ފްރާންސްގެ އަތްދަށުން މިނިވަންވެ ފުރިހަމަ މިނިވަން ގައުމެއްގެ ގޮތުގައި އޮތުމާ މެދު ރައްޔިތުންގެ ފެންނަ ނުފެންނަ ވޯޓެއް އާދީއްތަ ދުވަހު ވޯޓް ނެގުމަށް ޕެސިފިކްގެ ގައުމެއް ކަމަށްވާ ނިއު ކެލިޑޯނިއާ އިން ނިންމައިފިއެވެ.

އޮސްޓްރޭލިއާ އިން ފުރައިގެން ތިންގަޑިއިރުގެ ފްލައިޓެއްގައި ދެވޭ ނިއު ކެލިޑޯނިއާގައި އެ ގައުމުގެ އަސްލު ވަޒަންވެރިން ކަމަށްވާ ކެނަކް ދަރިކޮޅުގެ މީހުން 1980 ގައި މިނިވަން ކަމަށް ވުރެ ބޮޑަށް ތާއީދުކުރީ ފްރާންސްގެ އަޅުވެތިކަމުގައި އޮތުމަށެވެ.

އާދީއްތަ ދުވަހު ނަގާ ވޯޓްގައި 174،000 މީހުންނަށް ވޯޓްލުމުގެ ހައްގު ލިބިގެންވެއެވެ. ނިއު ކެލިޑޯނިއާގެ މިނިވަންކަމަށް ފެނޭތޯ ބެލުމަށް ވޯޓް ނެގޭ މިއީ ދެވަަނަ ފަހަރެވެ.

އެންމެ ފުރަތަމަ ވޯޓް 1987ގައި ނަގާފައިވާއިރު ކަނަކް ދަރިކޮޅުވަނީ އެ ވޯޓް ބޮއިކޮޓްކޮށްފައެވެ. އޭގެ ނަތީޖާއަކަށް ވެގެން ދިޔައީ 98 އިންސައްތައަށް ވުރެ ބޮޑު އަޣުލަބިއްޔަތަކުން އެ ގައުމު ފްރާންސްގެ ދަށުގައި އޮތުމަށް ތާއީދު ލިބިގެންދިއުމެވެ.

ނިއު ކެލިޑޯނިއާގެ 279،000 މިހުންގެ އާބާދީގެ ތެރެއިން 27 އިންސައްތައަކީ ޔޫރަޕް ދަރިކޮޅުގެ މީހުން ކަމަށްވާއިރު ގިނައީ ފްރާންސް ދަރިކޮޅުގެ މީހުންނެވެ. އާބާދީގެ 39 އިންސައްތައަކީ އެގައުމުގެ އަސްލު ވަޒަންވެރިން ކަމަށްވާއިރު ބާކީ ތިބި ފަރާތްތަކަކީ ޕްސިފިކްގެ ގައުމުތަކާއި އޭޝިއާ އިން ހިޖުރަކޮށްފައިވާ މީހުންނެވެ.

ނިއުކެލިޑޯނިއާ ފްރާންސްގެ އަތްދަށަށް ގެންގޮސްފައި ވަނީ 1853ގައެވެ.