ރައީސް ނަޝީދުގެ މައްސަލަ މާދަމާ ސުޕްރީމް ކޯޓުގައި
އަޑުއެހުން ތާވަލްކޮށްފައި ވަނީ މާދަމާ ހެނދުނު 10އަށް
ރައީސް މުހައްމަދު ނަޝީދު، ވެލާނާ އިންޓަނޭޝަނަލް އެއާޕޯޓުން ވަޑައިގަންނަވަނީ
ކުރީގެ ރައީސް މުހައްމަދު ނަޝީދުގެ މައްޗަށް އިއްވާފައިވާ 13 އަހަރު ދުވަހުގެ ޖަލު ހުކުމުގެ މައްސަލަ މާދަމާ ސުޕްރީމް ކޯޓުގައި ތާވަލްކޮށްފިއެވެ.
ޕްރޮސިކިއުޓަރ ޖެނަރަލްގެ ފަރާތުން ސުޕްރީމް ކޯޓަށް ރިވިއުއަށް ހުށަހަޅުއްވާފައިވާ އެ މައްސަލައިގެ އަޑުއެހުން ތާވަލްކޮށްފައި ވަނީ ހޯމަ ދުވަހުގެ ހެނދުނު 10:00 އަށެވެ. މައްސަލަ ސުޕްރީމް ކޯޓުގައި ތާވަލްކޮށްފައިވާއިރު ނަޝީދުގެ މައްޗަށް ކްރިމިނަލް ކޯޓުން އިއްވާފައިވާ 13 އަހަރުގެ ޖަލު ހުކުމުގެ މައްސަލަ އަލުން ބަލައި ނިމެންދެން، ހުކުމް ތަންފީޒު ކުރުން ފަސްކުރަން ސުޕްރީމް ކޯޓުން ވަނީ އަމުރުކޮށްފައެވެ.
ނަޝީދުގެ މައްޗަށް 13 އަހަރުގެ ހުކުމެއް އިއްވާފައި ވަނީ ކްރިމިނަލް ކޯޓުގެ އިސް ގާޒީ އަބްދުﷲ މުހައްމަދު ގާނޫނާ ޚިލާފަށް ބަންދު ކުރި ކަމަށް ބުނެ އުފުލާފައިވާ ދައުވާއެއް ސާބިތުވާ ކަމަށް ނިންމާފައެވެ. އެ ހުކުމް ރިވިއު ކުރުމަށް ދައުލަތުގެ ފަރާތުން ހުށަހެޅުމުން ސުޕްރީމް ކޯޓުން ބަލައިގެންފައިވާއިރު، ކުރިން ސުޕްރީމް ކޯޓުން ވަނީ އެ ހުކުމަށް ތާޢީދުކޮށްފައެވެ.
އެ މައްސަލާގެ ޝަރީއަތް ހޯމަ ދުވަހުގެ ހެނދުނު ފަށަން ހަމަޖައްސާފައި ވާއިރު، އެ މައްސަލަ ބައްލަވަނީ އުއްތަމަ ފަނޑިޔާރު ޑރ. އަހުމަދު އަބްދުﷲ ދީދީ ހިމެނިވަޑައިގަންނަވާ ގޮތަށް ފަނޑިޔާރު އަބްދުﷲ އަރީފާއި ފަނޑިޔާރު އާދަމް މުހައްމަދު ހިމެނިވަޑައިގަންނަވާ ތިން ފަނޑިޔާރުންގެ ބެންޗަކުންނެވެ.
ނަޝީދުގެ އިތުރުން އަދާލަތު ޕާޓީގެ ރައީސް ޝައިހް އިމްރާން އަބްދުﷲ އާއި ކުރީގެ ދެ ޑިފެންސް މިނިސްޓަރުން ކަމަށްވާ މުހައްމަދު ނާޒިމާއި ތޮލްހަތު އިބްރާހިމް ކަލޭފާނާއި ރައްޔިތުންގެ މަޖިލީހުގެ ކުރީގެ ނައިބު ރައީސް އަހުމަދު ނާޒިމްގެ ޖަލު ހުކުމުގެ މައްސަލަ ވެސް ރިވިއު ކުރަން ސުޕްރީމް ކޯޓުން ވަނީ ނިންމައިފައެވެ.
