ވޯޓު ކަރުދާސްތައް ނައްތާލި ގޮތާ ގުޅޭ ގޮތުން ޝަރީފްއާ ފުލުހުން ސުވާލު ކޮށްފި
6 ނޮވެމްބަރު 2018 | އަންގާރަ 13:48ހާޒިރުކޮށްފައިވަނީ ތަހްގީގުކުރާ މައްސަލައަކާ ގުޅިގެނެއް ނޫން
ލެކްޝަންސް ކޮމިޝަނުގެ ރައީސް އަހްމަދު ޝަރީފު: -އޭނާ މިއަދު ވަނީ ފުލުސް އޮފީހަށް ހާޒިރުކޮށްފި
މިދިޔަ ރިޔާސީ އިންތިހާބުގައި ވޯޓު ކަރުދާސްތައް ނައްތާލި ގޮތާ ގުޅޭ ގޮތުން އިލެކްޝަންސް ކޮމިޝަނުގެ ރައީސް އަހްމަދު ޝަރީފު ފުލުސް އޮފީހަށް ހާޒިރުކޮށް ސުވާލުކޮށްފިއެވެ.
ޝަރީފު ފުލުސް އޮފީހަށް ހާޒިރުކުރީ އަންގާރަ ދުވަހުގެ ހަވީރެވެ. ޝަރީފުއާ އެކު ފުލުސް އޮފީހަށް ހާޒިރުވި އިލެކްޝަންސް ކޮމިޝަނުގެ ލީގަލް އޮފިސަރ ރިއްފަތު އަބްދުﷲ ވިދާޅުވީ ހަމައެކަނި ފުލުހުން އޮޅުން ފިލުވީ ވޯޓު ކަރުދާސްތައް ނައްތާލުމުގެ ކަންކަން ދިޔަ ގޮތާ ގުޅޭ ގޮތުން ކަމަށެވެ. އިތުރު އެއްވެސް ސުވާލެއް ނުކުރާ ކަމަށް އޭނާ ވިދާޅުވިއެވެ. އަދި ހާޒިރުކުރީ ފުުލުހުން ބަލަމުންދާ މައްސަލައަކާ ގުޅިގެން ނޫން ކަމަށް ވެސް އޭނާ ވިދާޅުވިއެވެ.
އިލެކްޝަންސް ކޮމިޝަނުން ރިޔާސީ އިންތިހާބުގެ ތެރޭގައި ޖިނާއީ ކަންކަން ހިންގާފައިވާ ކަމަށް ބުނެ އެކަންކަން ތަހްގީގު ކުރުމަށް ޕީޕީއެމް އިން ވަނީ ފުލުހުންނަށް ހުށައަޅާފައެވެ. އެހެން ނަމަވެސް އިލެކްޝަންސް ކޮމިޝަނުގެ ލީގަލް އޮފިސަރު ވިދާޅުވީ އެފަދަ އެއްވެސް މައުލޫމާތެއް ލިބިފައިނުވާ ކަމަށެވެ. އަދި އެފަދަ އެއްވެސް މައްސަލައަކާ ގުޅޭ ގޮތުން ސުވާލެއް ކޮށްފައިނުވާ ކަމަށާއި ހަމަ އެކަނި ސާފުކުރީ އަންގާރަ ދުވަހު އެ ކޮމިޝަނުން ބޭއްވި ޕްރެސް ކޮންފަރެންސްގައި ހާމަކުރި މައުލޫމާތާ ގުޅިގެން ކަމަށް ވިދާޅުވިއެވެ. އެ ޕްރެސް ކޮންފަރެންސްގައި ޝަރީފު ވިދާޅުވެފައި ވަނީ ރިޔާސީ އިންތިހާބުގައި ބޭނުން ކުރި ވޯޓު ކަރުދާސް ޝްރެޑްކޮށް، އަންދާލައިގެން ނައްތާލުމުގެ މަސައްކަތް އިލެކްޝަންސް ކޮމިޝަނުން ފަށާފައިވާ ކަމަށެވެ.
އޭނާ އިތުރަށް ވިދާޅުވެފައި ވަނީ ރިޔާސީ އިންތިހާބުގައި ބޭނުންކުރި ވޯޓު ކަރުދާސް ނައްތާނުލައި ބަހައްޓަންޖެހޭ ގާނޫނީ މުއްދަތު ފަހަނައަޅާފައިވާ ކަމަށެވެ. ވޭތުވެދިޔަ މުއްދަތުގައި އެ ތަކެތި ނައްތާނުލައި މަޑުކުރީ އިންތިހާބާ ބެހޭ ގޮތުން ސުޕްރީމް ކޯޓަށް މައްސަލައެއް ހުށަހެޅުމުން ކަމަށް ވަނީ ވިދާޅުވެފައެވެ.
ރިޔާސީ އިންތިހާބުގައި މަކަރުތަކެއް ހަދާފައިވާ ކަމަށް ބުނެ އިންތިހާބުން ނާކާމިޔާބީއާ ކުރިމަތިލާން ޖެހިވަޑައިގެންނެވި ރައީސް އަބްދުﷲ ޔާމިން ވަނީ އިންތިހާބު ބާތިލްކޮށްދޭން އެދި ސުޕްރީމް ކޯޓަށް ވެސް މައްސަލަ ހުށައަޅުއްވާފައި އެވެ. ނަމަވެސް ސުޕްރީމް ކޯޓުން އެ މައްސަލަ ރައީސް ޔާމިނާ ދެކޮޅަށް ނިންމީ އިންތިހާބު ބާތިލް ކުރަން ޖެހޭ އެއްވެސް ސަބަބެއް ދެއްކިފައިނުވާ ކަމަށް ނިންމައިއެވެ.
