"ފަޔަރ ޕްރިވެންޝަން ވީކް 2017" ހޮނިހިރު ދުވަހު ފަށަނީ
މިމަހުގެ 21 ވަނަ ދުވަހު މާލޭ ބަނޑޭރިކޮށި ސަރަހައްދުގައި، 22 ވަނަ ދުވަހު ވިލިމާލެ ބޯޅަ ދަނޑުގައި
އެމްއެންޑީއެފްގެ ފަޔަރ އެންޑް ރެސްކިއު ހަރަކާތްތަކެއް ދައްކާލަނީ
އެމްއެންޑީއެފް ފަޔަރ އެންޑް ރެސްކިއު ސާވިސްއިން ކުރިއަށްގެންދާ "ފަޔަރ ޕްރިވެންޝަން ވީކް 2017" ހޮނިހިރު ދުވަހު ފެށުމަށް ނިންމައިފި އެވެ.
އެމްއެންޑީއެފުން ބުނީ ފަޔަރ އެންޑް ރެސްކިއު ސަރވިސްއިން ހިންގާ މި ޕްރޮގްރާމްގެ މަގްސަދަކީ ބަރަކާތްތެރި ރަމަޟާންމަހު ބަދިގޭގައި ހިނގާފާނެ އަލިފާނުގެ ހާދިސާތަކުން ރައްކާތެރިވުމުގެ ގޮތުން އާންމު ރައްޔިތުން ހޭލުންތެރިކުރުވުމަށް ހިންގާ ހަރާކާތެއް ކަމަށެވެ.
ހޮނިހިރު ދުވަހުން ފެށިގެން މެއި މަހުގެ 25 ވަނަ ދުވަހުގެ ނިޔަލަށް ކުރިއަށް ގެންދިއުމަށް ހަމަޖެހިފައިވާ މި ޕްރޮގްރާމް ފެށުމަށް ހަމަޖެހިފައި ވަނީ ހޮނިހިރު ދުވަހުގެ ހަވީރު ކ.ތުލުސްދޫ ހިއްކި ބިން ސަރަހައްދުގައި ކަމަށް އެމްއެންޑީއެފުން ބުނެއެވެ. މީގެ އިތުރުން މާލެ އާއި ވިލިމާލޭގެ އަދި ހުޅުމާލޭގައި މި ޕްރޮގްރާމް ކުރިއަށް ގެންދާނެ އެވެ.
އެމްއެންޑީއެފުން ބުނި ގޮތުގައި، މާލޭގެ ބަނޑޭރިކޮށި ސަރަހައްދުގައި މިމަހުގެ 21 ވަނަ ދުވަހު މިޕްރޮގްރާމް ހިންގުމަށް ހަމަޖެހިފައިވާއިރު، މިމަހުގެ 23 ވަނަ ދުވަހު މި ޕްރޮގްރާމް ހިންގުމަށް ހަމަޖެހިފައި ވަނީ މާލޭ އާޓިފިޝަލް ބީޗް ސަރަހައްދުގައެވެ. އަދި މިމަހުގެ 25 ވަނަ ދުވަހު މި ޕްރޮގްރާމް ހިންގުމަށް ހަމަޖެހިފައިވަނީ މާލޭ ނޯތު ހާބަރު ސަރަހައްދުގައި ކަމަށްވެސް އެމްއެންޑީއެފުން ބުނެއެވެ.
މީގެ އިތުރުން، ވިލިމާލޭގެ ފުޓްބޯޅަ ދަނޑުގައި މި ޕްރޮގްރާމް މިމަހުގެ 22 ވަނަ ދުވަހު ހިންގުމަށް ވަނީ ހަމަޖެހިފައިފައެވެ. އަދި، މިމަހުގެ 24 ވަނަ ދުވަހު ހުޅުމާލޭގައި މި ޕްރޮގްރާމް ހިންގުމަށް ހަމަޖެހިފައި ވަނީ ހުޅުމާލޭ ބަސް ސްޓޮޕް ސަރަހައްދުގައި ކަމަށްވެސް އެމްއެންޑީއެފުން ބުނެއެވެ.
އެމްއެންޑީއެފުން ބުނީ ފަޔަރ ޕްރިވެންޝަން ވީކްގައި، ކައްކާ ގޭހުން ދިމާވެދާނެ ހާދިސާތަކުން ސަލާމަތްވުމަށާއި، އަދި ބަދިގޭގައި ހިނގާފާނެ އަލިފާނުގެ ހާދިސާއަކުން ރައްކާތެރިވުމާއި ބެހޭ މައުލޫމާތު ދިނުމަށް ހަމަޖެހިފައިވާ ކަމަށެވެ. މީގެ އިތުރުން އަލިފާނުގެ ހާދިސާއެއް ހިނގައިފިނަމަ އަމަލުކުރާނެ ގޮތްތަކާއި، އަލިފާންނިވި ބޭނުންކުރާނެ ގޮތްތައް ދަސްކޮށްދެވޭނެ ކަމަށް ވެސް އެމްއެންޑީއެފުން ބުނެއެވެ.
ފާއިތުވި އަހަރުތަކުގައި ރަމަޟާން މަހަށް އަމާޒުކޮށްގެން އެމްއެންޑީއެފް ފަޔަރ އެންޑް ރެސްކިއު ސަރވިސްއިން ބޭއްވި ފަޔަރ ޕްރޮވެންޝަން ވީކަށް އާންމުގެ ވަރަށްބޮޑު ތަރުޙީބެއް ލިބިފައިވާ ކަމަށް އެމްއެންޑީއެފުން ބުނެއެވެ.
