މިމަހުގެ 17 ވަނަ ދުވަހު ރާއްޖޭގެ ރައީސުލްޖުމްހޫރިއްޔާ ކަމާ ހަވާލުވެވަޑައިގަންނަވާ އިބްރާހިމް މުހައްމަދު ސޯލިހު، ރައިސުލްޖުމްހޫރިއްޔާ ކަމަށް އިންތިހާބުވީ ކޯލިޝަނެއްގެ ތެރެއިން ކަމަށާއި އެމަނިކުފާނުގެ ކެބިނެޓް އެކުލަވާލާނީ އެކަން ޤަބޫލު ކުރައްވައިގެން ރައީސުލް ޖުމްހޫރިއްޔާ އިބްރާހީމް މުހައްމަދު ސޯލިހް ކަމަށް ކުރީގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.
އއ. އުކުޅަހުގައި ވާހަކަފުޅު ދައްކަވަމުން ރައީސް ނަޝީދު ވިދާޅުވީ އިބްރާހީމް މުހައްމަދު ސޯލިހްއަށް އިންތިހާބު ކާމިޔާބުވީ ޕާޓީތައް ގުޅިގެން ކުރި މަސައްކަތުން ކަމަށާއި އެކަން އެމަނިކުފާނުގެ ވިސްނުންފުޅުގައި އަބަދުވެސް ހުންނާނެ ކަމަށެވެ. އެކަމަކު އެމަނިކުފާނު ގުޅިފައިވާ ސަރުކާރެއް އެކުލަވާލާއިރު އަޅުގަނޑުމެން އެންމެން ވެސް ހަނދާން ބަހައްޓަންވީ އަސްލުތަކެއް އެބަހުރި ކަމަށް ރައީސް ނަޝީދު ވިދާޅުވި އެވެ.
ރައީސް ނަޝީދު ވިދާޅުވީ ދިވެހިރާއްޖޭގެ ގާނޫނު އަސާސީގައިވާ ގޮތުން ވަޒީރުންގެ މަޖިލީހަކީ ރައީސުލްޖުމްހޫރިއްޔާގެ މަސްއޫލިއްޔަތާއި ޒިންމާ އަދި ރައީސުލްޖުމްހޫރިއްޔާގެ ހައްގެއް ކަމަށެވެ.
"ތެދުފުޅެއް ރައީސުލްޖުމްހޫރިއްޔާއަށް އެނގިވަޑައިގަންނަވާ ރައީސުލްޖުމްހޫރިއްޔާ އިންތިހާބުވެވަޑައިގެންނެވީ އިއްތިހާދަކުންކަން. އެހެން ނަމަވެސް ރައީސުލްޖުމްހޫރިއްޔާ އެކުލަވާލައްވާ ވަޒީރުންގެ މަޖިލީހަކީ އެމަނިކުފާނުގެ ވަޒީރުންގެ މަޖިލީހެއް، އެއީ އެމަނިކުފާނުގެ ގާނޫނީ ހައްގެއް، ކޮންމެ ހައްގަކާއެކު ޒިންމާއަކާއެކުވާ އަސްލެއް. އެމަނިކުފާނުގެ ކެބިނެޓް އެކުލަވާލައްވާއިރުގައި އަޅުގަނޑު ދެކޭގޮތުގައި ޕާޓީތަކުން އެ މައްޗަށް "ސަވާރުވުމަށް" ނުވަތަ ބުރަވުމަށްމަސައްކަތް ކުރުމަކީ އަޅުގަނޑު ދެކޭގޮތުގައި ދިވެހިރާއްޖޭގެ ގާނޫނުތައް ވެސް އަދި އާންމު އަހްލާގު ވެސް ތަންދޭ ކަމެއް ނޫން"ރައީސް ނަޝީދު ވިދާޅުވިއެވެ.
ރައީސް ނަޝީދު ވިދާޅުވީ އިބްރާހީމް މުހައްމަދު ސޯލިހް ވަޒީރުންގެ މަޖިލީހެއް، އުފައްދަވާނީ އަދި އެމަނިކުފާނު ރިޔާސަތު އަދާކުރައްވާ އެމަނިކުފާނުގެ ސަރުކާރު ހިމެނިގެން ވާނީ ޝައްކެއް ވެސް ނެތް ގޮތުގައި އިއްތިހާދުގެ ވިސްނުން، އިއްތިހާދުގެ ތަސައްވުރު، އިއްތިހާދުގެ އުއްމީދުތައް އެކުލެވޭ ސަރުކާރެއްގެ ގޮތުގައި ކަމަށެވެ. އަދި އިއްތިހާދުގެ އެ ތަސައްވުރު ހަގީގަތަކަށް ހެދުމަށް މަސައްކަތް ކުރައްވާނެ ކަމަށެވެ. މީގެ އިތުރުން އެކަމަށްޓަކައި އެކުލަވާލާ ސަރުކާރުގެ ކޮންމެ މަގާމަކީ ވެސް ހުދު އިބްރާހީމް މުހައްމަދު ސޯލިހް އައްޔަން ކުރައްވާ މަގާމަކަށް ވެގެންދާނެ ކަމަށް ރައީސް ނަޝީދު ވިދާޅުވިއެވެ.
ރައީސް ނަޝީދުގެ މިދަތުރުފުޅުގައި އެމަނިކުފާނުގެ އަނބިކަނބަލުންގެ އިތުރުން އެމްޑީޕީގެ އިސްސަފުގައި ހިމެނިވަޑައިގަންނަވާ ބައެއް ބޭފުޅުން އަދި ރައްޔިތުންގެ މަޖިލީހުގެ ކުރީގެ ބައެއް މެމްބަރުން ބައިވެރިވެވަޑައި ގަންނަވައެވެ.
