އާ ސަރުކާރުގެ ކެބިނެޓްގައި 19 މިނިސްޓްރީ
13 ނޮވެމްބަރު 2018 | އަންގާރަ 13:35ސިޔާސީ މަގާމްތަށް މަދުވާނެ
އާ ސަރުކާރުގެ ކޯލިޝަންގެ އިސްވެރިން
ހޮނިހިރު ދުވަހު ރައީސްކަމުގެ ހުވާ ކުރައްވާ އިބްރާހިމް މުހައްމަދު ސޯލިހްގެ ސަރުކާރުގައި އުފައްދަނީ 19 މިނިސްޓްރީ ކަމަށް އިންތިހާބީ ރައީސްގެ އޮފީހުން ހާމަކޮށްފިއެވެ.
އިންތިހާބީ ރައީސްގެ ތަރުޖަމާނު މާރިޔާ އަހްމަދު ދީދީ ވިދާޅުވި ގޮތުގައި 19 މިނިސްޓްރީގެ އިތުރުން ދައުލަތުގެ ބަންޑާރަ ނައިބު ހުންނަވާނެ އެވެ.
މާރިޔާ ވިދާޅުވީ މިނިސްޓްރީތައް އިތުރުވި ނަމަވެސް މިހާރު ސިޔާސީ މަގާމުތަކަށް ކުރާ ހޭދަ 16 ޕަސެންޓް ކުޑަވެގެންދާނެ ކަމަށެވެ. ސިޔާސީ މަގާމުތަކުގެ އަދަދު ރައީސް ޔާމީންގެ ސަރުކާރުގައި 700 އަށް އަރާ އިރު އެ އަށް ވުރެ 100 ވަރަކަށް މަގާމު އިންތިޚާބީ ރައީސްގެ ސަރުކާރުގައި މަދުވާނެ ކަމަށް މާރިޔާ ވިދާޅުވިއެވެ
އާ ސަރުކާރުގައި އުފައްދަނީ އާ ހަތަރު މިނިސްޓްރީއެއް ކަމަށާއި، މިހާރު ހުރި ބައެއް މިނިސްޓްރީތަކުގެ ނަމާއި މެންޑޭޓްތައް އާ ސަރުކާރުގައި ބަދަލުވެގެންދާނެ ކަމަށް މާރިޔާ ވިދާޅުވިއެވެ.
"މިހާރު މި ސަރުކާރުގައި 700 އަށް ވުރެ ގިނަ ސިޔާސީ މަގާމް އެބައޮތް. ރައީސް ސޯލިހުގެ ސަރުކާރުގައި ތިއްބަވާނީ މިހާރު އޮތް ސަރުކާރުގެ ސިޔާސީ މަގާމްތަކުގައި ތިއްބަވާ ބޭފުޅުންނަށް ވުރެ 100 އަށް ވުރެ މަދު އަދަދެއްގައި. މިއީ ހަރަދަށް ބަލާއިރު ކިހާވަރެއްކަން ރައްޔިތުން މީހާގެ ޖީބުން ސޭވް ވާނެތޯ ބައްލަވައިފި ކަމުގައިވަނީނަމަ ޓްރާންސްލޭޓްވަނީ ގާތްގަނޑަކަށް 16 ޕަސެންޓް،" މާރިޔާ ވިދާޅުވިއެވެ.
އިންތިޚާބީ ރައީސް ސޯލިހުގެ ސަރުކާރުން އަލައް އުފައްދާ މިނިސްޓްރީ ތަކަކީ މިނިސްޓްރީ އޮފް ހަޔަރ އެޑިއުކޭޝަން، މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަން، މިނިސްޓްރީ އޮފް އާރޓްސް ކަލްޗަރ އެންޑް ހެރިޓޭޖް، މިނިސްޓްރީ އޮފް ކޮމިއުނިކޭޝަންސް ސައިންސް ޓެކްނޮލިޖީއެވެ.
އާ މަސްއޫލިއްޔަތުތަށް ހަވާލުކުރެވުނު ފަސް މިނިސްޓްރީއަކީ މިނިސްޓްރީ އޮފް ޖެންޑަރ ފެމިލީ އެންޑް ސޯޝަލް ސާރވިސަސް، މިނިސްޓްރީ އޮފް ފިޝަރީޒް މެރިން ރިސޯސް އެންޑް އެގްރިކަލްޗަރ، މިނިސްޓްރީ އޮފް ނެޝަނަލް ޕްލޭނިންގ އެންޑް އިންފްރާސްޓްރަކްޗަރ، މިނިސްޓްރީ އޮފް ހައުސިންގ އެންޑް އާރބަން ޑިވެލޮޕްމަންޓް، މިނިސްޓްރީ އޮފް ޔޫތް ސްޕޯޓްސް އެންޑް ކޮމިއުނިޓީ އެމްޕަވަރމަންޓް އެވެ.
ނަން ބަދަލުވާ ބައެއް މިނިސްޓްރީ ތަކަކީ މިނިސްޓްރީ އޮފް ޑިފެންސް އެންޑް ނެޝަނަލް ސެކިއުރިޓީގެ ނަން މިނިސްޓްރީ އޮފް ޑިފެންސް އަށް، މިނިސްޓްރީ އޮފް ފިނޭންސް އެންޑް ޓްރެޒަރީގެ ނަން މިނިސްޓްރީ އޮފް ފިނޭންސް ގެ ނަމަަށް އަދި މިނިސްޓްރީ އޮފް އެންވަޔަރަމެންޓް އެންޑް އެނާރޖީގެ ނަން މިނިސްޓްރީ އޮފް އެންވަޔަރަމަންޓްގެ ނަމަށް އާ ސަރުކާރުގައި ބަދަލުވެގެންދާނެއެވެ.
އެއްވެސް ބަދަލެއް ގެނެސްފައިނުވާ ތަކަކީ މިނިސްޓްރީ އޮފް ހޯމް އެފެއާރޒް، މިނިސްޓްރީ އޮފް ފޮރިން އެފެއާރޒް، މިނިސްޓްރީ އޮފް އިސްލާމިކް އެފެއާރޒް، މިނިސްޓްރީ އޮފް އެޑިއުކޭޝަން، މިނިސްޓްރީ އޮފް ޓުއަރިޒަމް، މިނިސްޓްރީ އޮފް ހެލްތު، މިނިސްޓްރީ އޮފް އިކޮނޮމިކް ޑިވެލޮޕްމަންޓް އަދި އެޓާރނީ ޖެނެރަލްގެ އޮފީހެވެ.
