ޕާޓީގެ ޓިކެޓް ދޭނެ ގޮތް ނިންމާނީ އެޕާޓީއަކުން: މަހުލޫފު
6 ނޮވެމްބަރު 2018 | އަންގާރަ 08:58މަޖިލީހުގެ އިންތިޚާބު ބޭއްވުމަށް ނިންމާފައި ވަނީ އަންނަ އަހަރުގެ މާޗް މަހު
އަހުމަދު މަހުލޫފު
ދާއިރާ ލިބޭ ޕާޓީގެ ޓިކެޓް ދޭނެ ގޮތް ނިންމާނީ އެ ކެންޑިޑޭޓެއް ވާދަކުރާ ޕާޓީއަކުން ކަމަށް ގަލޮޅު ދެކުނު ދާއިރާގެ މެމްބަރު އަހުމަދު މަހުލޫފު ވިދާޅުވެއްޖެއެވެ.
ގޮނޑި ނުގެއްލޭ ކަމަށް ސުޕްރީމް ކޯޓުން މިދިޔަ މަހުގެ ތެރޭގައި ކަނޑައަޅާފައިވާ 12 މެމްބަރުންނަށް ޕްރައިމަރީއަކާއި ނުލައި ޓިކެޓް ދޭން އުޅޭ މައްސަލާގައި ގިނަ ބައެއްގެ ފާޑު ކިއުންތައް އަމާޒުވެފައިވާ ދަނޑިވަޅެއްގައި މަހުލޫފު ކުރެއްވި ޓްވީޓެއްގައި ވިދާޅުވީ ރައްޔިތުންގެ މަޖިލީހުގެ އިންތިޚާބުގައި ކޯލިޝަނުން އެކުގައި ވާދަ ކުރަން ވަނީ ނިންމާފައި ކަމަށެވެ. އަދި ދާއިރާ ލިބޭ ޕާޓީގެ ޓިކެޓް ދޭނީ ޕްރައިމަރީއެއް ބާއްވާފަތޯ ނޫނީ ޕްރައިމަރީ އަކާނުލާތޯ ނިންމާނީ އެޕާޓީއަކުން ކަމަށާއި އެހުރިހާ ކަމަކަށް ބަލާ އިންސާފު ކުރުމަށްފަހު ބަސް ބުނާނީ ރައްޔިތުން ކަމަށް މަހުލޫފު ވިދާޅުވިއެވެ.
ރައީސް މައުމޫން ހޯމަ ދުވަހު ކުރެއްވި ޓްވީޓެއްގައި ވިދާޅުވީ 12 މެމްބަރުންނަށް އެއްވެސް ޕްރައިމަރީއަކާ ނުލައި 2019 ވަނަ އަހަރުގެ މަޖިލީހަށް ވާދަކުރެއްވުމުގެ ޓިކެޓް ލިބޭނެ ކަމަށެވެ.
އެހެން ނަމަވެސް ކުރީގެ ރައީސް މުހައްމަދު ނަޝީދު ކުރެއްވި ޓްވީޓުގައި ވިދާޅުވީ އެމްޑީޕީން މަޖިލީހުގެ އިންތިޚާބަށް ޓިކެޓް ދޭން ފެންނަނީ ޕްރައިމަރީން ކަމަށެވެ.
ރައްޔިތުންގެ މަޖިލީހުގެ އިންތިޚާބު ބޭއްވުމަށް ނިންމާފައި ވަނީ އަންނަ އަހަރުގެ މާޗް މަހުއެވެ.
