ރާއްޖޭގެ އެންމެ މަޤުބޫލު އޯޑިއޯ ސްޓްރީމިންގ ޕްލެޓްފޯމް، ލަވަފޮށީގެ އާޓިސްޓް ރޭންކިންގެ އެންމެ އުހުގައި ގިނަ ދުވަސްތަކެއް ވަންދެން ރަސްކަން ކުރަމުންދިޔަ ކުރީގެ މަޝްޙޫރު ލަވަކިޔުންތެރިޔާ އަލީ ރަމީޒު ފަހަތަށް ޖައްސާލައި، ސިމްބޮލިކް ރިކޯޑްސްގެ އާޓިސްޓް މުޙައްމަދު މާހިދު (މާޓު) އެ ލިސްޓުގެ އެއްވަނައަށް އަރައިފިއެވެ.

މީގެ އެއް އަހަރާއި ދެ މަސް ކުރިން ލޯންޗްކުރި ލަވަފޮށި އެޕްލިކޭޝަން މިހާރު 60،000 އަށް ވުރެ ގިނަ މީހުން ބޭނުންކުރަމުންދާއިރު، ދުވާލަކު 300 އެއްހާ މީހުން މި އެޕްލިކޭޝަން އަލަށް ބޭނުންކުރަން ފަށާ ކަމަށް ލަވަފޮށި ޓީމުން ބުނެއެވެ.

ލަވަފޮށީގައި މާޓުއަށް މިވަރުގެ މަޤުބޫލުކަމެއް ލިބިގެން ގޮސްފައިވަނީ މި މަހުގެ 10 ވަނަ ދުވަހުގެ ރޭ ރިލީޒްކުރި އޭނާގެ ސޯލޯ އަލްބަމް "މާރޯކާ"، ސެޕްޓެމްބަރ 19 ވަނަ ދުވަހު އެ އެޕްލިކޭޝަނުގައި ހިމެނުމުންނެވެ. ޖުމްލަ 12 ދުވަހުގެ ތެރޭގައި "މާރޯކާ" ވަނީ ލަވަފޮށީގައި އެންމެ މަޤުބޫލު އަލްބަމްގެ މަޤާމު ވެސް ހޯދާފައެވެ.

ގިނަ ދުވަސްތަކަކަށް ފަހު ލަވަފޮށީގެ އާޓިސްޓް ރޭންކިންގއަށް މި އައި ބަދަލާ ގުޅިގެން ލަވަފޮށީގެ މެނޭޖްމަންޓުން ބުނީ، ޒުވާން ދިވެހި އާޓިސްޓަކަށް މިހާ ކުރު މުއްދަތެއްގެ ތެރޭގައި މިހާބޮޑު ތަރުހީބެއް ލިބިގެންދިއުމަކީ ވަރަށް އުފާކުރާ ކަމެއް ކަމަށެވެ.

ސިމްބޮލިކް ރިކޯޑްސްގެ އާޓިސްޓަކަށް ލިބުނު މި ކާމިޔާބާއި ގުޅިގެން އެ ލޭބަލްއިން ވަނީ މިއީ ޒުވާނުންގެ މެދުގައި ރެޕް މިއުޒިކަށް އޮތް މަޤުބޫލުކަން އިތުރުވަމުންދާކަން ހާމަވާ ކަމެއްކަން ފާހަގަކޮށް، މި ކާމިޔާބީއާ މެދު ފަޚުރުވެރިވާކަން ހާމަކޮށްފައެވެ.