ޝަހުދީގެ ގޮނޑިވެސް ނުގެއްލޭ ކަމަށް ސުޕްރީމް ކޯޓުން ކަނޑައަޅައިފި
30 އޮކްޓޯބަރު 2018 | އަންގާރަ 10:54އިލެކްޝަނުން ގޮނޑި ގެއްލުނު ކަމަށް ކަނޑައެޅި އެހެން މެމްބަރުންގެ މައްސަލަތައް ވެސް ނިންމާފައި
ރައްޔިތުންގެ މަޖިލީހުގެ ހަނިމާދޫ ދާއިރާގެ މެމްބަރު ހުސައިން ޝަހުދީ:-އޭނާގެ ގޮނޑި ނުގެއްލޭ ކަމަށް ކޯޓުން ވަނީ ހުކުމްކޮށްފައި
ރައްޔިތުންގެ މަޖިލީހުގެ ހަނިމާދޫ ދާއިރާގެ މެމްބަރު ހުސައިން ޝަހުދީގެ ގޮނޑި ގެއްލިފައިވާ ކަމަށް އިލެކްޝަންސް ކޮމިޝަނުން ނިންމާފައިވާ ނިންމުން ބާތިލް ކަމަށް ސުޕްރީމް ކޯޓުން ހުކުމް ކޮށްފި އެވެ.
މެމްބަރު ޝަހުދީގެ ގޮނޑި ގެއްލިފައިވާ ކަމަށް ބުނާ މައްސަލަ ބެލުމަށް ފަހު އެ ގޮނޑި ނުގެއްލޭ ކަމަށް އަންގާރަ ދުވަހު އެ ކޯޓުން ކަނޑައެޅުއްވީ ފަސް ފަނޑިޔާރުންގެ އިއްތިފާގުންނެވެ.
މެމްބަރު ޝަހުދީގެ ގޮނޑި ގެއްލިފައިވާ ކަމަށް އިލެކްޝަންސް ކޮމިޝަނުން ބުނާ މައްސަލާގައި، ސުޕްރީމް ކޯޓުން ފާހަގަ ކުރައްވާފައި ވަނީ ޕީޕީއެމްގެ މެމްބަރު ކަމުން ވަކިވެފައި ވަނީ "ފްލޯ ކޮރޮސިންގ"އާ ބެހޭ ގޮތުން ސުޕްރީމް ކޯޓުން 13 ޖުލައި 2017 ވަނަ ދުވަހު ކޮށްފައިވާ ހުކުމުގެ ކުރިން ކަމަށް ވާތީ، މެމްބަރު ޝަހުދީގެ ގޮނޑި ގެއްލިފައިނުވާ ކަމެވެ.
ސިޔާސީ ޕާޓީތަކުގެ ގާނޫނުގެ ދަށުން ހަދާފައިވާ ޕީޕީއެމްގެ އަސާސީ ގަވާއިދުގައިވާ ގޮތުގެ މަތިން މެމްބަރަކު މެމްބަރުކަމުން ވަކިވާން އެދި ސިޓީ ލާ ދުވަހުން ފެށިގެން ޕާޓީގެ މެމްބަރުކަމުން ވަކިވާނެ ކަމަށް ޕީޕީއެމްގެ އަސާސީ ގަވާއިދުގައި ވަރަށް ސާފުކޮށް ބަޔާން ކޮށްފައިވާ ކަމަށް ވެސް ފާހަގަކޮށްފައިވެ އެވެ. އެހެންކަމުން ޝަހުދީ ޕީޕީއެމްގެ މެމްބަރު ކަމުން ވަކިވުމަށް 07 ޖުލައި 2017 ގައި ޕީޕީއެމް އަށް ހުށަހަޅާފައިވާކަން އެނގޭ ކަމަށްވެސް ބުނެފައިވެ އެވެ.
