އަދީބު އޮޕަރޭޝަނަށް ވައްދައިފި
19 ނޮވެމްބަރު 2018 | ހޯމަ 04:29އޮޕަރޭޝަނަށް ވައްދާފައި ވަނީ މިއަދު 8:30 ޖެހިއިރު
އަދީބު އޮޕަރޭޝަނަށް ވައްދަނީ
ކުރީގެ ނާއިބު ރައީސް އަހުމަދު އަދީބު އޮޕަރޭޝަނެއް ކުރުމަށް ވައްދާފައިވާ ކަމަށް އަނބިކަނބަލުން މަރިޔަމް ނަޝްވާ ވިދާޅުވެއްޖެއެވެ.
ނަޝްވާ ވިދާޅުވީ އަދީބުގެ ކިޑްނީގައި އުފެދިފައިވާ ހިލަ ނައްތާލުމަށް ކުރާ އޮޕަރޭޝަނަށް ވައްދާފައި ވަނީ މިއަދު 8:30 ޖެހިއިރު ކަމަށެވެ.
އަދީބު ޖަލަށްލި ފަހުން ސިއްހީ ބޮޑެތި މައްސަލަތަކެއް ވަނީ ކުރިމަތިވެފައެވެ. އަދީބުގެ އެތެރެހަށީގައި އުފެދިފައިވާ ސިސްޓްތައް އިތުރުވެފައިވާ ކަމަށް ޑޮކްޓަރ ވިދާޅުވެފައިވާ ކަމަށް ނަޝްވާ މީގެ ކުރިން ވަނީ ވިދާޅުވެފައެވެ.
އެމްއެމްޕީއާރުސީގެ ކޮރަޕްޝަނާއި ރިޔާސީ ލޯންޗުކޮޅުގައި އެއްޗެއް ގޮއްވާލި ކަމަށް ބުނެ، އަދީބުގެ މައްޗަށް ދައުލަތުން ކުރި ތިން ދައުވާއެއް ސާބިތުވާ ކަމަށް ނިންމުމާ ގުޅިގެން އަދީބު ގެންދަވަނީ 33 އަހަރަށް ވުރެ ގިނަ ދުވަހުގެ ޖަލު ހުކުމެއް ތަންފީޒު ކުރައްވަމުންނެވެ. މީގެ އިތުރުން ވެސް އެމްއެމްޕީއާރުސީގެ ހިޔާނާތުގެ ގިނަ މައްސަލަތަކެއްގައި އަދީބުގެ މައްޗަށް ދައުވާކޮށް، ޝަރީއަތްތައް ވެސް ދަނީ ހިންގަމުންނެވެ.
