ވަޅިޖެހުމުގެ ހާދިސާއެއްގައި ޗައިނާގެ ހަތް ދަރިވަރުން މަރުވެއްޖެ
12 ދަރިވަރުން ޒަޚަމްވި
ޗައިނާގެ މެޕް
ޗައިނާގެ އުތުރުގައި އޮންނަ ޝާންޝި ޕްރޮވިންސް ސުކޫލެއްގެ ބޭރުގައި ހިނގި ވަޅިޖެހުމުގެ ހާދިސާއެއްގައި ޗައިނާގެ ހަތް ދަރިވަރުން މަރުވެ 12 ދަރިވަރަކު ޒަޚަމް ވެއްޖެއެވެ.
މި ހާދިސާ ހިނގައިފައި ވަނީ ސުކޫލުން ނިމިގެން އެކުދިން ގެޔަށް ދިޔަ މަގުމަތީގައެވެ.
މި ގަތުލުއާންމު ހިންގި ކަމަށް ތުހުމަތު ކުރެވޭމީހާ މިހާރު ވަނީ ފުލުހުންގެ ބެލުމުގެ ދަށަށް ގެންގޮސް އޭނާގެ ވަނަވަރު އާންމުންނާ ހިއްސާ ކޮއްފައެވެ. ފުލުހުން މައުލޫމާތު ދިން ގޮތުގައި ޗައޯ ކިޔާ މި މީހާ އަކީ އެ ސްކޫލް ގެ ކުރީގެ ދަރިވަރެކެވެ.
ފުލުހުންނާ ހަވާލާދީ ބީބީސީން ރިޕޯޓްކޮށްފައިވާ ގޮތުގައި، މިކަން ހިނގުމަށް މެދުވެރިވި ސަބަބެއްކަމަށް ބެލެވެނީ އޭނަ ސްކޫލްގައި ކިޔެވި ދުވަސްވަރު ބުލީ ކޮއްފައިވާތީ އެކަމުގެ ބަދަލު ހިފުމުގެ ގޮތުންނެވެ.
މި ހާދިސާގައި މަރުވެފައިވަނީ ފަސް އަންހެން ދަރިވަރުންނާއި ދެ ފިރިހެން ދަރިވަރުންނެވެ. މިހާދިސާ ހިނގައި ފައި ވަނީ ޗައިނާ ގަޑިން 18:10 ގައެވެ. އަނިޔާވި ކުދިންނަށް ހޮސްޕިޓަލްގައި ދަނީ ފަރުވާ ދެމުންނެވެ.
