މި އަހަރުގެ އެންމެ ބޮޑު އެއް ފިލްމް ކަމަށްވާ "ޒީރޯ" ގެ ޓްރެއިލާ ލައުންޗު ކޮށްފިއެވެ.
މިޓްރެއިލާ ލައުންޗު ކޮށްފައި ވަނީ މިދިޔަ ހުކުރު ދުވަހު މުމްބާއީގައި ބޭއްވި ޚާއްސަ އިވެންޓެއްގައެވެ. މި އިވެންޓުގައި ޝާހުރުކް ޚާނާއި ކެޓްރީނާ އަދި އަނުޝްކާ ވެސް ވަނީ ބައިވެރި ވެފައެވެ. އަދި މި ދުވަހަކީ މި ފިލްމްމުގައި ލީޑް ރޯލުން ފެނިގެންދާ ޝާހުރުކް ޚާންގެ 53 ވަނަ އުފަންދުވަހެވެ.
"ޒީރޯ"ގެ ޓްރެއިލާގެ ޚާއްސަ ސްކްރީނިން ވަނީ ބޮލީވުޑްގެ ފަންނާނުންނަށް ދައްކާލާފައެވެ.
މި ޓްރެއިލާ ބެލުމަށް ފަހު އާމިރު ޚާން ކޮށްފައިވާ ޓްވީޓްގައި ވަނީ އެ ޓްރެއިލާ އައުޓް ސްޓޭންޑިން ކަމަށެވެ. އާމިރު ވަނީ މި ފިލްމްގައި ޝާހު، ކެޓްރީނާ އަދި އަނުޝްލާ ދައްކާފައިވާ މޮޅު އެކްޓިންއަށް ތައުރީފްކޮށް މަރުހަބާ ކިޔާފައެވެ. އަދި މި ފިލްމް ބަލަން ކެތް މަދުވެފައިވާ ކަމަށް އޭނާ ވަނީ ބުނެފައެވެ.
މި ފިލްމް ޕްރޮޑިއުސަރ ކަރަން ޖޯހަރު ވެސް ބުނެފައި ވަނީ "ބްލޮކްބާސްޓަރ" އެއް ކަމަށެވެ. މީގެ އިތުރުން ބޮލީވުޑްގެ ގިނަ ފަންނާނުން ވަނީ ޓްރެއިލާއަށް ތައުރީފް ކޮށްފައެވެ.
"ޒީރޯ"ގައި ޝާހުރުކްގެ ނަމަކީ ބައުއާ ސިންގް އެވެ. އަދި އޭނާ މި ފިލްމްގައި ފެނިގެންދާނީ އާދަޔާ ޚިލާފަށް ކުރު މީހެއްގެ ރޯލުންނެވެ.
ކެޓްރީނާ ފެނިގެން ދަނީ ސުޕަރ ސްޓާރއެއްގެ ރޯލުންނެވެ. އަދި އަނުޝްކާ ފެނިގެންދަނީ ނުކުޅެދުންތެރިކަން ހުންނަ ސައިންޓިސްޓެއްގެ ރޯލުންނެވެ.
އާނަންދް އެލް ރާއީ ޑައިރެކްޓް ކުރާ މި ފިލްމްގައި ރިލީޒް ކުރުމަށް ހަމަޖެހިފައި ވަނީ ޑިސެމްބަރު 21 ގައެވެ.
