މެލްބަރންގައި ވަޅި ހަރައި ކާރެއް ރޯކޮށްލި މައްސަލައިގައި މީހަކު ހައްޔަރުކޮށްފި

އޮސްޓްރޭލިއާގެ މެލްބަރންގައި ތިން މީހެއްގެ ގަޔައް ވަޅި ހަރައި، ކާރެއްގައި ރޯކޮށްލި މައްސަލައެއްގައި މީހަކު ހައްޔަރުކޮށްފިއެވެ.

މި ހާދިސާ ހިނގިތާ ކުޑަ އިރުކޮޅެއްގެ ތެރޭގައި ފުލުހުން އެތަނަށް ހާޒިރުވެފައިވާއިރު، ކާރުގައި ރޯކޮށްލުމަށް ފަހު މިމީހާ ހުރީ ވަޅިހިފައިގެން މީހަކަށް ބިރުދައްކަން ކަމުގައި ރިޕޯރޓުތައް ބުނެއެވެ. މި ހާދިސާގައި އަނިޔާ ލިބުނު ތިން މީހުން ވަގުތުން ހޮސްޕިޓަލަށް ގެންގޮސްފައިވާއިރު މީގެ ތެރެއިން އެކެއްގެ ހާލު ސީރިއަސް ކަމުގައި ފުލުހުން ބުނެފައި ވެއެވެ.

މި ހާދިސާ ހިނގާފައިވަނީ ގިނަ ބަޔަކު އެއްވެ އުޅޭ މަގެއް ކަމުގައިވާ ބޯރކް ސްޓްރީޓްގައެވެ. ފުލުހުން އެތަނަށް ހާޒިރުވުމާ އެކު ވަޅި ހިފައިގެން ބިރު ދައްކަމުންދިޔަ މީހާ އާއި ފުލުހުންނާ ދެމެދު ކުރިމަތިލުންތަކެއް ހިނގާފައި ވެއެވެ. އެގޮތުން އޭނާ ހުއްޓުވަން ފުލުހުން މަސައްކަތްކުރާ ވީޑިއޯއެއް އާންމުވެފައިވާއިރު ފުލުހުން ވަނީ ހަމަލާދިން މީހާ ގަޔައް ބަޑިޖަހައި ވަގުތުން ހައްޔަރުކޮށްފައެވެ.

މި ހާދިސާގައި ފުލުހުންގެ ކިބައިން ފެނުނު ހިތްވަރަށް އެތައް ބަޔަކު މީސް މީޑިއާގައި ތައުރީފުކުރަމުން ދާއިރު، ކުޑަ ވަގުތުކޮޅެއްގެ ތެރޭގައި ފުލުހުން ހާޒިރުވެ ކަންކަން ހަމައަކަށް އަޅުވާފައިވާތީ ގިނަ ބަޔަކު އެ ކަމަށް ވެސް ޝުކުރު އަދާކޮށްފައި ވެއެވެ.

ބޯރކް ސްޓްރީޓްގައި މިފަދަ ކުށްތައް ކުރާ މިންވަރު އިތުރުވެފައި ވާއިރު، މި ހާދިސާ ހިނގާފައި މިވަނީ މިދިޔަ އަހަރު ޖޭމްސް ގާރގަސޯލަސް ކިޔާ މީހަކު މަސްތުގެ ހާލަތުގައި ހުރެ މަގުމަތިން ދިޔަ މީހުންތަކެއްގެ ގައިގައި ކާރުން ޖައްސައި އެތައް ބަޔަކަށް ބޮޑެތި އަނިޔާތަކެއް ދިން މައްސަލައިގެ އަޑުއެހުންތައް ކުރިޔައްދާ ދަނޑިވަޅެއްގައެވެ.