މިއުނިކްގައި ވަޅި ޖެހުމުގެ މައްސަލާގައި މީހަކު ހައްޔަރުކޮށްފި
21 އޮކްޓޯބަރު 2017 | ހޮނިހިރު 23:03ވަޅިން ހަމަލާދީ ހަތަރު މީހަކު ޒަޚަމްކޮށްލާފައިވޭ
މިއުނިކްގައި ވަޅިން ހަމަލާދިން ސަރަޙައްދު ބަންދުކޮށް، ފުލުހުން ހަރަކާތްތެރިވަނީ
ޖަރުމަނުވިލާތުގެ މިއުނިކްގައި ވަޅިން ހަމަލާދީ ހަތަރު މީހަކު ޒަޚަމްކޮށްލި މައްސަލައިގެ ތުހުމަތުގައި މީހަކު ހައްޔަރުކޮށްފި އެވެ.
ޖަރުމަނުގެ ފުލުހުންނާއި ހަވާލާދީ ބީބީސީން ވަނީ، މިއުނިކްގެ އިރުމަތީގެ ރޮސެންހެއިމަރ ޕްލާޓްޒްގައި ހިނގި މިހާދިސާގައި ފަސް ފިރިހެނަކާއި އަންހެނަކަށް ހަމަލާ ދިނުމަށް އެމީހާ މަސައްކަތް ކުރި ކަމަށާއި، އެހެންނަމަވެސް އެހަމަލާއިން ދެމީހަކު ސަލާމަތްވެފައިވާ ކަމަށް ރިޕޯޓް ކޮށްފައެވެ.
ފުލުހުންގެ ތަރުޖަމާނަކު ވަނީ، އެހާދިސާ ހިނގި ސަރަޙައްދުން މަންޒަރު ދުށް ފަރާތްތަކުން ކިޔައިދިން ސިފަތަކާއި ވަރަށް ބޮޑަށް ގާތް ކުރާ މީހަކު ހައްޔަރު ކުރެވިފައިވާ ކަމަށް ބުނެފަ އެވެ.
މިއުނިކްގައި ވަޅިން ހަމަލާ ދީފައިވަނީ، ހޮނިހިރު ދުވަހު ޖަރުމަނު ގަޑިން ހެނދުނު ހައެއް ޖެހިތަނާ އެވެ. އަދި ހަމަލާ ދިނުމަށްފަހު އެމީހާ ބައިސްކަލެއްގައި، އެސަރަޙައްދު ދޫކޮށް ފިލާފައިވާ ކަމަށް ފުލުހުން ބުނެއެވެ.
މިއުނިކް ފުލުހުންގެ ތަރުޖަމާނު މާކަސް ޑަ ގްލޯރިއާ މާޓިންސް ވިދާޅުވީ، ފުލުހުން ހައްޔަރު ކޮށްފައިވަނީ ހަމަލާ ދިން ސަރަޙައްދުގައި ތިބި މަންޒަރު ދުށް ފަރާތްތަކުން ކިޔައިދިން ސިފަތަކާއި ދާދި އެއް ގޮތް ސިފަތަކެއް ހުރި މީހަކު ކަމަށާއި، ނަމަވެސް އެއީ ހަމަލާ ދިން ފަރާތްކަން އަދި ކަށަވަރު ނުކުރެވޭ ކަމަށެވެ.
އަދި މިހަމަލާގެ މަޤްސަދު ފުލުހުންނަށް އަދި ކަށަވަރު ވެފައިނުވާ ކަމަށް އެކަމަނާ ވިދާޅުވި އެވެ.
މިހަމަލާގައި ޒަޚަމްވި މީހުންގެ ހާލު ސީރިއަސް ނޫން ކަމަށް ރިޕޯޓްތައް ބުނެ އެވެ.
