އައްޑޫ ސިޓީގެ އިންތިޚާބީ ދާއިރާތަކަށް އަންނަ ބަދަލާއިގުޅޭ ބައްދަލުވުންތައް ފަށައިފި
2 ނޮވެމްބަރު 2018 | ހުކުރު 13:02އައްޑޫ ސިޓީއަށްފަހު ފުވައްމުލަކު ސިޓީއަށް
އައްޑޫ ރައްޔިތުންނާއި އަކްރަމް ބައްދަލު ކުރައްވަނީ
އަންނަ އަހަރު އޮންނަ ރައްޔިތުންގެ މަޖިލީހުގެ އިންތިޚާބުގައި އައްޑޫ ސިޓީގެ އިންތިޚާބީ ދާއިރާތަކަށް އަންނަ ބަދަލުތަކާއި ގުޅޭގޮތުން ރައްޔިތުންނާއި މަޝްވަރާ ކުރުމުގެ ބައްދަލުވުން އިލެކްޝަންސް ކޮމިޝަން (އީސީ) ފަށައިފިއެވެ.
ރައްޔިތުންގެ މަޖިލީހުގެ އިންތިޚާބުގައި އައްޑޫ ސިޓީގެ އިންތިޚާބީ ދާއިރާތަކަށް އަންނަ ބަދަލުތަކާއި ގުޅޭގޮތުން އިލެކްޝަންސް ކޮމިޝަނުން ވަނީ އެ ސިޓީގެ ކައުންސިލަރުންނާވެސް މަޝްވަރާ ކޮށްފައެވެ.
އައްޑޫ ސިޓީގައި ކުރިއަށްގެންދިޔަ މަޝްވަރާ ބައްދަލުވުންތަކުގައި އިސްކޮށް ހަރަކާތްތެރިވެ ވަޑައިގަންނަވަނީ އެކޮމިޝަނުގެ މެންބަރު އަހުމަދު އަކްރަމެވެ. އެގޮތުން އައްޑޫ ސިޓީގެ އެކި އަވައްތަކުގައި އެކަމާއި ގުޅޭ މަޝްވަރާ ބައްދަލުވުންތައް އިލެކްޝަންސް ކޮމިޝަނުން ވަނީ ކުރިއަށްގެންގޮސްފައެވެ.
އޭގެ ތެރޭގައި އައްޑޫ ސިޓީގެ ހިތަދޫގެ ރައްޔިތުންނާއި އަދި އެނޫންވެސް ރަށްތަކުގެ ރައްޔިތުންނާއެކު ބައްދަލުވުންތައް ބާއްވަމުންދާނެ ކަމަށް އީސީ އިން މައުލޫމާތުދެއެވެ.
އިލެކްޝަންސް ކޮމިޝަނުގެ މެންބަރު އަހުމަދު އަކްރަމް ރާއްޖެއެމްވީއަށް ވިދާޅުވީ ރައްޔިތުންގެ މަޖިލީހުގެ އިންތިޚާބުގައި އައްޑޫ ސިޓީގެ އިންތިޚާބީ ދާއިރާތަކަށް އަންނަ ބަދަލުތަކާއި ގުޅޭގޮތުން ރައްޔިތުންނާއި މަޝްވަރާ ކުރަނީ، އެކަމުގައި ކޮމިޝަނުން ގޮތެއް ނިންމުމުގެ ކުރިން އެ ދާއިރާތަކުގެ ރައްޔިތުންގެ ޚިޔާލު ހޯދުމަށް ކަމަށެވެ. އަކްރަމް ވިދާޅުވީ އައްޑޫ ސިޓީގެ ބައެއް ދާއިރާތަކުގައި ވޯޓުލުމުގެ ހައްޤު ލިބިފައިވާ މީހުންގެ އަދަދު ކުރިއަށްވުރެ އިތުރުވެފައިވާތީ އެކަމާއި ގުޅޭގޮތުން މަޝްވަރާތައް ކުރިއަށްދާ ކަމަށެވެ. އެކަންކަމާއި ގުޅިގެން ކުރިވިދާނެ މަސައްކަތްތައް ކަނޑައެޅުން ހިމެނެއެވެ.
އެގޮތުން ވޯޓް ލިބުމުގެ ޙައްގު ލިބިފައިވާ މީހުން އިތުރުވެފައިވާ ގޮތުގެ މަތިން ދާއިރާތަކަށް ގެންނާނެ ބަދަލުތަކާއި އަދި މީހުން ބަހާލެވިގެންދާނެ ގޮތުގެ މަޝްވަރާތައްވެސް ކުރެވިފައިވާ ކަމަށް އަކްރަމް ވިދާޅުވިއެވެ.
އަކްރަމް ވިދާޅުވީ މިހާރު އައްޑޫ ސިޓީގައި ކުރިއަށްދާ ބައްދަލުވުންތަކަށްފަހު ވަރަށް އަވަށް ފުވައްމުލަކު ސިޓީއަށްވެސް އިލެކްޝަންސް ކޮމިޝަނުގެ ބޭފޫޅުން ވަޑައިގަންނަވާނެއެވެ. މި މަޝްވަރާތަކަށްފަހު އެއް ކުރެވޭ މައުލޫމާތު އިލެކްޝަންސް ކޮމިޝަނުގެ މެންބަރުންގެ މެދުގައި ހިއްސާކުރުމަށް ފަހު ގޮތެއް ނިންމާނީ މެންބަރުންގެ ބައްދަލުވުމަކަށްފަހުގައި ކަމަށްވެސް އަކްރަމް ވިދާޅުވިއެވެ.
