ރައީސް މައުމޫނުގެ ފަރާތުން ކެބިނެޓަށް ފުރަތަމަ ހުށަހެޅުއްވީ ހުސް އަންހެން ބޭފުޅުންގެ ނަން!
އައުސަރުކާރުން އައްޔަން ކޮށްފައިވާ ކެބިނެޓްގައި 7 އަންހެން ބޭފުޅުން ވަނީ ހިމެނިފައި
ކެބިނެޓް މިނިސްޓަރުން ހުވާކުރައްވަނީ
ރައީސުލްޖުމްހޫރިއްޔާ އިބްރާހިމް މުހައްމަދު ޞޯލިހްގެ ކެބިނެޓަށް ކުރީގެ ރައީސް އަދި ކޯލިޝަންގެ އެއް ބައިވެރިޔާ މައުމޫން އަބްދުލް ގައްޔޫމްގެ ފަރާތުން ފުރަތަމަ ހުށަހެޅުއްވާފައިވަނީ ހަތަރު އަންހެން ބޭފުޅުންގެ ނަމެވެ.
މައުމޫން ރިފޯމް މޫވްމެންޓް (އެމްއާރުއެމް)ގެ ފަރާތުން އާސަރުކާރުގެ ކެބިނެޓަށް ހުށަހަޅުއްވާފައިވާ ނަންތަކަކީ މިނިސްޓަރ އޮފް ފިޝަރީޒް މެރިން ރިސޯސް އެންޑް އެގްރިކަލްޗަރ ޒަހާ ވަހީދުގެ ނަމާއި މިނިސްޓަރ އޮފް އާރޓްސް ކަލްޗަރ އެންޑް ހެރިޓޭޖް ޔުމްނާ މައުމޫންގެ ނަމާއި، މިނިސްޓަރ އޮފް ހައުސިންގ އެންޑް އާރބަން ޑިވެލޮޕްމަންޓް އައިމިނަތު އާތިފާގެ އިތުރުން ކެމްޕެއިންގައި ރައީސް މައުމޫންގެ ފަރާތްޕުޅުން އިސްކޮށް މަސައްކަތް ކުރެއްވި އައިމިނަތު ނަދިރާގެ ނަން ކަމަށް ރާއްޖެ އެމްވީއަށް ވަނީ މައުލޫމާތު ލިބިފައެވެ.
ނާދިރާ ކޮށްފައިވާ ޓްވީޓްގައި ވަނީ އެމްއާރުއެމްގެ ފަރާތުން ކެބިނެޓުން ފުރުސަތު ލިބުނު ކަމަށާއި ނަމަވެސް އޭނާ އެކަން ބޭނުން ނުވީ ކަމަށެވެ. އަބަދުވެސް ދިވެހި ރައްޔިތުނަށް ޚިދުމަތް ކުރުމުގފައި ހުންނަވާނެ ކަމަށް ނާދިރާ ވަނީ ވިދާޅުވެފައެވެ.
ކެބިނެޓްގައި ހިމެނިވަޑައިގަންނަވާ އަންހެން ބޭފުޅުންނާއިއެކު ނާދިރާ ހުންނެވި ފޮޓޯއަކާއިއެކު ހެރިޓޭޖް މިނިސްޓަރ ޔުމްނާ ކުރައްވާފައިވާ ޓްވީޓެއްގައި ވިދާޅުވީ ކުރިއަށް އޮތް ރައްޔިތުންގެ މަޖިލީހުގެ އިންތިޚާބުގައި ނާދިރާ ވާދަކުރައްވާތަން ފެންނާނެކަމަށް އުއްމީދުކުރައްވާކަމަށެވެ. އެހެން ނަމަވެސް އިންތިޚާބުގައި ވާދަކުރައްވާނެކަން ނާދިރާ އަދި ރަސްމީކޮށް އިއުލާންކުރައްވާފައެއް ނުވެއެވެ.
އައުސަރުކާރުން އައްޔަން ކޮށްފައިވާ ކެބިނެޓްގައި 7 އަންހެން ބޭފުޅުން ވަނީ ހިމެނިފައެވެ. އޭގެތެރޭގައި އެމްއާރުއެމްގެ ފަރާތުން ކެބިނެޓަށް އައްޔަން ކުރައްވާފައިވާ ތިން އަންހެން ބޭފުޅުންގެ އިތުރުން އެމްޑީޕީގެ ފަރާތުން އައްޔަން ކުރައްވާފައިވާ މިނިސްޓަރ އޮފް ޑިފެންސް، އަލްއުސްތާޛާ މާރިޔާ އަހްމަދު ދީދީ، މިނިސްޓަރ އޮފް އެޑިޔުކޭޝަން ޑރ އައިޝަތު އަލީ ހިނެއެވެ. އަދި އަދާލަތު ޕަޓީގެ ފަރާތުން މިނިސްޓަރ އޮފް ޖެންޑަރ ފެމިލީ އެންޑް ސޯޝަލް ސާރވިސަސް ޝިދާތާ ޝަރީފް އައްޔަން ކުރައްވާފައިވާއިރު ޖުމްހޫރީ ޕާޓީގެ ފަރާތުން ވަނީ މިނިސްޓަރ އޮފް ޓްރާންސްޕޯރޓް އެންޑް ސިވިލް އޭވިއޭޝަން އައިޝަތު ނަހުލާ އައްޔަން ކުރައްވާފައެވެ.
އަދި މިއީ މިހާތަނަށް އެންމެ ގިނަ އަންހެން ބޭފުޅުން ކެބިނެޓް މިނިސްޓަރުންނަށް އައްޔަން ކުރެވުނު ފަހަރެވެ.
