\'ތަގްސް އޮފް ހިންދުސްތާން\' 100 ކްރޯޑް ކްލަބަށް!

މިދިޔަ ބްރާސްފަތި ދުވަހު ރިލީޒްކުރި އާމިރް ޚާންގެ "ތަގްސް އޮފް ހިންދުސްތާން" ވަނީ ތިން ދުވަހުގެ ތެރޭގައި ބޮކްސް އޮފީހުގައި 100 ކްރޯޑް ކްލަބަށް ވަދެފައެވެ.

މި ފިލްމް ރިލީޒް ކުރި ފުރަތަމަ ދުވަހު ފިލްމް މިވަނީ ރެކޯޑު މުގުރާފައެވެ.

މި ފިލްމަށް ރިލީޒް ކުރި ފުރަތަމަ ދުވަހު 52.5 ކުރޯޑް ރުޕީސް ވަނީ ލިބިފައެވެ.

މިހާތަނަށް ބޮލީވުޑްގެ ފިލްމެއް އެޅުވިތާ ފުރަތަމަ ދުވަހުން 50 ކުރޯޑް ރުޕީސް އަށް ވުރެ މައްޗަށް ލިބުނު ފުރަތަމަ ފިލްމަށް މި ފިލްމު ވަނީ ވެފައެވެ.

ދެވަނަ ދުވަހު 28.25 ކްރޯޑް ރުޕީސް، ތިން ވަނަ ދުވަހު 22.75 ކްރޯޑް ރުޕީސް އަދި ހަތަރު ވަނަ ދުވަހު 17.25 އާ އެކު މި ފިލްމް ވަނީ ބޮކްސް އޮފީހުގައި ސަތޭކަ ކްރޯޑް ކުލަބަށް ވަދެފައެވެ. މި ފިލްމު5000 ސްކްރީނެއްގައި ވަނީ އަޅުވާފައެވެ.

ފުރަތަމަ ދުވަހާއި އަޅާބަލާއިރު ފިލްމަށް ލިބެމުން ދިޔަ ތަރުހީބު ކުޑަވެފައި ވަނީ ފިލްމު ކްރިޓިކުންގެ ފާޅުކުރި ނެގެޓިވް ހިޔާލުތައް ގިނަވުމުން ކަމަށް ބެލެވޭ ކަމަށް ރިޕޯޓްތައް ބުނެއެވެ. ކްރިޓިކުންގެ އެންމެ ބޮޑު ޝަކުވާއަކަށްވީ ފިލްމު މާދިގުވުމެވެ. މި ފިލްމު މި އަށް ވުރެ ރަނގަޅު ސްކްރިޕްޓަކާ އެކު ކުރުކޮށް ގެނެސްދެވޭނެ ކަމަށް ކްރިޓިކުން ވަނީ ބުނެފައެވެ. އަދި މި ފިލްމްގެ ޑައިރެކްޝަން ވެސް ކަމުނުދާކަން ކްރިޓީކުން ވަނީ ފާހަގަ ކޮށްފައެވެ.

"ތަގްސް އޮފް ހިންދުސްތާން" ގައި ޝޫޓުކޮށްފައިވާ ބޮޑުބަޔަކީ ކަނޑާއި ބޯޓުތަކުގެ މަންޒަރުތަކެވެ. އިންޑިއާގެ ނޫސްތަކުގައި ރިޕޯޓުކޮށްފައިވާ ގޮތުގައި މި ފިލްމުގައި ބޭނުންކޮށްފައިވާ ދެ ބޯޓު ހެދުމަށް ގާތްގަނޑަކަށް އަހަރެއްހާ ދުވަސް ވަނީ ނަގާފައެވެ. އެ ދެބޯޓުގެ ބަރުދަނުގައި އެކަނި ވެސް ދެ ލައްކަ ކިލޯ ހުންނަ ކަމަށް ވެއެވެ. އެއް އަހަރު ދުވަހުގެ ތެރޭގައި މި ދެ ބޯޓު ބަނުމަށް 1000 އެއްހާ އިންޓަނޭޝަނަލް ޑިޒައިނަރުންނާއި ބޯޓު ބަންނަ މީހުން ވަނީ ހަރަކާތްތެރި ވެފައެވެ. މި ދެބޯޓު ބަނދެފައި ވަނީ ޔޫރަޕްގެ ގައުމެއް ކަމަށްވާ މޯލްޓާގައެވެ. މި ފިލްމުގެ މަންޒަރުތައް ވެސް ނަގާފައި ވަނީ މޯލްޓާ އާއި މުމްބާއީގައެވެ.

ޔާޝް ރާޖް ފިލްމްސް އިން ޕްރޮޑިއުސްކުރި މި ފިލްމުގެ ވާހަކަ ލިޔެ، ފިލްމު ޑައިރެކްޓްކޮށްފައި ވިޖޭ ކްރިޝްނާ އަޗާރިޔާއެވެ.

"ތަގްސް އޮފް ހިންދުސްތާން"ގައި އާމިރު ޚާންގެ އިތުރުން އަމީތާބް ބައްޗަން އާއި ފާތިމާ ސަނާ ޝައިޚް އަދި ކެޓްރީނާ ކައިފް އާއި މުޙައްމަދު ޒީޝާން އައްޔޫބް ފެނިގެންދެއެވެ. ފިލްމްގެ ތަރިންގެ އެކްޓިން އަށް ގިނަ ބައެއްގެ ތައުރީފު ލިބިގެންދިޔަ ނަމަވެސް ފިލްމުގެ ޑައިރެކްޝަނާއި ސްކްރިޕްޓަށް ވަނީ ބޮޑެތި ފާޑުކިޔުންތަކެއް އަމާޒުވެފައެވެ.

މި ފިލްމަކީ 1839 ވަނަ އަހަރު ނިކުތް ނޮވެލް "މެއޮޑީވްސް" ލިޔެފައިވާ "ނޮވެލް ކޮންފެޝަން އޮފް އަ ތަގް" މި ވާހަކައިގެ މައްޗަށް ބިނާކޮށް އުފައްދާފައިވާ ފިލްމެކެވެ. މި ފިލްމަކީ 300 ކްރޯޑް ރުޕީސްއަށް ވުރެ ވެސް ބޮޑު ބަޖެޓަކުން ހެދި ފިލްމެއް ކަމަށް ރިޕޯޓްތައް ބުނެއެވެ.

ފިލްމް އެންމެ ބޮޑަށް އަޅާ ކިޔަމުންދަނީ ހޮލީވުޑްގެ މަޝްހޫރު ފިލްމް "ޕައިރޭޓްސް އޮފް ދި ކެރީބިއަން"" އާއެވެ. ބައެއް ފަރާތްތަކުން ދެކޭ ގޮތުގައި މިއީ އެ ސީރީޒްގެ ފިލްމްތައް އިރާލައިގެން ތައްޔާރުކޮށްފައިވާ މަސްހުނިގަނޑެކެވެ. އަދި ހާއްސަކޮށް ފިލްމްގައި ލަވަތައް ބޭނުން ކޮށްފައިވާ ގޮތާއި ކެޓްރީނާގެ ރޯލު ބޭކާރު ކަމަށް ބުނެ ބައެއް ފަރާތްތަކުން ވަނީ ފާޑުކިޔާފައެވެ،.