އައްޑޫ ސިޓީގެ އިކްއެޓޯރިއަލް ކޮންވެންޝަން ސެންޓަރު ރޫޅާލައި އެތަނުގައި ހޮސްޕިޓަލެއް އެޅުމަކީ މީހުން ކުރާ ޒާތުގެ ކަމެއް ނޫން ކަމަށް ވިދާޅުވެ ރައީސް ނަޝީދު ކަންބޮޑުވުން ފާޅުކުރައްވައިފިއެވެ.

ރައީސް ނަޝީދު މި މޭރުމުން އެކަން ހިއްސާ ކުރެއްވީ ކޮންވެންޝަން ސެންޓަރު ރޫޅާލައި އެތަނުގައި އަޅަމުންދާ ހޮސްޕިޓަލް ބައްލަވާލެއްވުމަށް ފަހު އެމަނިކުފާނުގެ އަރިހުގައި ވަޑައިގެންނެވި ބޭފުޅުންނާ ވާހަކަ ދައްކަވަމުންނެވެ.

އައްޑޫ ސިޓީއަށް މިހާރު ކުރައްވަމުން ގެންދަވާ ދަތުރުފުޅުގައި އައްޑޫގެ ކޮންވެންޝަން ސެންޓަރުގައި މިހާރު ގާއިމްކުރާ ޓާޝަރީ ހޮސްޕިޓަލްގެ މަސައްކަތް ރައީސް ނަޝީދު ބައްލަވާލެއްވުމަށް ވަޑައިގެންނެވީ ބުދަ ދުވަހުގެ ހެނދުނުގެ ވަގުތެއްގައެވެ.

އެަމަނިކުފާ ވަނީ އެތަނުގެ މަސައްކަތް ބައްލަވާ ލެއްވުމުގެ އިތުރުން އެތަނުގެ މަސައްކަތް ކުރަމުންދާ ފަރާތްތަކާ ވާހަކަ ދައްކަވައިގެން މައުލޫމާތު ސާފު ކުރައްވާފައެވެ. އަދި އެތަން ހޮސްޕިޓަލަކަށް ހެދުމުގެ ކުރެހުންތައް ވެސް ބައްލަވާ ލައްވާ މައުލޫމާތު އޮޅުން ފިލުއްވިއެވެ.

މީގެ އިތުރުން އެކުރެހުންތަކުގެ އަސްލު ކޮޕީ ހޯއްދަވައި ދެއްވުމަށާއި މިމަހު 17 ގައި އުފެދޭ ސަރުކާރުން އެކަންކަން ބައްލަވަން ބޭނުންފުޅުވާ ކަމަށް ރައީސް ނަޝީދު ވިދާޅުވިއެވެ.

އެ މަސައްކަތް ބައްލަވާ ލެއްވުމުގެ ތެރޭގައި އެމަނިކުފާނު ވަނީ ސަރުކާރުގެ ޚަރަދުގައި އެހާ ބޮޑު ހޭދައެއް ކުރައްވާފައި ވަނިކޮށް އެތަކެތި މުޅިން ރޫޅާލައި އެތަން ހޮސްޕިޓަލަކަށް ހައްދަވާތީ ހިތާމަ ކުރައްވާ ކަމަށް އަރިހުގައި ވަޑައިގެންނެވި ބޭފުޅުނގެ ގާތުގައި ވިދާޅުވެފައެވެ. އަދި އެއީކީ މީހުން ކުރާ ޒާތުގެ ކަންކަން ނޫން ކަމށާއި ހޮސްޕިޓަލް އެޅުމުގެ ޚަރަދުގެ ބޮޑުބައެއް ސަލާމަތްވެ އެފަދަ ކަމަކަށް ބޭނުންވާ ވަރުގެ އިމާރާތެއް މުޅިން އެހެންތަނެއްގައި އެޅުއްވި ނަމަ ލިބުނީސް ކަމަށް ރައީސް ނަޝީދު ވިދާޅުވިއެވެ.

އެމަނިކުފާނާ އެކު ކުރީގެ ބައެއް ވަޒީރުންނާއި ރައްޔިތުންގެ މަޖިލީހުގެ ބައެއް މެމްބަރުން އަދި އެމްޑީޕީގެ އިސް ބައެއް ވެރިންނާއި އައްޑޫ ސިޓީ ކައުންސިލް މެމްބަރުން އެތަން ބައްލަވާލެއްވިއެވެ.

ރައީސް ނަޝީދު ވަނީ ކޮންވެންޝަން ސެންޓަރުގައި އަޅާ ހޮސްޕިޓަލުގެ މަސައްކަތް ނުހުއްޓުވާނެ ކަމަށާއި އެކަން ކުރުމަށް އެއްބާރުލުން ދެއްވާނެ ކަމަށް ވިދާޅުވެފައެވެ. އަދި އާސަރުކާރުން އިތުރަށް ކުރައްވާނެ ކަމަކީ އެތަން އިތުރަށް ރަނގަޅު ކުރުމަށްޓަކައި ކުރަންޖެހޭ ކަންކަން ކުރެއްވުން ކަމަށް ވެސް ފޭދޫ ރައްޔިތުންނާ ވާހަކަ ދައްކަވަމުން އަންގާރަ ދުވަހު އެމަނިކުފާނު ވަނީ ވިދާޅުވެފައެވެ.

ރައީސް ނަޝީދުގެ އިތުރުން ކޮންވެންޝަން ސެންޓަރުގައި އަޅާ ހޮސްޕިޓަލް ބައްލަވާލެއްވި އެހެން ބޭފުޅުން ވެސް ވަނީ ކަންބޮޑުވުން ފާޅު ކުރައްވާފައެވެ.