވަނީ، އަންހެނުންނާއި މެދު އެކި ގޮތްގޮތުން ކުރެވޭ ތަފާތުތަކާއި، މުޖުތަމައުގައި ކުރިމަތިވާ އެކިއެކި ގޮންޖެހުންތައް ނައްތާލައި އަންހެނުން ބާރުވެރި ކުރުވުމުގެ މަޝްރޫއުތަކެއް ހިންގަން ޖެހޭކަމަށެވެ.
އަންހެނުންނަށް ޖިންސީ ފުރައްސާރަ ކުރުމާއި އެކިކަހަލަ އަނިޔާތައް ކުރިމަތި ކުރުވުން އާންމުވެފައިވާ ދުވަސްވަރެއްގައި އދ ފަދަ ބައިނަލްއަޤުވާމީ ޖަމިއްޔާއަކުން މިފަދަ މުހިންމު ޤަރާރެއް ބަލައިގަނެފައިވުމަކީ އދ ގެ މެމްބަރެއްގެ ގޮތުގައި ހިމެނޭ ދައުލަތްތައް ޒިންމާދާރު ކުރުވޭނެ މަގެއް ކަމަށް ގިނަ ބަޔަކު ދެކެއެވެ.
