ދަރުމަވަންތަ ހޮސްޕިޓަލުގެ 95 އިންސައްތަ ނިމިއްޖެ، ފެބްރުއަރީގައި ހުޅުވޭނެ: މިނިސްޓަރު
ދަރުމަވަންތަ ހޮސްޕިޓަލް އަށް އިކުއިޕްމެންޓް ހޯދުމަށް އަންނަ އަހަރުގެ ބަޖެޓުގައި 93 މިލިއަން ރުފިޔާ ހިމަނާފައިވޭ
ދަރުމަވަންތަ ހޮސްޕިޓަލުގެ 95 ޕަސެންޓް މަސައްކަތް ވަނީ ނިމިފައި
ދަރުމަވަންތަ ހޮސްޕިޓަލުގެ 95 ޕަސެންޓް މަސައްކަތް މިހާރު ނިމިފައިވާ ކަމަށާއި 2019 ވަނަ އަހަރުގެ ފެބްރުއަރީ މަހު ހުޅުވަން ތައްޔާރުވެފައިވާ ކަމަށް ހެލްތު މިނިސްޓަރު އަބްދުﷲ ނާޒިމް ވިދާޅުވެއްޖެއެވެ.
ހޮސްޕިޓަލުގެ މަސައްކަތް ކުރިއަށްދާ ގޮތް ބައްލަވައިލެއްވުމަށް ބުދަ ދުވަހު ކުރެއްވި ޒިޔާރަތުގައި ނޫސްވެރިންނަށް މައުލޫމާތު ދެއްވަމުން މިނިސްޓަރު ވިދާޅުވީ އުއްމީދު ކުރި ވަރަށް ވުރެ މަސައްކަތް ލަސްވެފައި ވާކަމަށެވެ.
އައިޖީއެމްޗްއާ ޖެހިގެން އަޅަމުންދާ 25 ބުރީގެ ދަރުމަވަންތަ ހޮސްޕިޓަލް ހުޅުވަން ކުރިން ކަނޑައަޅާފައި އޮތީ މި އަހަރުގެ ޖުލައި މަހު 26 ވަނަ ދުވަހުއެވެ.
ސިންގަޕޫރުގެ ޝެންހުއާ ކޮންސްޓްރަކްޝަނާ ހަވާލުކޮށްގެން ޖޫން، 5، 2016 ގައި، މަސައްކަތް ފެށި މި މަޝްރޫއަށް ދައުލަތުގެ ބަޖެޓުން 140 މިލިއަން ޑޮލަރު (2.1 ބިލިއަން ރުފިޔާ) ހޭދަކުރެއެވެ.
ހޮސްޕިޓަލަށް ގެންނަ އިކުއިޕްމަންޓަށް ދައްކާ ފައިސާއަކީ އަދި އިމާރަތުގެ އަގުގެ ތެރޭގައި ނުހިމެނޭ ބައެކެވެ. އެ ގޮތުން މިހާރު މަޖިލީހަށް ހުށަހަޅާފައިވާ ބަޖެޓުގައި ވެސް ދަރުމަވަންތަ ހޮސްޕިޓަލްގެ އިކުއިޕްމެންޓް ހޯދުމަށް 93 މިލިއަން ރުފިޔާ ޖަހާފައި ވެއެވެ.
