މައްޗަންގޮޅީ ގެއެއްގައި އަލިފާން ރޯވެއް، ބޮޑެތި ގެއްލުންތަކެއް ވެއްޖެއެވެ.

ހުކުރު ދުވަހުގެ ރޭ އަލިފާން ރޯވީ މއ. ޒޫނާމަންޒިލްގައެވެ. އެ ގޭގައި ރޯވި އަލިފާން ނިއްވާލެވުނީ ސިފައިންނާއި ފުލުހުންނާއި އާންމުންގެ މަސައްކަތުން ގަޑިއެއްހާއިރު ތެރޭގައެވެ.

މއ. ޒޫނާމަންޒިލްގައި ހިނގި އަލިފާނުގެ ހާދިސާގައި އެންމެ ބޮޑު ގެއްލުމެއް ލިބުނީ އެ ގޭގެ ހުޅަނގުފަރާތަށެވެ. އެ ގެއަށް ލިބުނު ގެއްލުންތަކުގައި އެ ގޭގެ ހުޅަނގު ފަރާތުގެ، ފުރަތަމަ ފަންގިފިލާގައި ބޭނުންކުރާ ގިނަ އަދަދެއްގެ ސާމާނު ވަނީ އަނދާފައެވެ.

އެމްއެންޑީއެފުން ބުނީ ޒުނާމަންޒިންގައި އަލިފާން ރޯވިކަމުގެ މައުލޫމާތު ލިބުނީ ހުކުރު ދުވަހުގެ ރޭ 10:14ގައި ކަމަށާއި ރިޕޯޓު ލިބުމާއެކު އަލިފާން ކޮންޓްރޯލް ކުރުމުގެ މަސައްކަތް އެމްއެންޑީއެފް ފަޔަރ އެންޑް ރެސްކިއު ސާވިސް އިން ފެށި ކަމަށެވެ. 

އެމްއެންޑީއެފުން ބުނީ އަލިފާން ރޯވީ އެގޭގެ ކޮޓަރިއެއްގައި ކަމަށާއި، އެކޮޓަރި ބޭނުން ނުކުރެވޭވަރަށް އަދާފައިވާ ކަމަށެވެ.

އަލިފާން ރޯ ވުމާއެކު ޒޫނާމަންޒިލާ އިންވެގެން ހުރި ގެތަކުން މީހުން ވަނީ ނެރިފައެވެ. މި ހާދިސާގައި އެއްވެސް މީހަކަށް ޖިސްމާނީ އަނިޔާއެއް ނުލިބެއެވެ.

މާލޭގައި އަލިފާނުގެ ހާދިސާތައް ހިނގާ މިންވަރު އިތުރުވެފައިވާއިރު، ބުރާސްފަތި ދުވަހު ޗާންދަނީ މަގުގައި ހުރި ގެއެއްގައި އަލިފާން ރޯވެ އަލިފާން ނިއްވުމަށް ހަރަކާތްތެރިވި ސިފައިންގެ 3 މީހަކަށް ވަނީ ސެނަހިޔާ ހޮސްޕިޓަލުގައި ފަރުވާ ދީފައެވެ.