އިލެކްޝަންސް ކޮމިޝަންގައި މިހާރު ތިއްބެވި ބޭފުޅުންނާއި އެކު މަޖިލިސްގެ އިންތިޚާބު ބާއްވަން "ހެޔޮ ނުވާނެ" ކަމަށް ޕީޕީއެމްގެ ޕާލިމެންޓްރީ ގްރޫޕްގައި ހިމެނިވަޑައިގަންނަވާ، ރައްޔިތުންގެ މަޖިލީހުގެ ފޮނަދޫ ދާއިރާގެ މެންބަރު އަބްދުއްރަހީމް އަބްދުﷲ ވިދާޅުވެއްޖެއެވެ.
ޕީޕީއެމުން ބޭއްވި ނޫސްވެރިންގެ ބައްދަލުވުމެއްގައި އަބްދުއްރަހީމް ވިދާޅުވީ އިލެކްޝަންސް ކޮމިޝަނުން ދައްކާ ވާހަކަތައް ޤަބޫލު ނުކުރައްވާކަމަށެވެ.
"އަޅުގަނޑުމެންނަކަށް ނޭނގޭ އިލެކްޝަންސް ކަމިޝަނުން ދެއްކި ކަރުދާހަކީ 1978 ވަނަ އަހަރުގެ ކަރުދާހެއް ކަމެއް. 2004 ވަނަ އަހަރުގެ ކަރުދާހެއް ކަމެއް. ނުވަތަ 2003 ވަނަ އަހަރުގެ ކަރުދާހުގެ ނޫން ކަމެއް. އެއީ ޝަރީފް ދައްކާ ވާހަކަ ގަބޫލު ނުކުރެވޭތީ" އަބްދުއްރަހީމް ވިދާޅުވިއެވެ.
އަބްދުއްރަހީމް ވިދާޅުވީ އިންތިޚާބާއި ގުޅިގެން ޕީޕީއެމުން މައްސަލައެއް ހުށަހަޅާފައިވަނިކޮށް އިލެކްޝަންސް ކަމިޝަނުން ވޯޓު ކަރުދާސްތައް ނައްތާލުމަކީ ހެކި ނައްތާލަން ކުރި ކަމެއް ކަމަށެވެ. އަދި އެ ކަރުދާސް ހުންނަނީ އީސީއާއި ފުލުހުންގެ ބެލުމުގެ ދަށުގައި ކަމަށްވާއިރު ކަރުދާސް ނައްތާލި ސަބަބު ފުލުހުން ހާމަ ކުރަންޖެހޭނެކަމަށް އަބްދުއްރަހީމް ވިދާޅުވިއެވެ.
