ވަޒީރުންގެ މަޖިލިސް: ޝުޢޫރުތަކާއި ޚިޔާލުތައް ތަފާތު

ސެޕްޓެމްބަރު މަހުގެ 23 ވަނަ ދުވަހު ބޭއްވި ރިޔާސީ އިންތިޚާބުގެ ނަތީޖާ ލިބުމާއިއެކު ގިނަ ބަޔަކު ސުވާލު އުފައްދަމުން ދިޔައީ ސަރުކާރު ބެހިގެންދަނީ ކިހިނެއްތޯއެވެ؟ ޓްރާންސިޝަން މުއްދަތުގެ ތެރޭގައި އެފެނުނު ލިސްޓްތަކުގެ އަދަދު ދަންނަވާކަށް ނޭނގެއެވެ. ވަޒީރުންގެ މަޖިލީސްކަމަށް ބުނެ އެތައް ބައެއްގެ ނަންތައް އަޑު އިވެމުން ދިޔައެވެ. އޭރުވެސް ފެންމަތިވި ބައެއް ނަންތަކަށް މީހުން ފާޑުކިޔަން ފެށިލެއް ވަރުގަދަކަމުން ހީވީ ދެންމެ ދެންމެ އެމީހުން ވަޒީރުންގެ މަޖިލީހަށް ނަގާފާނެ ހެންނެވެ.

ކޮންމެއަކަސް، އެންމެންގެ އިންތިޒާރަށް ނިމުން އައީ ހޮނިހިރު ދުވަހު ހުވައި ކުރެއްވުމަށްފަހު ރައީސް އިބްރާހިމް މުހައްމަދު ސޯލިޙްގެ ކެބިނެޓް އިއުލާންކުރެއްވުމާއިއެކު އެވެ. ކެބިނެޓްގެ ބައެއް މެމްބަރުންނަށް ފާޑުކިޔަން އެންމެ ފުރަތަމަ ފެށީ ކޯލިޝަންގެ މެމްބަރުންނެވެ. ބައެއް އާއްމުން އެމީހުންގެ ކަންބޮޑުވުންތައް ސޯޝަލް މީޑިއާގައި ބަންޑުން ކޮށްލިތަން ފެނުނެވެ. އެމްޑީޕީއަށް ނިސްބަތްވާ ބައެއް މީހުންނަށް ކަމުނުދިޔައީ ޖުމްހޫރީ ޕާޓީގެ ސްލޮޓްތަކަށް އައި މީހުންނެވެ. ޖުމްހޫރީ ޕާޓީއަށް ނިސްބަތްވާ ބައެއް ފަރާތްތަކަށް ކަމުނުދިޔައީ އެކަމާއި ގުޅިގެން އެމްޑީޕީއަށް ނިސްބަތްވާ ފަރާތްތަކުން ކިޔަން ފެށި ފާޑުކިޔުމެވެ. އަނެއް ބަޔަކަށް ކަމުނުދިޔައީ ޢަދާލަތު ޕާޓީއަށް ލިބުނު ސްލޮޓްތަކެވެ. ދެން ތިބި ބަޔަކަށް ކަމުނުދިޔައީ ރައީސް މައުމޫނަށް ތާޢީދުކުރާ ފަރާތްތަކަށް މާގިނަ ސްލޮޓް ލިބުމެވެ. އަދި އެއްބަޔަކު ބުނަމުންދިޔައީ ކެބިނެޓްގައި އެމްޑީޕީގެ ކުލަ ނެތް ކަމަށެވެ.

ހެޔޮ އެއް ގޮތްވެސް ނެތޭ މީހުން ބުނެ އުޅޭ ވާހަކަ އަންނަނީ މިހާ ހިސާބުންނެވެ. މިއީ ކޯލިޝަން ސަރުކާރެކެވެ. ސެޕްޓެމްބަރު 23 ގައި ރިޔާސީ އިންތިޚާބުގައި ވޯޓުލާން ދިވެހިން ނިކުތީ ކޯލިޝަން ކެންޑިޑޭޓަކާއި، ވެރިކަމުގައި ހުންނެވި ރައީސްއާއި ދެ ބޭފުޅުންގެ ނަންފުޅު ވޯޓު ކަރުދާސްކޮޅުގައި އޮންނާނެކަން އެނގިގެންނެވެ. ރައީސް އިބްރާހިމް މުހައްމަދު ސޯލިޙަށް ވޯޓު ދިން ރައްޔިތުންނަށް އެމަނިކުފާނަކީ ކޯލިޝަން ކެންޑިޑޭޓްކަން އެނގެއެވެ. އެހެންކަމުން އެމަނިކުފާނުގެ ކެބިނެޓަކީ ހަމައެކަނި އެމްޑީޕީގެ ކެބިނެޓަކަށް ނުވާނެކަން ވަރަށް ރަނގަޅަށް އެނގެންވާނެއެވެ.

ރައްޔިތުން ވޯޓު ދިނީ އިންސާފު ޤާއިމްކޮށް، އަނިޔާވެރިކަން ނައްތާލުމަށެވެ. ރައްޔިތުން ބޭނުންވި ބަދަލު ފެނިއްޖެއެވެ. ދެން އޮތީ ކެބިނެޓަށް އައްޔަން ކުރެވުނު ބޭފުޅުންގެ އަމަލުތައް ކައިރިން ބެލުމެވެ. ރައްޔިތުން އެ ބޭފުޅުންނާއިމެދު ހިތްހަމަ ނުޖެހޭނަމަ، އެބޭފުޅުންގެ ދާއިރާގެ މެމްބަރުން އަރިހު ވިދާޅުވެގެން އެ ވަޒީރުންނަށް ރުހުން ނުދޭނީއެވެ. ބާރުތައް ފެށިގެން އަންނަނީ ރައްޔިތުންގެ ކިބައިންނެވެ. ރައްޔިތުން އެދޭ ގޮތަށް މަޖިލީހުން ގޮތް ނުނިންމައިފިނަމަ، ކުރިއަށް އޮތް ރައްޔިތުންގެ މަޖިލީހުގެ އިންތިޚާބުގައި ރައްޔިތުން އެދޭ ގޮތް ތަމްސީލް ކުރާނެ މެމްބަރުން ހޮވާށެވެ.

ބައެއް ބޭފުޅުން ވިދާޅުވާ ގޮތުގައި ކެބިނެޓްގައި އެކިއެކި ތުހުމަތުކުރެވޭ ބޭފުޅުން އެބަތިއްބެވިއެވެ. އެހެންކަމަށްވާނަ އެބޭފުޅުންގެ މައްސަލަތައް ކަމާއި ބެހޭ ފަރާތްތަކަށް ހުށަހަޅުއްވައިގެން މައްސަލަތައް ކުރިއަށް ގެންދަވާށެވެ. ބޮޑު ތުހުމަތެއްގެ ކުށުގައި ތުހުމަތުކުރެވޭ މީހަކު ކެބިނެޓްގައި އިންނަވަން ރައީސް ސޯލިޙްވެސް ބޭނުންފުޅު ވެވަޑައިގަންނަވާނެ ހެނެއް ހިއެއް ނުވެއެވެ.

ކޯލިޝަން ކެބިނެޓަށް ފުރުސަތު ދޭން ޖެހެއެވެ. ފުރަތަމަ 100 ދުވަސްތެރޭ ރައްޔިތުންނަށް ކޮށްދޭން ވައުދުވި ކަންކަން ކޮށްދެނީ ކިހާ ވަރަކަށްތޯ ބަލަން ޖެހެއެވެ. ފެއިލްވެއްޖެނަމަ އެވަޒީރަކު ފެއިލްވީއެވެ. ކާމިޔާބު ކޮށްފިނަމަ، ޖެހިގެން އަންނަ 100 ދުވަސް އަނެއްކާވެސް ބަލާނީއެވެ. އެންމެ ހިނދުކޮޅަކަށްވެސް މަޑުނުކޮށް އަބަދުވެސް ފާރަވެރިވާން ވީއެވެ. އެހެންނަމަވެސް ރަސްމީ ފުރަތަމަ ދުވަހު މަސައްކަތަށް ނިކުމެވެޑައިގެން މަސައްކަތް ކުރައްވަން ފުރުސަތު ދޭން ޖެހެއެވެ.