ހުޅުމާލޭގައި ކުޑަ އަންހެން ކުއްޖެއް ރޭޕް ކޮށްފި
5 ނޮވެމްބަރު 2018 | ހޯމަ 07:11ރޭޕް ކޮށްފައިވަނީ އުމުރުން 13 އަހަރުގެ އަންހެން ކުއްޖެއް
ހުޅުމާލޭގެ މަތިން ނަގާފައިވާ ފޮޓޯއެއް
ހުޅުމާލޭގައި ކުޑަ އަންހެން ކުއްޖެއް ރޭޕް ކުރި މައްސަލަ ފެންމަތިވެއްޖެއެވެ.
ބައެއް މިޑިއާތަކުން ރިޕޯޓު ކޮށްފައިވާ ގޮތުން އުމުރުން 13 އަހަރުގެ އަންހެން ކުއްޖަކު މިދިޔަ ހުކުރު ދުވަހުގެ ރޭ ވަނީ ރޭޕް ކޮށްފައެވެ.
މައުލޫމާތު ލިބޭ ގޮތުގައި އެ އަންހެން ކުއްޖާ ރޭޕު ކޮށްފައިވަނީ ދެފިރިހެނަކު ވެގެން ނެއިބަހުޑް އެކެއްގައި އެޗްޑީސީ އިމާރާތުގެ ފަހަތުގައި އޮންނަ ޕާކު ތެރޭގައެވެ. އެތަނަކީ ވަރަށް އަދިރިކޮށް އޮންނަ ސަރަހައްދެކެވެ.
މިއަންހެން ކުއްޖާ ރޭޕް ކުރި އެޗްޑީސީ އިމާރާތާއި ނެއިބަހުޑް އެކެއްގައި ހުންނަ ބޮޑު މިސްކިތާއި ދެމެދު އޮންނަ ޕާކު ތަރައްގީ ކުރުމަށް ޕާކުގެ ބައެއް ހިސާބުތައް ޓިނު ޖަހާ ވަނީ ބަންދު ވެސް ކޮށްފައެވެ.
އެ މައްސަލަ ފުލުހުންނަށް ހުށަހަޅާފައިވާތީ ސީރިއެސް މައްސަލައެއް ގޮތުގައި ފުލުހުން ތަހުގީގު ކުރަމުންދާކަމުގެ މައުލޫމާތު ވެސް ލިބެއެވެ. ނަމަވެސް މިމައްސަލައާ ބެހޭ ގޮތުން ފުލުހުންގެ ބަހެއް އަދިވަނީ ލިބޭ ގޮތް ނުވެފައެވެ.
އުމުރުން 13 އަހަރުގެ ކުއްޖެއް ރޭޕް ކޮށްފައިވާއިރު، މިކަން ކުރި ބަޔަކު ހާމަކޮށް، އިންސާފު ހޯދައިދިނުމަށް ގޮވާލައި އާންމުގެ ގިނަ ބަޔަކު އަންނަނީ ސޯޝަލް މީޑިއާގައި ޝުއޫރުފާޅު ކުރަމުންނެވެ. އަދި މިފަދަ މައްސަލަތަކަކީ ސިއްރު ކޮށްގެންވާނެ މައްސަލަތައް ނޫން ކަމަށް އެމީހުންބުނެއެވެ. މިފަހަކަށް އައިސް ރާއްޖޭގައި އަންނަނީ ރޭޕްކުރުމުގެ މައްސަލަތައް ފެންމަތިވަމުންނެވެ.
