އަނިޔާވެރިކަމަށް ބޯ ނުލަބާނަން، ޖެހޭނީ ބޯ ކަނޑާލަން: ޝާހިދު

އަނިޔާވެރިކަމަށް ދުވަހަކުވެސް ބޯ ނުލަބާނެ ކަމަށާއި ބޯ ޖެހޭނީ ކަނޑާލަން ކަމަށް ހެންވޭރު ދެކުނު ދައިރާގެ މެންބަރު އަދި ރައްޔިތުންގެ މަޖިލީހުގް ކުރީގެ ރައީސް އަބްދުﷲ ޝާހިދު ވިދާޅުވެއްޖެ އެވެ.

މާފަންނު ކުނޫޒްގައި ބޭއްވި ޖަލްސާގައި ވާހަކަދައްކަވަމުން އަބްދުﷲ ޝާހިދު ވިދާޅުވީ، ހޯމަ ދުވަހު މުޅި ރާއްޖޭގެ ރައްޔިތުންތައް އުފާވެރިކަން ގެނެސްދިނީ، މަޖިލީހުގެ ތެރެއިން 45 މެންބަރުންގެ ސޮއި ހަމަކުރެވި، މަޖިލީހުގެ ރައީސްގެ އިތުބާރު ނެތްކަން ޔަގީން ކުރެވެމުން ކަމަށެވެ.

Advertisement

މި 45 މެންބަރުންނަކީ ދިވެހި ރާއްޖޭގެ އުންމީދު ކަމަށާއި މިހާރު އެ އުންމީދު ހާސިލްވެފައިވާ ކަމަށް ޝާހިދު ވިދާޅުވި އެވެ. ޝާހިދު ވިދާޅުވީ، 45 މެންބަރުންގެ ހަމައިން އިދިކޮޅު ފަރާތްތަކުން ފަށާފައިވާ މަސައްކަތް ނުހުއްޓާނެ ކަމަށާއި ދިވެހި މި މަސައްކަތް ހުއްޓާނީ ދިވެހި ރާއްޖޭގެ ރައްޔިތުންގެ އުންމީދުތައް ހާސިލް ކުރުމަށް ފަހުގައި ކަމަށް އޭނާ ވިދާޅުވި އެވެ.

ޝާހިދު ވަނީ މި ސަރުކާރުގެ އަނިޔާވެރިކަމުން ކާމިޔާބީ ހާސިލް ނުވާނެ ކަމަށް ވިދާޅުވެ، ރައީސް ޔާމީނުގެ އަމަލުތަކަށް ވަރަށް ބޮޑަށް ފާޑުވިދާޅުވެފަ އެވެ.

" އަނިޔާވެރިކަމަކީ ދުވަހަކު ވެސް ކާމިޔާބު ލިބޭނެ ކަމެއް ނޫން. އެކަމުން ފެންނާނީ ބަލިކަށިކަން. އެކަން މިހާރު އެދަނީ ފެންނަމުން،" ޝާހިދު ވިދާޅުވި އެވެ.

އިދިކޮޅު ފަރާތްތަކުން ކުރަމުންދާ މަސައްކަތުން އެންމެ ބޮޑަށް މަސައްކަތް ކުރާނީ އިސްލާމްދީނުގެ މަތިވެރި އުސޫލުތަކުގެ ތެރެއިން ގާނޫނު އަސާސީއާ އެއްގޮތްްވާގޮތުގެ މަތިން ސަރުކާރު ހަމަ މަގަށް އެޅުމުގެ މަސައްކަތް ކަމަށް އޭނާ ވިދާޅުވި އެވެ.

ރައްޔިތުންގެ މަޖިލީސް ފެނިގެންދިޔައީ އެންމެ ވޮޑު ޖަރީމާ ހިންގަމުން ދިޔަ ތަނުގެ ގޮތުގައި ކަމަށާއި އެމަންޒަރު ބަލަން ޕާޓީތަކުގެ ލީޑަރުންނަށް ނުކެރުނު ކަމަށް ޝާހީދު ވިދާޅުވި އެވެ.

އެމްޑީޕީގެ ރައީސް މުހައްމަދު ނަޝީދާއި ޕީޕީއެމްގެ ރައީސް މައުމޫން އަބްދުލްގައްޔޫމް އަދި ޖުމްހޫރީ ޕާޓީގެ ލީޑަރު ގާސިމް އިބްރާހިމްގެ އިތުރުން އަދާލަތުގެ ޕާޓީގެ ރައީސް ޝެއިހު އިމްރާން އަބްދުﷲ އިސްވެ ފެއްޓެވި މަސައްކަތަކީ ކާމިޔާބު މަސައްކަތެއް ކަމަށް ޝާހިދު ވިދާޅުވި އެވެ.

ރިޔާސަތުގައި ހުންނަ ގޮޑީގައި ހުރުމަކީ ޝަރަފްވެރިކަމެއް ނަމަވެސް ތާއީދު ނެތް، އިހްތިރާމު ނެތް ގޮޑިއެއްގައި އިނުމަކީ ޝަރަފްވެރިކަމަށް ނުވާނެ ކަމަށް މަޖިލީހުގެ ރައީސް އަބްދުﷲ މަސީހަށް ޝާހިދު ވަނީ ފާޑު ވިދާޅުވެފަ އެވެ.

މި ސަރުކާރުގެ އޮޑި ފަރަށް އަރާފައިވާ ކަމަށާއި އިދިކޮޅު ފަރާތްތަކުގެ އޮޑިއަށް އަވަހަށް ފުއްމާލުމަށް ވިދާޅުވެ ޝާޙީދު ވަނީ ޕީޕީއެމްގެ ހުރިހާ މެންބަރުންނަށް އިދިކޮޅު ފަރާތްތަކާ ގުޅުމަށް ގޮވާލައްވާފަ އެވެ.

އިދިކޮޅު ފަރާތްތަކުން އެކުގައި ފެށި މަސައްކަތް ހުއްޓާލާނީ ސަރުކާރު ބަލި ކުރުމަށް ފަހުގައި ކަމަށް ޝާހިދު ވިދާޅުވި އެވެ.