ލަންކާގެ 'ސްނައިޕަރަށް' ބޮޑެތި އަނިޔާތަކެއް ރާއްޖޭގެ ޖަލުގައި ދީފައިވޭ: އެމްނެސްޓީ

ރައީސް އަބްދުﷲ ޔާމީން އަބްދުލްޤައްޔޫމް އަވަހާރަކޮށްލަން އުޅުނުކަމުގެ ތުހުމަތުގައި ހައްޔަރުކޮށްފައިވާ ސްރީލަންކާގެ ރައްޔިތެއްކަމަށްވާ ލަހިރު މަދުޝަންކަރަށް ރާއްޖޭގެ ޖަލުގައި ބޮޑެތި އަނިޔާތަކެއް ދީފައިވާކަމަށް އިންސާނީ ހައްޤުތަކަށް މަސައްކަތްކުރާ ޖަމްއިއްޔާއެއްކަމަށްވާ އެމްނެސްޓީ އިންޓަރނޭޝަނަލް އިން ބުނެފިއެވެ.

ލަންޑަންގައި މައި އޮފީސް ޤާއިމްކޮށްފައިވާ އެމްނެސްޓީއިން "މޯލްޑިވްސް: ދަ ޓޯޗަރަސް އޯޑީލް އޮފް އަ ޕްރިޒަނަރ އިން ޕެރެޑައިސް"ގެ ނަމުގައި ނެރުނު ރިޕޯޓުގައި ތުހުމަތުކޮށްފައިވާ ގޮތުގައި މަދުޝަންކަރު ހައްޔަރުކުރި ހިސާބުން ފެށިގެން ތަހުޤީޤީ މަރުހަލާގައިވެސް އަދި ޖަލުގައިވެސް އޭނާއަށް ބޮޑެތި ލާއިންސާނީ އަނިޔާތައް ދީފައިވެއެވެ.

2015 ވަނަ އަހަރު މަދުޝަންކަރު ހައްޔަރުކުރީ ރައީސް އަބްދުﷲ ޔާމީން އަވަހަރާކޮށްލަން އޭރުގެ ނައިބު ރައީސް އަހުމަދު އަދީބުގެ ރޭވުމެއްގެ ދަށުން ގެނައި ސްނައިޕަރެއްކަމަށް ބުނެއެވެ.

މަދުޝަންކަރު ހައްޔަރުކުރުމަށްފަހު ތަހުޤީޤު މަރުހަލާގައި އޭނާއަށް ތަރުޖަމާނަކު ފޯރުކޮށް ނުދޭކަމަށާއި، ފުރަތަމަ 3 އަޑު އެހުން ފިޔަވައި އެހެން ހުރިހާ އަޑުއެހުމެއްގެ ޝަރީޢަތް ސިއްރުކުރެވުނުކަންވެސް އެޖަމާޢަތުން ފާހަގަކުރިއެވެ. އަދި ހަމައެއާއިއެކު މަދުޝަންކަރާއި ދެކޮޅަށް ހުށަހެޅި ހެކިން ސިއްރުކުރުމުގެ ސަަބަބުން އެކަށީގެންވާ ގޮތެއްގައި އޭނާގެ ވަކީލުންނާއި ހެކިންނާއި ސުވާލު ކުރެވިފައިނުވާއިރު، މަދުޝަންކަރާއި ދެކޮޅަށް ހެކިބަސް ދެނީ ފުލުހުންގެ މަޖުބޫރުކުރުމާއި ބިރު ދެއްކުމުގެ ސަބަބުންކަމަށް ޝަރީޢަތުގެ މަޖިލީހުގައި 2 ހެއްކަކު ބުނިކަމަށްވެސް ވަކީލު ފާހަގަކޮށްފައިވެއެވެ.

އެމްނެސްޓީގެ ރިޕޯޓުގައިވާ ގޮތުން އޭނާއަށް ލިބުނު އަނިޔާތަކުގެ ސަބަބުން އޭނާގެ އެއް ކަންފަތުގެ އިވުން ވަގުތީ ގޮތުން ގެއްލުނެވެ. އަދި އޭނާ ހައްޔަރުކުުރުމަށްފަހު ފަސް ދުވަސްފަހުން ފުލުހުންގެ މައި މަރުކަޒު ހުސައިން އާދަމް ބިލްޑިންގްއަށް އޭނާ ގެންގޮސް، އޭނާއަށް ހޭ ނެތެންދެން އަނިޔާކޮށް، އޭނާ ގައިގައި ތެޅިއެވެ. އަދި ކޭބަލަކުން އޭނާ ގައިގައި ތެޅިކަަމަށާއި، މޫނަށް ޕިންތަކެއް ހެރިކަމަށްވެސް އާއިލާގެ ބައެއް ފަރާތްތަކާއި ވަކީލުންނާއި ހަވާލާދީ އެރިޕޯޓުގައި ބުނެފައިވެއެވެ. އެގޮތުން އޭނާއަށް އަނިޔާކޮށް ހޭނެތުމަށްފަހު، އަލުން ހޭއިރުއިރު އޭނާގެ މޫނަށް ޕިންތަކެއް ހަރާފައިވާކަން އިހުސާސް ކުރެވުނުކަމަށާއި، ލައިގެން ހުރި ހެދުމުގައި ލޭ ހޭކިފައި ހުރިކަމަށް މަދުޝަންކަރުގެ ވަކީލުންނާއި ހަވާލާދީ އެމްނެސްޓީއިން ފާހަގަކުރިއެވެ.

މީގެ އިތުރުން އެހެން މީހަކާއި ވާހަކަ ނުދެއްކޭ ގޮތަށް އޭނާ އެކަހެރިކޮށްފައި ބަހައްޓާކަމަށްވެސް ރިޕޯޓުގައި ބުނެފައިވެއެވެ.

މަދުޝަންކަރާއި މެދު އަމަލުކުރާ ގޮތާއިމެދު ކަންބޮޑުވުން ފާޅުކޮށް މި ރިޕޯޓުގައި އެމްނެސްޓީގެ ދެކުނު އޭޝިއާގެ ރިސަރޗް ޑިރެކްޓަރ ދިނުޝްކާ ޑިސަނަޔަކަ ބުނީ މަދުޝަންކަރާއިމެދު އަމަލުކޮށްފައިވާ ލާއިންސާނީ ގޮތްތަކުގެ ސަބަބުން ރާއްޖޭގެ އިންސާނީ ހައްޤުތަކުގެ ޙާލަތާއި، ބަންދުގައި ތިބޭ ފަރާތްތަކާއިމެދު އަމަލުކުރެވޭ ގޮތާއިމެދު ކަންބޮޑުވާ ސުވާލުތަކެއް އުފެދޭކަމަށެވެ.

މީގެ އިތުރުން މަދުޝަންކަރާއިމެދު ރާއްޖެއިން ކަންތައް ކުރަމުންދާ ގޮތުގައި ލަންކާ ސަރުކާރުގެ އިހުމާލުވެސް އެބައޮތްކަމަށް އެމްނެސްޓީއިން ފާހަގަކުރިއެވެ. އެގޮތުން އޭނާއަށް ބޭނުންވާ ކޮންސިއުލަރ ސަރވިސް ލަންކާ އެމްބަސީއިން އެކަށީގެންވާ ގޮތެއްގައި ދީފައި ނުވާކަމަށް ޑިސަނަޔަކަ ފާހަގަކުރިއެވެ.

މަދުޝަންކަރާއި ގުޅޭގޮތުން އެމްނެސްޓީއިން ފާހަގަކޮށްފައިވާ ކަންކަން ބަލައި، އެކަން ތަހުޤީޤުކުރުމަށް ފުލުހުންނާއި ހިއުމަން ރައިޓްސް ކޮމިޝަން އޮފް ދަ މޯލްޑިވްސްއަށް އެމްނެސްޓީއިން ވަނީ ގޮވާލާފައެވެ.