ތިނަދޫގައި އަލަށް އިމާރާތްކުރި ފަޔަރ ސްޓޭޝަންގެ އިމާރާތް ހުޅުވައިފި
11 ނޮވެމްބަރު 2018 | އާދީއްތަ 16:07މި އިމާރާތް ހުޅުއްވައި ދެއްވީ ޑިފެންސް މިނިސްޓަރ އާދަމް ޝަރީފް
ޑިފެންސް މިނިސްޓަރ އާދަމް ޝަރީފް ގދ. ތިނަދޫ ފަޔަރ ސްޓޭޝަން ހުޅުވައިދެއްވަނީ
ތިނަދޫގައި އަލަށް އިމާރާތްކުރި ފަޔަރ ސްޓޭޝަންގެ އިމާރާތް ހުޅުވައިފިއެވެ.
މި ސްޓޭޝަނަކީ އެމްއެންޑީއެފް ސަދަން އޭރިއާގައި ހިމެނޭ ގދ. ތިނަދޫގައި އަލިފާން ނިއްވުމުގެ ޚިދުމަތް ދިނުމަށް އިމާރާތް ކުރި ސްޓޭޝަނެކެވެ.
އާދީއްތަ ދުވަހު ތިނަދޫގައި ބޭއްވި ރަސްމިއްޔާތެއްގައި ފަޔަރ ސްޓޭޝަންގެ މި އިމާރާތް ހުޅުއްވައި ދެއްވީ މިނިސްޓްރ އޮފް ޑިފެންސް އެންޑް ނޭޝަނަލް ސެކިއުރިޓީ އާދަމް ޝަރީފް ޢުމަރެވެ.
ފަޔަރ ސްޓޭޝަން ހުޅުވައި ދެއްވުމަށްފަހު ޑިފެންސް މިނިސްޓަރ ވާހަކަދައްކަވަނީ
މިރަސްމިއްޔާތުގައި ވާހަކަފުޅު ދައްކަވަމުން ޑިފެންސް މިނިސްޓްރު ވިދާޅުވީ ތިނަދޫގައި ހުޅުވިގެން މިދިޔަ ފަޔަރ ސްޓޭޝަންގެ އައު އިމާރާތާއި ގުޅިގެން ހުވަދުއަތޮޅުގެ ރައްޔިތުންނަށާއި އެމްއެންޑީއެފް ސަދަން އޭރިއާގައި ހިމެނޭ އަތޮޅުތަކުގެ ރައްޔިތުންނަށް އެތަކެއް ފަސޭހަތަކެއް ލިބިގެންދާނެ ކަމަށެވެ. މީގެ އިތުރުން ފަޔަރ ސްޓޭޝަން ޤާއިމް ކުރުމުގެ މަސައްކަތުގައި އެމްއެންޑީއެފް ސަދަން އޭރިއާގެ ސިފައިން ކޮށްފައިވާ ބުުރަ މަސައްކަތް ފާހަގަކުރައްވައި ސިފައިންނަށް ވަނީ ޝުކުރު އަދާކުރައްވާފައެވެ.
ގދ. ތިނަދޫގައި އިމާރާތްކުރި އެމްއެންޑީއެފް ފަޔަރ އެންޑް ރެސްކިއު ސަރވިސްގެ ފަޔާސްޓޭޝަންގެ އައު އިމާރާތް ހުޅުވުމުގެ ގޮތުން ބޭއްވި ރަސްމިއްޔާތުގައި އެމްއެންޑީއެފް ސަދަން އޭރިއާ ކޮމާންޑަރ ކާނަލް ޢަބްދުﷲ އިބްރާހީމާއި އެމްއެންޑީއެފް ފަޔަރ އެންޑް ރެސްކިއު ސަރވިސްގެ ކޮމާންޑަރ ކާނަލް ޢަބްދުﷲ ޒުހުރީ އާއި އެހެނިހެން ރޭންކުތަކުގެ ސިފައިން ބައިވެރިވެލެއްވިއެވެ.
