ކައިވެންޏަށް ފަހު ދިޕިކާ އާއި ރަންވީރު އެންބުރި މުމްބާއީ އަށް!
ދިޕިކާ އާއި ރަންވީރު ކައިވެނި ކޮށްފައިވަނީ މިހިނގާ ނޮވެމްބަރު މަހުގެ 14 އަދި 15 ގައި
ރަންވީރު ސިންގް އާއި ދިޕިކާ ދަޕުކޯން
ބޮލީވުޑްގެ ދެ ތަރި ދިޕިކާ ޕަދުކޯން އާއި ރަންވީރު ސިންގް އިޓަލީގެ ލޭކް ކޯމޯގައި ކައިވެނި ކުރުމަށްފަހު އެނބުރި އިންޑިއާއަށް ގޮސްފިއެވެ.
މިދިޔަ ހޯމަ ދުވަހު މި ދެމަފިރިން މުމްބައި އެއަރޕޯޓަށް ލޭންޑް ކުރިއިރު އެ ސަރަހައްދުވަނީ މީޑިއާގެ މީހުންނާއި ފޭނުން ފުރާލާފައެވެ.
މި ދެ މަރިންނަށް ހިމާޔަތް ދިނުމަށްޓަކައި ގިނަ އަދަދެއްގެ ސެކިއުރިޓީ ތިބި ނަމަވެސް މި ދެމަފިރިން ފެނުމާއި އެކު ފޭނުންނާއި މީޑިއާގެ މީހުން ވަނީ ސެކިއުރިޓީންނަށް ނުހިފޭއްޓިފައެވެ.
ފޮޓޯތަކާއި ވީޑިއޯތަކުން ފެންނަ ގޮތުގައި ރަންވީރު ވަނީ އޭނާގެ އަންހެނުން ހިމާޔަތް ކުރުމަށް މަސައްކަތް ކޮށްފައެވެ. އޭނާ ވަނީ ދީޕިކާގެ ވަށައިގެން އޭނާގެ ދެއަތުން ހިފަހައްޓާފައެވެ.
ހަ އަހަރެއްހާ ދުވަސް ވަންދެން ރައްޓެހިވެގެން އުޅުމަށްފަހު ދިޕިކާ އާއި ރަންވީރު ކައިވެނި ކޮށްފައިވަނީ މިހިނގާ ނޮވެމްބަރު މަހުގެ 14 އަދި 15 ގައެވެ. ރިޕޯޓްތައް ބުނާ ގޮތުން އެ ދެ މީހުން ކައިވެނި ކޮށްފައިވަނީ "ކޮންކަނި" އަދި "ސިންދީ" ސަގާފަތާއި އެއްގޮތަށެވެ.
މި ދެމީހުންގެ ކައިވެނީގެ ހެދުންތައް ޑިޒައިން ކޮށްފައި ވަނީ ސަބްޔާސަޗީ މުކަރްޖީ އެވެ.
ދިޕިކާ އާއި ރަންވީރުގެ ކައިވެނީގެ ހަފްލާ ތިން ތަނެއްގައި ބޭއްވުމަށް ވަނީ ހަމަޖައްސާފައެވެ.
އެގޮތުން ފުރަތަމަ ހަފްލާ ބޭއްވުމަށް ހަމަޖެހިފައިވަނީ ދިޕިކާގެ އުފަން ރަށް ކަމަށްވާ ބެންގަލޫރުގައެވެ. އެއަށްފަހު މިމަހުގެ 28 ގައި މުމްބާއީގައި ޕްރެސްއަށް ހަފްލާއެއް ދިނުމަށްފަހު ފިލްމް އިންޑަސްޓްރީގައި ގައި މަސައްކަތް ކުރާ ފަރާތަކަށް ޑިސެމްބަރު 1 ގައި މުމްބާއީގައި ހަފްލާއެއް ބޭއްވުމަށް ވަނީ ހަމަޖެހިފައެވެ.
