އިންޑިގޯ އެއާލައިންގެ ދަތުރުތައް ރާއްޖެ އަށް ފަށައިފި

އިންޑިއާގެ މަޝްހޫރު ބަޖެޓް އެއާލައިން އިންޑިގޯ އެއާލައިންގެ ދަތުރުތައް ރާއްޖެއަށް ފަށައިފިއެވެ.

ކޮޗިން އިންޓަނޭޝަނަލް އެއާޕޯޓް އިން ފުރައިގެން އައިސް ވެލާނާ އިންޓަނޭޝަލް އެއާޕޯޓުގައި އިންޑިގޯ ފުރަތަމަ ފްލައިޓް ޖައްސާފައި ވަނީ ބުރާސްފަތި ދުވަހު ހެނދުނުގެ ވަގުތެއްގައެވެ.

މި އެއާލައިންގެ ދަތުރުތައް ކުރަން ހަމަޖެހިފައި ވަނީ ރާއްޖެ އިން އިންޑިއާގެ ކޮޗިން އާއި ބެންގަލޫރުގެ އިތުރުން މުމްބާއީއަށެވެ. އެގޮތުން ކޮންމެ ދުވަހަކު މާލެ-ކޮޗިން އަށް ދަތުރުތައް ބާއްވާއިރު މާލެ- މުމްބާއީއާ ދެމެދު ހަފްތާއަކު ފަސް ދަތުރުކުރުމަށް ވަނީ ހަމަޖެހިފައެވެ. މީގެ އިތުރުން މާލެ- ބެންގަލޫރާ ދެމެދެ ހަފްތާއަކު ދެ ދަތުރު ކުރުމަށް ޝެޑިއުލް ކޮށްފައި ވެއެވެ.

މި ފްލައިޓްތަކަކީ ބިޒްނަޒް ކްލާސްއާ އެކު އެންމެ ހެޔޮ އަގުގައި ދަތުރުތައް ކުރުމަށް ތައްޔާރު ކޮށްފައިވާ އެއަރލައިންތަކަށްވާއިރު އިންޑިގޯ ވެބްސައިޓުން ދަތުރުތަކަށް ބުކިން ހެދޭނެ ކަމަށް އެއަރލައިނުން ވަނީ ބުނެފައެވެ.

އިންޑިގޯ އެއާލައިނުން ރާއްޖެ އާއި އިންޑިއާ ދެމެދު ކުރަން ހަމަޖެހިފައި ވަނީ ކޮންމެ ދުވަހަކު ދެ ދަތުރެވެ. ރާއްޖެ އެމްވީއަށް މައުލޫމާތު ދެއްވަމުން މޯލްޑިވްސް އެއާޕޯޓް ކޮމްޕެނީ ލިމިޓެޑް (އެމްއޭސީއެލް ) ގެ އެސޯސިއޭޓް ޖެނެރަލް މެނޭޖަރ ހަސަން އަރީފް ވިދާޅުވީ އިންޑިގޯ އެއާލައިންއާ އެކު ރާއްޖެގެ ފަތުރުވެރި ކަމަށް އިތުރު ކުރިއެރުމެއް ލިބިގެންދާނެ ކަމަށެވެ. މި ދަތުރުތަކާ އެކު ދެ ގައުމު ދޭތެރޭ ހުޅުވާލެވިގެންދާނެ ފާލަމެއް ކަމަށް ވެސް އޭނާ ވަނީ ވިދާޅުވެފައިއެވެ.

މި އެއާލައިނުން ރާއްޖެ އާއި އިންޑިއާ ދެމެދު ދަތުރުތަކުގައި ބޭނުން ކުރަނީ އޭ ތްރީ މަރުކާގެ ސަތޭކަ ތިރީސް މީހުންގެ ޖާގައިގެ ބޯޓެއް ކަމަށެވެ.

އިންޑިގޯ އެއާލައިންގެ އިތުރުން އެމްއޭސީއެލްގެ އިސްވެރިން ވެސް ބައިވެރިވި ވަޑައިގެންނެވި ރަސްމިއްޔާތުގައި ޝަރަފްވެރި މެހެމާނެއް ގޮތުގައި ބައިވެރިވެވަޑައިގެންނެވީ އިންޑިއާ އިން ރާއްޖެ އަށް ކަނޑައަޅުވައިވާ ސަފީރު އަކިލޭޝް މިޝްރާއެވެ.

މި ރަސްމިއްޔާތުގައި ވާހަކަފުޅު ދައްކަވަމުން މިޝްރާ ވިދާޅުވީ އިންޑިއާގެ އިތުރު އެއާލައިނެއްގެ ދަތުރުތައް ރާއްޖެ އަށް ފެށުމުން އެކަމާ އުފާކުރައްވާ ކަމަށާއި އަދި މީގެ ސަބަބުން ދެ ގައުމުގެ ގުޅުން ބަދަހިވެގެންދާނެ ކަމަށް ފާހަގަކުރެއްވިއެވެ.

އިންޑިގޯ އެއާލައިން ދަތުރުތައް ރާއްޖެއަށް ފަށާފައިވާއިރު އިންޑިއާގެ ގޯ އެއާގެ ދަތުރުތައް ވެސް ރާއްޖެއަށް ވަނީ ފަށާފައެވެ.