މެކްސިކޯގެ ނުރައްކާތެރި ކުށްވެރިޔާ އެލް ޗަޕޯގެ ކާޓެލް ގޭންގްގެ ކުރީގެ މެމްބަރެއް ކަމަށްވާ ހެކްތާ ބެލްތްރަން ލެއިވާ މަރުވެފައިވަނީ ފުލުހުން ހައްޔަރުގައި ހުއްޓާ އާދިއްތަ ދުވަހުއެވެ.
އުމުރުން 56 އަހަރުގެ ހެކްތާ މަރުވެފައިވަނީ މެކްސިކޯގެ އަލްޓިޕްލާނޯގައި ހުންނަ ސަލާމަތީ ކަންތައްތައް ވަރުގަދަ ކޮށްފައިވާ ޖަލުގައި ހުއްޓާ ހާޓްއެޓޭކެއް ޖެހިގެން ހޮސްޕިޓަލުގައި ފަރުވާދެމުން ދަނިކޮށް ކަމަށް ރޮއިޓާސްއިން ރިޕޯޓު ކުރޭއެވެ.
''އެޗް'' ވަނަމެއްގެ ގޮތުގައި ދީފައިވާ ހެކްތާގެ މަރަކީ ގުދުރަތީ މަރެއް ކަމަށާއި އޭނާގެ މަރުގެ ފަހަތުގައި ސިފައިންގެއަތެއް ނުވާކަމަށް ސިފައިންނާ ހަވާލާދީ ބައެއް ރިޕޯޓްތައް ބުނޭއެވެ.
ހެކްތާ މަރުވެފައިވަނީ އޭނާގެ މައްޗަށް ކޮށްފައިވާ ހުކުމް ތަންފީޒު ކުރަމުން ދަނިކޮށެވެ. މެކްސިކޯގެ ސިފައިން '' އެޗް " ހައްޔަރު ކޮށްފައިވަނީ 2014 ވަނަ އަހަރު އޮކްޓޫބަރު މަހުގެ އެއްވަނަ ދުވަހު ސިފައިން ހިންގި ހާއްސަ އޮޕަރޭޝަނެއް ގައި މެކްސިކޯގެ ސީފުޑް ވިއްކާ ރެސްޓޯރެންޓެއްގެ ތެރެއިންނެވެ.
އޭނާގެ މައްޗަށް ދައުވާ ކޮށްފައި ވަނީ މަސްތުވާ ތަކެތިގެ ބާވަތްތައް ކަމަށްވާ މަރިޔުއާނަ، ހެރޯއިންގެ އިތުރުން މެތަމްފެޓަމައިން ޓްރެފިކް ކުރުމުގެ ކުށުގައިއެވެ. އޭނާގެ ވާދަވެރިޔާ އެލްޗަޕޯ އަށްވެސް އެމެރިކާއިން ދައުވާ ކޮށްފައި ވަނީ ހަމަ މިބާވަތުގެ މަސްތުވާތަކެތި އެމެރިކާއަށް އެތެރެ ކުރި މައްސަލާގައި އެވެ.
އެލް ޗަޕޯގެ ގޭންގުގައި ކުރިން ހަރަކާތްތެރިވި އެޗްގެ އިތުރުން އޭނާގެ ދެ ބޭބެ މެން އެލްޗަޕޯގެ ގޭންގުން ވަކިވެފައި ވަނީ ޑްރަގް ރޫޓް ކޮންޓްރޯލް ކުރުމާއި ބެހޭ ގޮތުން އުފެދުނު ހަމަނުޖެހުންތަކެއްގެ ތެރޭގައި ކަމަށް ބައެއް ފަރާތަކުން ރިޕޯޓް ކޮށްފައިވެއެވެ. ބައެއް މަސްދަރުތައް ބުނާ ގޮތުގައި ގޭންގުތެރޭގައި މައްސަލަ ޖެހިފައިވާނި ފުލުހުން އެޗްގެ ބޭބެ ހައްޔަރުކުރުމުގެ ފަހަތުގައި އެލް ޗަޕޯގެ އަތެއްވާކަމަށް ތުހުމަތުކޮށެވެ.
ކާޓެލް ގޭންގްއިން ވަކިވެ ހެކްތާ އާއި އޭނާގެ ބޭބޭމެން ވަނީ ބެލްތްރާގެ ނަމުގައި ގޭންގެއް އުފައްދައި އެލްޗަޕޯ އަށް ގޮންޖަހާ ޑްރަގް ބޭރުކުރާނެ ރޫޓްތައް ހަދާ ގޭންގުގެ މަސައްކަތް ފުޅާދާއިރާ އެއްގައި ކޮށްފައި އެވެ.
