މަހިންދަ ރާޖަޕަކްސައަކީ ސްރީ ލަންކާގެ ބޮޑުވަޒީރުކަމުގައި ބަލައިގަތުމަށް ސްރީލަންކާގެ ގާނޫނު ހަދާ މަޖިލީހުގެ ރައީސް ކަރޫ ޖަޔަސޫރިޔާ އިންކާރު ކުރައްވައިފިއެވެ.
ހޯމަ ދުވަހު ކަރޫ ޖަޔަސޫރިޔާ ނެރުއްވި ބަޔާނެއްގައި ވިދާޅުވީ، ޕާލަމެންޓްގެ ތެރެއަށް ގެނެވުނު ބަދަލަކީ ނުވަތަ ބޮޑުވަޒީރުކަމުން ރަނިލް ވަކިކުރެއްވުމަކީ ޤާނޫނުއަސާސީއާ ޚިލާފް އަދި ޒަމާނުއްސުރެ ސްރީ ލަންކާގައި އަމަލު ކުރަމުން އައި ގޮތާ ޚިލާފަށް ކޮށްފައިވާ ކަމެއް ކަމަށް ގިނަ މެމްބަރުން ދެކެވަޑައިގަންނަވާ ކަމަށެވެ.
 225މެމްބަރުން ހިމެނޭ ޕާލަމެންޓްގައި ބޮޑު ވަޒީރުކަމުން ވަކިކުރެވުނު ރަނިލް ވިކްރަމަސިންހަގެ ޔުނައިޓެޑް ނޭޝަނަލް ޕާޓީގެ 106 މެމްބަރުން ކުރިން ތިއްބެވި ނަމަވެސް، އޭގެ ތެރެއިން އަށް މެމްބަރުން މިހާރުވަނީ ޕާޓީން ވަކިވެވަޑައިގެން މަހިންދަ ރާޖަޕަކްސަ އެކުލަވާލައްވަމުން ގެންދަވާ ކެބިނެޓްގެ މަގާމުތައް ގަބޫލުފުޅު ކުރައްވާފައެވެ.
މަހިންދަ ރާޖަޕްސައާއި، ރައީސް ސިރިސޭނާގެ ކޯލިޝަން ކަމަށްވާ ޔުނައިޓެޑް ޕީޕަލްސް ފްރީޑަމް އެލަޔަންސަށް ކުރިން ލިބިފައިވަނީ 95 ގޮނޑި ނަމަވެސް، ޔޫޢެންޕީން އައި އަށް މެމްބަރުންނާއި އަދި ތަމަޅަ ޕާޓީއެއްގެ މެމްބަރަކުވެސް އެ އިއްތިހާދާ ގުޅިފައިވުމުން ރާޖަޕަކްސައާއި، ސިރިސޭނާގެ އިއްތިހާދަށް ލިބިފައިވަނީ ގޮނޑީގެ މިހާރުގެ ކަށަވަރު އަދަދަކީ 104 އެކެވެ. ރިޕޯޓްތައް ބުނާ ގޮތުން ޕާލަމެންޓް ޖަލްސާތައް މިމަހުގެ 14 ވަނަ ދުވަހު ފަށާއިރު އެ އަދަދު އިތުރުވާނެއެވެ.
އަނެއްކޮޅުން، މަހިންދަ ރާޖަޕަކްސައަށް ތާއީދުކޮށް ކޮޅުނބުގެ މަގުތަކަށް ހޯމަދުވަހު އެތައްހާސް ބަޔަކު ނުކުމެ އަޑުއުފުލާފައި ވެއެވެ.