އިދިކޮޅު ޒިންމާދާރު ޕާޓީ އެއް އޮންނަން ޖެހޭ
އިލެކްޝަން ކޮމިޝަންގެ ރައީސް ޝަރީފް
ޤާނޫނުތަކާއި ޤަވާއިދުތަކާ އެއްގޮތައް ބިނާ ކުރާ ލީޑަރޝިޕެއްގެ ދަށުން އުފެދިފައި އޮންނަ ޒިންމާދާރު އިދިކޮޅު ޕާޓީއެއް އޮތުން މުހިއްމު ކަމަށް އިލެކްޝަންސް ކޮމިޝަންގެ ރައީސް އަހްމަދު ޝަރީފް ވިދާޅުވެއްޖެއެވެ.
ޕީޕީއެމްގެ ބައެއް މީހުންގެ ފާޑު ކިއުން އަމާޒުވެފައިވާ ޝަރީފް ކުރެއްވި ޓްވީޓެއްގައި ވިދާޅުވީ ސަރުކާރަށް ފާރަވެރިވާނެ ޒިންމާދާރު އިދިކޮޅު ޕާޓީއެއް އޮތުން މުހިއްމު ކަމަށެވެ.
ޝަރީފް ވިދާޅުވީ އެކަން ކުރެވޭނީ ޤާނޫންތަކާއި ޤަވާއިދުތަކާއި އެކަމަށް ހެދިފައިވާ އުސޫލުތަކާ އެއްގޮތަށް ބިނާކުރާ ލީޑަރޝިޕްއެއްގެ ދަށުން ކަމަށެވެ.
ޝަރީފް މިހެން ވިދާޅުވިއިރު ނިމިދިޔަ ރިޔާސީ އިންތިޚާބުން ބޮޑު ތަނުން ބަލިވި ޕީޕީއެމްގެ ލީޑަރޝިޕާމެދު ވަނީ ސުވާލު އުފެދިފައެވެ. އިންތިޚާބުން ބަލިވި ފަހުން ޕީޕީއެމުން ބޭއްވި ކޮންގްރެސްގައި އޭރުގެ ރައީސް ޢަބްދުﷲ ޔާމީންއަށް ވަނީ އެ ޕާޓީގެ ރައީސްކަން ދީފައެވެ. ނަމަވެސް އިލެކްޝަންސް ކޮމިޝަނުން ވަނީ އުސޫލުތަކުގެ ބޭރުން ބާއްވާފައިވާ ކޮންގްރެސްއެއް ކަމަށް ނިންމައި އެކޮންގްރެސް ބަލައި ނުގަތުމަށް ނިންމާފައެވެ. އަދި އެ މައްސަލަ މިހާރު ވަނީ ކޯޓު މަރުހަލާގައެވެ.
އިންތިޚާބުން ބަލިވި ޕީޕީއެމްގެ ލީޑަރޝިޕްއާމެދު ސުވާލު އުފެދިފައިވާއިރު މިވަގުތު އިދިކޮޅު ޕާޓީއެއްގެ ގޮތުގައި އޮތީ ޕީޕީއެމްއެވެ.
