ނިއު ކެެލިޑޯނިއާއިން ފްރާންސްގެ އަތްދަށުން މިނިވަންވާން ބޭނުމެއް ނުވި

ފްރާންސްގެ އަތްދަށުން މިނިވަންވެ ފުރިހަމަ މިނިވަން ގައުމެއްގެ ގޮތުގައި އޮތުމަށް ބޭނުންނުވާކަމަށް ޕެސިފިކްގެ ގައުމެއް ކަމަށްވާ ނިއު ކެލިޑޯނިއާގެ ރައްޔިތުން ބުނެފިއެވެ.

މިނިވަން ގައުމެއްގެ ގޮތުގައި އޮތުމާމެދު އާދީއްތަ ދުވަހުނެގި ރައްޔިތުންގެ ފެންނަ ނުފެންނަ ވޯޓުގައި 56.4 އިންސައްތަ ރައްޔިތުން ބުނެފައިވަނީ މިިނިވަންކަމަށް ބޭނުން ނުވާކަމަށެވެ. މިނިވަން ގައުމަކަށްވުމަށް ބޭނުންވާކަމަށް ވޯޓް ދީފައިވަނީ 43.6 އިންސައްތަ މީހުންނެވެ.

މިއިންތިޚާބުގައި 174،000 މީހުންނަށް ވޯޓްލުމުގެ ހައްގު ލިބިގެންވެއެވެ.ވޯޓް ލުމުގެ ހައްގު ލިބިގެންވާ މީހުންގެ 81 އިންސައްތަ މީހުން މި އިންތިޚާބުގައި ވޯޓްލާފައިވެއެވެ.

ނިއު ކެލިޑޯނިއާގެ މިނިވަންކަމަށް ފެނޭތޯ ބެލުމަށް ވޯޓް ނެގި މިއީ ދެވަަނަ ފަހަރެވެ.

އެންމެ ފުރަތަމަ ވޯޓް 1987 ގައި ނަގާފައިވާއިރު ކަނަކް ދަރިކޮޅުވަނީ އެ ވޯޓް ބޮއިކޮޓްކޮށްފައެވެ. އޭގެ ނަތީޖާއަކަށް ވެގެން ދިޔައީ 98 އިންސައްތައަށް ވުރެ ބޮޑު އަޣުލަބިއްޔަތަކުން އެ ގައުމު ފްރާންސްގެ ދަށުގައި އޮތުމަށް ތާއީދު ލިބިގެންދިއުމެވެ.

ނިއު ކެލިޑޯނިއާގެ 279،000 މިހުންގެ އާބާދީގެ ތެރެއިން 27 އިންސައްތައަކީ ޔޫރަޕް ދަރިކޮޅުގެ މީހުން ކަމަށްވާއިރު ގިނައީ ފްރާންސް ދަރިކޮޅުގެ މީހުންނެވެ. އާބާދީގެ 39 އިންސައްތައަކީ އެގައުމުގެ އަސްލު ވަޒަންވެރިން ކަމަށްވާއިރު ބާކީ ތިބި ފަރާތްތަކަކީ ޕްސިފިކްގެ ގައުމުތަކާއި އޭޝިއާ އިން ހިޖުރަކޮށްފައިވާ މީހުންނެވެ.

ނިއުކެލިޑޯނިއާ ފްރާންސްގެ އަތްދަށަށް ގެންގޮސްފައި ވަނީ 1853ގައެވެ.