ދިރާގު ޓީވީން ދިވެހި މަޝްހޫރު މޭކްޕް އާޓިސްޓް ރުތުބާ އާއި ގުޅިގެން މޭކަޕް ޝޯވ އެއްގެ ކޮންޓެންޓް އުފެއްދުމަށް ސޮއިކޮށްފިއެވެ.

ރުތުބާ އަކީ ރާއްޖޭގެ ފުންނާބު އުސް އެއް މޭކަޕް އާޓިސްޓެވެ. ރުތުބާގެ އެންމެ ފާހަގަކޮށްލެވޭ އެއް މަސައްކަތެއް ފެނިގެން ދިޔައީ 2019 ވަނަ އަހަރު "ވައިޓް ފަޔަރ" ގެ ނަމުގައި މޫސުމަށް އަންނަ ބަދަލާ ބެހޭގޮތުންނާއި، ފަރުތަކަށް ކުރާ ނޭދެވޭ އަސަރު ދައްކުވައިދޭން ބޭއްވި ފޮޓޯގްރަފީ އެކްސިބިޝަނުގައެއެވެ. މީގެ އިތުރުން ރުތުބާ ވަނީ ޔޫތު މިނިސްޓްރީއާ ގުޅިގެން މޭކަޕް ކޭމްޕެއް ވެސް ބާއްވާފައެވެ. "މޭކަޕް ބައި ރުތުބާ" ވެގެން ދާނީ މި ފަދަ ގޮތަކަށް ދިވެހި ޓީވީ ޕްލެޓްފޯމެއްގައި ނެރޭ ފުރަތަމަ ޝޯވއަށެވެ. މި ސީރީޒް ދިރާގު ޓީވީގެ ވީޑިއޯ އޮން ޑިމާންޑް ލައިބްރަރީން، މި އަހަރު ތެރޭގައި ޢާންމުންނަށް ފެނިގެންދާނެ ކަމަށް ދިރާގުން ބުނެއެވެ.

ރުތުބާ ބުނީ ދިރާގުން މިވަރުގެ ފުރުޞަތެއް ލިބުމުން އެއީ ވަރަށް ބޮޑު ޝަރަފެއް ކަމަށާއި ދިރާގު ޓީވީން ދިވެހި ފަންނުވެރިން ކުރިއެރުވުމަށް ކުރަމުންދާ މަސައްކަތް ދިވެހި އާރޓިސްޓުން އަބަދުވެސް ބަލައި ގަންނަކަމަށެވެ.

ދިރާގު ޓީވީން ކުރިއަށް އޮތް ތާނގައިވެސް ދިވެހި ފަންނާނުންގެ އުފެއްދުންތަށް ކުރިއެރުވުމަށް އެއްބާރުލުންދީ ދިވެހި އުފެއްދުންތަކަށް ވީޑިއޯ އޮން ޑިމާންޑް ޕްލެޓްފޯމުގައި ޚާއްޞަ ފުރުޞަތުތަށް މަގު ފަހިކޮށްދެމުންދާނެ ކަމަށް ދިރާގުން މަޢުލޫމާތުދެއެވެ. ދިރާގުގެ ޢަމާޒަކީ ދިރާގުން ފޯރުކޮށްދޭ ޑިޖިޓަލް ޚިދުމަތްތަކުގެ ޒަރިއްޔާއިން ދިވެހި ފަންނުވެރިންނަށް ކުރިއެރުވުމަށް މަގުފަހިކޮށް، އިތުރު ހަރުފަތަކަށް ގެންގޮސްދިނުމެވެ.

ދިރާގުން މަސައްކަތް ކުރަމުން ދަނީ ދިރާގު ޓީވީން ޚަބަރާއި މުނިފޫހިފިލުވުމުގެ ޕްރޮގުރާމުތައް އެންމެ ޒަމާނީ ޓެކްނޮލޮޖީ މެދުވެރިކޮށް ކަސްޓަމަރުންނާ ހަމަޔަށް ފަސޭހަކަމާއި އަދި އެންމެ ހެޔޮ އަގުގައި ފޯރުކޮށްދިނުމެވެ. ދިރާގު ޓީވީ އަކީ ރާއްޖޭގައި އެންމެ ފުޅާ ދާއިރާއެއްގައި ފޯރުކޮށްދޭ އަދި އެންމެ ފުރަތަމަ އައިޕީޓީވީގެ ޚިދުމަތެވެ. ދިރާގު ޓީވީ ތަޢާރަފު ކުރިތާ ވީ ދެ އަހަރު ދުވަހުގެ ތެރޭގައި ބޮޑެތި ކުރިއެރުންތަކެއް ވަނީ ގެނެސްދީފައެވެ. އެގޮތުން މިހާރު ރާއްޖޭގެ އާބާދީގެ 74 އިންސައްތައަށް ދިރާގު ޓީވީގެ ޚިދުމަތް ވަނީ ފޯރުކޮށްދީފައެވެ.