ފެން ޕަމްޕުތައް ހަލާކު ކޮށްލި ވާހަަކަތައް ހާމަކުރުމުން މިނިސްޓަރ މުއިއްޒަށް އާންމުންގެ ފާޑުކިޔުން!
ކަންކަން ކުރުމަށް ފެއިލް ވުމުން އެހެން މީހުންގެ ބޮލުގައި އަޅުވަނީ ކަަމަށް ގިނަ ބަޔަކު ތުހުމަތު ކުރި
މާލޭގެ މަގުތަކުގައި ފެންބޮޑުވުން
މާލޭގައި ފެން ހިންދާ ނިޒާމުގެ ޕަމްޕުތައް ހަލާކުވެފައިވާ ވާހަކަ ހާމަކުރުމުން އާންމުންގެ ފާޑުކިޔުންތައް ހައުސިންގ މިނިސްޓަރ ޑރ. މުހައްމަދު މުއިއްޒު ވިދާޅުވެއްޖެއެވެ.
މާލޭއަށް ބޯކޮށް ވާރޭވެހި ގިނަ މަގުތަކެއްގައި ވަނީ ފެންބޮޑުވެފައެވެ. ބައެއް މަގުތަކުގައި ދެ ފޫޓަށް ފެން ހުރި އިރު އަނެއް ބައި ސަރަހައްދުގައި ދުއްވާ އުޅަނދު ފަހަރަށް ވެސް ދުންވަން އުނދަގޫވާ ވަރަށް ވަނީ ފެންބޮޑުވެފައެވެ.
މިކަމާ ގުޅިގެން މިނިސްޓަރު މުއިއްޒު ވިދާޅުވަފައި ވަނީ ގިނަ ޕަމްޕު ސްޓޭޝަންތަކުގެ ޕެނަލް ބޯޑަށް ގެއްލުންދީ ހަލާކޮށްލާފައިވާ ކަމަށެވެ.
މަލޭ ސިޓީގެ ފުރަތަމަ މޭޔަރ ކަން ކުރެއްވި އާދަމް މަނިކު (ސަރަނގު) ވިދާޅުވީ، މިނިސްޓަރ މުއިއްޒަށް މަގާމު ދީފައިފައި ވަނީ މަސައްކަތުގެ ވާޖިބުތައް ފުރިހަމައަށް އަދާކުރުމަށް ކަމަށެވެ. އެހެން ކަމުން ބަހަނާ ދެއްކުމުގެ ބޭނުމެއް ނެތް ކަމަށް އޭނާ ވިދާޅުވިއެވެ.
މިކަމާ ގުޅިގެން ސޯޝަލް މީޑިއާގައި ވާހަކަދެއްކި މީހަކު ބުނީ، މިކަން ފުލުހުންނަށް ހުށަހަޅައިގެން ބަލަންޖެހޭ ކަމަށެވެ. ތިފަދަ ގެއްލުންތަކެއް ދިން އިރު ސްޓެލްކޯ އާއި ދިރާގު އަދި އުރީދޫގެ ނެޓްވޯކް ބޯޑުތައް ވެސް އެކި ސަރަހައްދުގައި ހުންނަ ކަމަށެވެ. އެފަދަ ތަކެއްޗަށް ގެއްލުންދޭ ވާހަކަ އަޑު ނީވޭ ކަމަށް އެމީހާ ބުންޏެވެ.
އެހެން މީހަކު ބުނީ، މިއީ ކަންކަން ކުރުމަށް ފެއިލް ވުމުން ދައްކާ އުޒުރުތަކެއް ކަމަށެވެ. އެހެން މީހަކު ބުނީ، ރައްޔިތުންނަށް ދިމާވާ ދަތިތަކަށް މައާފަށް އެދުނު ނަމަވެސް ދަރިފުޅު ސްކޫލަށް ފެނުގައި ނުޖެހި ނުގެއްދެވުނު ކަމަށެވެ.
އަމިއްލަ އިހުމާލުން ކަމެއް ގޯސްވާ ކޮންމެ ފަހަަކު އެކަމުން ރެކެން އެހެން މީހުންގެ ބޮލުގައި ކަންކަން އަޅުވަނީ ކަމަށް ސޯޝަލް މީޑިއާގައި ފާޑުކީ މީހަކު ބުނެފައި ވެއެވެ. އެހެން މީހަކު ވަނީ ތަކެއްޗަށް ގެއްލުން ވެފައިވާ ނަމަ އެކަން އެނގުނީ މިއަދުތޯ އެ ތަކެތި ބެލެހެއްޓުމަކީ ހައުސިން މިނިސްޓްރީގެ ޒިންމާއެއް ނޫންތޯ ސުވާލުކޮށްފައެވެ.
ސްޓޯމްވޯޓަރ ސިސްޓަމު މަސައްކަތް ކުރި އިރެއް ނުފެންނަ ކަމަށާއި ވާރޭ ކޮޅެއް ވެހިއްޖެ ނަމަ މާލެ އޮންނަނީ ފެންބޮޑިފައިވާ ކަމަށް އެހެން މީހަކު ބުންޏެވެ. އެހެން މީހަކު ބުނީ ހައުސިންގ މިނިސްޓަރުގެ މަގާމުގައި 2012 ވަނަ އަހަރުން ފެށިގެން ހުރި އިރު މިފަދަ ކަން ކަމަށް ހައްލު ހޯދާދިނުމަށް ފުރިހަމަ ވަގުތު ވެސް ލިބުނު ކަމަށެވެ.
ހައުސިންގ މިނިސްޓަރު މުއިއްޒަށް ފާޑުކީ މީހަކު ވަނީ ޕަމްޕުތައް ބެލެހެއްޓުމުގެ މަސައްކަތްކޮށް، އެތަންތަން ހަލާކުވެފައިވާ ކަން އެނގުނީ ކޮން އިރަކުތޯ ސުވާލުކޮށްފައެވެ. އަދި ބައެއް މީހުން ބުނެފައި ވަނީ މިހާތަނަށް މިނިސްޓަރު މުއިއްޒުގެ ބެލުމުގެ ދަށުން ކޮށްފައިވާ ގިނަ ކަންކަން ދެ ވަނަ ފަހަރަށް ނުވަތަ އެތައް ފަހަރަކު އަލުން ކުރަންޖެހޭ ކަމަށެވެ. އެގޮތުން މަގުތަކުގައި ގާ ޖެހުމާއި ރަސްފަންދު ދުވާ ތަން ފަދަ މަސައްކަތްތައް އެއްބައި ނުނިމެނީސް އަނެއް ބައި ހަދަންޖެހުން އެ ފަރާތްތަކުން ފާހަގަކުރެއެވެ.
ސޯޝަލް މީޑިއާގައި ފާޑުކިޔާފައިވާ އެހެން މީހަކު ބުނެފައި ވަނީ ސަރުކާރުގައި ބާކީ ދުވަސްކޮޅެއް އޮތުމުން ކޮންމެވެސް ބަހަނާއެއް ދައްކައި އެތަންތަން މަރާމާތުކުރުމަށް އަނެއްކާ ވެސް ލާރިކޮޅެއް ހަރަދުކުރެވޭނެ ގޮތެއް ބަލަނީ ކަމަށެވެ.
ގިނަ ބައެއްގެ ފާޑުކިޔުން އަމާޒުވެފައިވާ އިރު މާލޭ މަގުތަކުން ފެން ހިންދުމުގެ ނިޒާމުގެ މަސައްކަތް ހަތަރު ފިޔަވައްސަށް ބަހާލައިގެން މޯލްޑިވްސް ވޯޓަރ އެންޑް ސްވަރޭޖު ކޮމްޕެނީ (އެމްޑަބްލިއުއެސްސީ) އާ ހަވާލުކޮށްފައިވެއެވެ. ފުރަތަމަ ފިޔަވަހީގެ މަސައްކަތްތަކަށް 4 މިލިއަން ރުފިޔާ ޚަރަދު ކުރެވުނު އިރު ދެވަނަ ފިޔަވައްސަށް 13.7 މިލިއަން ރުފިޔާ ޚަރަދު ކުރެވުނެވެ.
މީގެ އިތުރުން ތިން ވަނަ ފިޔަވައްސަށް 5.4 މިލިއަން ރުފިޔާ އަދި ހަތަރު ވަނަ ފިޔަވައްސަށް 20.1 މިލިއަން ރުފިޔާ ހޭދަކުރެވުނެވެ. މުޅި ޖުމްލަ ފެން ހިންދުމުގެ ނިޒާމުގެ މަސައްކަތްތަކަށް 43.2 މިލިއަން ރުފިޔާ ވަނީ ޚަރަދު ކުރެވިފައެވެ. މި ނިޒާމުތައް ޑިޒައިންކޮށްފައި ވަނީ ފެން ބޮޑުވާތާ ގިނަވެގެން ތިން ގަޑިއިރުގެ ތެރޭގައި އެއްކޮށް ފެން ހިނދޭނެ ފަދަ ގޮތަކަށެވެ.
