ޕޮލެންޑުގެ ޝޮޕިން މޯލެއްގައި ވަޅިން ހަމަލާދީ އެކަކު މަރާލާ ހަތް މީހަކު ޒަޚަމްކޮށްލައިފި
ހާދިސާ ހިނގީ ޕޮލެންޑުގެ ސްޓަލޮވާ ވޮލާ ސިޓީގެ ވިވޯ ޝޮޕިން މޯލުގައި
ހާދިސާ ހިނގި ޝޮޕިން މޯލް
ޕޮލެންޑުގެ ޝޮޕިން މޯލެއްގައި ވަޅިން ހަމަލާދީ އެކަކު މަރާލައި އިތުރު ހަތް މީހަކު ޒަޚަމްކޮށްލައިފިއެވެ.
މި ހަމަލާ ދިނީ ވަކި މީހެއް ނުބަލާ ފަހަތުން އައިސް އެކި މީހުންގެ ބުރަކަށްޓަށް ކަމަށް ރިޕޯޓުތައް ބުނެއެވެ.
ޕޮލެންޑުގެ ސްޓަލޮވާ ވޮލާ ސިޓީގެ ވިވޯ ޝޮޕިން މޯލުގައި ހިނގި މިހާދިސާގައި ހަމަލާ ދިން މީހާއަކީ އުމުރުން 27 އަހަރުގެ ފިރިހެނެކެވެ. ގިނަ ބަޔަކު އޭނާ ހުއްޓުވަން ވެސް މަސައްކަތް ކުރިއެވެ. ކޮންރަޑް ކޭ ނަމަަކަށް ކިޔާ މި މީހާ ހަމަލާ ދޭން ފެށިތާ މާގިނަ އިރުތަކެއް ނުވެ ފުލުހުން ވަނީ ހައްޔަރުކޮށްފައެވެ.
ވަޅިން ހަމަލާ ދިނުމުގެ ސަބަބުން މަރުވެފައި ވަނީ އުމުރުން 50 އަހަރުގެ އަންހެނެކެވެ.
ހާދިސާ ގައި ޒަޚަމްވި އެންމެންނަކީ ވެސް ސީރިއަސް ޒަޚަމްތަކެއް ލިބުނު މީހުން ކަމަށް ރިޕޯޓުތައް ބުނެއެވެ.
