އެމެރިކާ - މެކްސިކޯ ބޯޑަރު ކައިރިއަށް 5،200 ސިފައިން ފޮނުވަން ނިންމައިފި
ރައީސް ޓްރަމްޕްވަނީ ރެފިއުޖީން އެގައުމަށް ނުދިއުމަަށް އިންޒާރުދެއްވާފައި
ރެފިއުޖީން ތިބީ އެމެރިކާގެ ސަރަހައްދީ ރޮނގާއި 1000 މޭލަށް ދުރުމިނުގައި
އެމެރިކާއަށް އެތެރެވުމަށް ފައި މަގުގައި ދަތުރުކުރަމުންދާ މެދުތެރޭ އެމެރިކާ ސަރަހައްދުގެ ޤައުމުތަކުގެ އެތައް ހާސް ރެފިއުޖީން ހިމެނޭ ޤާފިލާ ހުއްޓުވުމަށް އެމެރިކާގެ އާއި މެކްސިކޯ ގުޅޭ ސަރަހައްދީ ރޮނގު ކައިރިއަށް އެމެރިކާގެ 5،200 ސިފައިން ފޮނުވުމަށް އެ ގައުމުން ނިންމައިފިއެވެ.
ޖެނެރަލް ޓެރެންސް އޮޝޮގްނެސީ ވިދާޅުވީ އޮޕަރޭޝަން ފެއިތުފުލް ޕެޓްރިއަޓް އަމާޒުކުރާނީ ޓެކްސަސް، އެރިޒޯނާ، އަދި ކެލިފޯނިއާ އަށް ކަމަށެވެ.
އެމެރިކާގެ ރައީސް ޑޮނަލްޑް ޓްރަމްްޕް ކުރިން ވިދާޅުވެފައި ވަނީ އެ ގައުމު ހިފަން އަންނަ ހިޖުރަވެރިންނާއި އެމެރިކާގެ ސިފައިން ބައްދަލުކުރާނެ ކަމަށާއި އެ މީހުން ތިބީ ތައްޔާރަށް ކަމަށެވެ.
އޭޕްރީލް މަހު ރައީސް ޓްރަމްޕް އެދިވަޑައިގަތް އެދިވަޑައިގަތުމުގެ މަތިން މިހާރު ވެސް ސަރަހައްދީ ރޮނގަށް ނޭޝަނަލް ގާޑުގެ 2،100 ސިފައިން ފޮނުވާފައި ވެއެވެ.
އެމެރިކާގެ މިޑްޓަރމް އިންތިޚާބަށް އެންމެ ހަފްތާއަކަށް ވެފައިވާއިރު މައި ދެ ޕާޓީން ވެސް ދަނީ ރެފިއުޖީންގެ މައްސަލަ ސިިޔާސީ ހަތިޔާރެއްގެ ގޮތުގައި ބޭނުންކުރާ ކަމަށް އެއް ބަޔަކު އަނެއް ބަޔަކަށް ތުހުމަތުކުރަމުންނެވެ.
ނޮވެމްބަރ މަހުގެ 6 ވަނަ ދުވަހު ބާއްވާ މިޑްޓަރމް އިންތިޚާބުގައި ރައީސް ޓްރަޕްމްގެ ރިޕަބްލިކަން ޕާޓީން ދަނީ ކޮންގްރެސްގެ ދެ ގެ ވެސް ޑިމޮކްރޭޓުންގެ އަތަށް ދިޔަ ނުދިނުމަށް މަސައްކަތްކުރަމުންނެވެ.
އެމެރިކާއަށް ހިޖުރަކުރުމަށް އެ ގައުމަށް މިސްރާބު ޖަހާފައިވާ ރެފިއުޖީން އަދިވެސް ތިބީ އެމެރިކާގެ ސަރަހައްދީ ރޮނގާއި 1000 މޭލަށް ދުރުގައެވެ.
މީގެ ތެރޭގައި ގިނައިން ތިބީ ގުއަޓަމާލާ، ހޮންޑިއުރަސް އަދި އެލް ސެލްވަޑޯރ ފަދަ ޤައުމުތަކުގައި ހިނގަމުންދާ އެކިއެކި ހަމަނުޖެހުންތަކުން ސަލާމަތްވެ، ރައްކާތެރި ދިރިއުޅުމެއް ހޯދުމަށް އެމެރިކާއަށް މިސްރާބު ޖަހާފައިވާ މީހުންނެވެ.
ޖެނެރަލް އޮޝޮގްނެސީ ވިދާޅުވީ މިހަފްތާ ނިމޭއިރު ސިފައިން ބައިތިއްބާނެ ކަމަށާއި އެ މީހުންނަށް ހަތިޔާރާއި، ހެލިކޮޕްޓަރާއި، މަތިންދާބޯޓް ދެވިފައިވާނެ ކަމަށެވެ. އަދި އެމީހުން ތިބޭނީ ސަރަހައްދީ ރޮނގުގައި ޖަހާފައިވާ ފެންސް ކައިރީ ތިބޭ ޕެޓްރޯލް އޭޖެންޓުންނަށް އެހީ ފޯރުކޮށްދިނުމަށް ކަމަށެވެ.
ހޯމަ ދުވަހު ރައީސް ޓްރަމްޕް ވަނީ އެމެރިކާއަށް ދެކުނުގެ ސަރަހައްދީ ރޮނގާ ދިމާލަށް މިސްރާބު ޖަހާފައިވާ ރެފިއުޖީންގެ ތެރޭގައި ގޭންގް މެމްބަރުންނާއި ވަރަށް ނުބައި މީހުން އެބަ ތިބި ކަމަށެވެ.
ޙިމާޔަތް ހޯދުމުގެ ނިޔަތުގައި އެމެރިކާގެ ސަރަހައްދީ ރޮނގަށް އައިސް ޙިމާޔަތަށް އެދިއްޖެ ކޮންމެ މީހެއްގެ ވާހަކަތައް އަޑު އެހުމަކީ ބައިނަލްއަޤްވާމީ ޤާނޫނުތަކާއި ސޮއިކޮށްފައިވާ މުޢާހަދާތަކުގެ ދަށުން އެމެރިކާއަށް މަޖުބޫރު ކަމެކެވެ. އެހެންނަމަވެސް މިސްރާބު ބަދަލުކޮށް، އަނބުރާ ޤައުމަށް ދިޔުމަށް އެމީހުންނަށް އެމެރިކާގެ ރައީސް ޑޮނަލްޑް ޓްރަމްޕް ވަނީ އިންޒާރު ދެއްވާފައެވެ.
