ޚަޝޯގީގެ މަރާ ގުޅޭ ރެކޯޑިން ގައުމުތަކަށް ދީފި

ނޫސްވެރިޔާ ޖަމާލް ޚަޝޯގީގެ މަރުގެ މައްސަލައާ ގުޅޭ އޯޑިއޯ ރެކޯޑިންގ ސައުދީ އާއި އެމެރިކާގެ އިތުރުން ބައެއް އެހެން ގައުމުތަކާ ހަވާލުކޮށްފި ކަމަށް ތުރުކީގެ ރައީސް ރަޖަބް ތައްޔިބު އޮރްދޮޣާން ހޮނިހިރު ދުވަހު ވިދާޅުވެއްޖެއެވެ.

މިއީ ތުރުކީން ރަސްމީކޮށް މިފަދަ އޯޑިއޯ އެއް އޮތް ކަމަށް ރަސްމީކޮށް އެއްބަސްވި ފުރަތަމަ ފަހަރަވެ.

ޚަޝޯގީ މަރާލި ވަގުތުގެ އޯޑިއޯ ރެކޯޑިންގ އެއް ތުރުކީގެ އިދާރާތަކުގައި އޮތްކަމަށް އެ ގައުމުގެ މަސްދަރުތަކުން ވަނީ ބުނެފައެވެ. ނަމަވެސް އެފަދަ ރެކޯޑިންގ އެއް އޮތްކަމެއް ރަސްމީކޮށް ކުރިން ކަށަވަރުކޮށް ދީފައެއް ނުވެ އެވެ.

ތުރުކީގައި ހުންނަ ސައުދީ އަރަބިއްޔާގެ ކޮންސިއުލޭޓްގެ ތެރޭގައި ޚަޝޯގީ މަރާލި ވަގުތު ރެކޯޑް ކުރެވިފައިވާ އޯޑިއޯ ސައުދީ އާއި އެމެރިކާގެ އިތުރުން ޖަރުމަން، ފްރާންސް އަދި އިނގިރޭސި ވިލާތާ، ތުރުކީން ވަނީ ހިއްސާކޮށްފަ އެވެ.

ފުރަތަމަ ބޮޑު ހަނގުރާމަ ނިމުނުތާ 100 އަހަރު ފުރުން ފާހަގަކުރުމަށް ފްރާންސްގައި ބާއްވާ ހަފްލާތަކަށް ފުރާ ވަޑައިގެންނެވުމުގެ ކުރިން އޮރްދޮޣާން ވިދާޅުވީ އޮކްޓޯބަރު މަހުގެ ދެވަނަ ދުވަހު ޚަޝޯގީ މަރާލުމުގެ ކުރިން އެގައުމަށް ދަތުރުކުރި 15 މީހުންގެ ތެރޭގައި ޚަޝޯގީ މަރާލި މީހާ ވާކަން ސައުުދީއަށް އެނގޭކަމަށެވެ.

"އަޅުގަނޑުމެން ޓޭޕްތައް ދީފިން. އަޅުގަނޑުމެން ޓޭޕްތައް ދިނީ ސައުދީ އަރަބިއާ، އެމެރިކާ، ޖަރުމަނު، ފްރާންސް، އަދި އިނގިރޭސިވިލާތަށް. އެ ހުރިހާ ފަރާތަކުން ވެސް އޭގައި ހުރި ވާހަކަތައް އަޑުއަހައިފި،" އޮރްދޮޣާން ވިދާޅުވިއެވެ.

ބައެއް މަސްދަރުތަކާ ހަވާލާދީ ހޮނިހިރު ދުވަހު އަލްޖަޒިރާ އިން ބުނެފައިވާ ގޮތުގައި ޚަޝޯގީގެ ހަށިގަނޑު ހޯދުމުގެ މަސައްކަތް ތުރުކީގެ ފުލުހުން މިހާރު ވަނީ ހުއްޓާލާފައެވެ. ނަމަވެސް އުމުރުން 59 އަހަރުގެ ނޫސްވެރިޔާގެ މަރުގެ މައްސަލައިގައި ކުރަމުންދާ ޖިނާއީ ތަހުގީގު އަދިވެސް ކުރިޔަށް ގެންދާނެއެވެ.

ޚަޝޯގީ ދިރިހުއްޓައި އެންމެ ފަހުން ފެނިފައި ވަނީ ސައުދީ ކޮންސިއުލޭޓަށް ލިއުމެއް ބަލާ އޮކްޓޯބަރު މަހުގެ ދެ ވަނަ ދުވަހު ދަނިކޮށެވެ. އޭގެ ފަހުން އޭނާގެ ޚަބަރެއް ވެފައި ނުވާއިރު އޭނާ މަރާލާފައިވާ ކަމަށް ތުރުކީން ބުނަމުންދާތާ އެތައް ދުވަހެއްފަހުން ސައުދީ އިން އެކަމަށް އެއްބަސްވެފައި ވަނީ އޮކްޓޯބަރު މަހުގެ 20 ވަނަ ދުވަހުއެވެ.

ވޮޝިންގޓަން ޕޯސްޓްގައި ސައުދީގެ ޝާހީ އާއިލާ އާއި ވެރިކަމަށް ފާޑުކިޔައި ލިއުންތައް ޝާއިއު ކުރަމުން ގެންދާ ޚަޝޯގީ މަރާލާފައިވާ ކަމަށް ސައުދީން އެއްބަސްވި ނަމަވެސް އެ މައްސަލައިގައި އެ ގައުމުގެ ވަލީ އަހްމަދު މުހައްމަދު ބިން ސަލްމާންގެ އަތެއް ނުވާ ކަމަށް ބުނެފައިވެ އެވެ.