ޤާނޫނާއި ހިލާފަށް ބަންދުކޮށް، ހައްޤުތައް ނިގުޅައިގަތުމުން މާލީ ބަޔާން ހުށަހެޅެން ނެތްކަން ފާރިސް އަންގައިފި
29 އޮކްޓޯބަރު 2018 | ހޯމަ 16:07މާލީ ބަޔާން ހުށަހެޅުމަށް ހުރި ގިނަ ހުރަސްތަކެއް ފާރިސް ފާހަގަކުރައްވާފައިވޭ
ދިއްގަރު ދާއިރާގެ މެމްބަރު އަހުމަދު ފާރިސް މައުމޫން
ޤާނޫނާއި ހިލާފަށް ބަންދުކޮށް، ހައްޤުތައް ނިގުޅައިގަނެ، ހިފަހައްޓާފައިވާތީ މާލީ ބަޔާން ހުށަހެޅެން ނެތްކަން ރައްޔިތުންގެ މަޖިލީހުގެ ދިއްގަރު ދާއިރާގެ މެމްބަރު އަހުމަދު ފާރިސް މައުމޫން، މަޖިލީހުގެ ރައީސް އަބްދުﷲ މަސީހަށް އަންގައިފި އެވެ.
ރައްޔިތުންގެ މަޖިލީހުގެ އިމްތިޔާޒްގެ ޤާނޫނުގައި ބުނެފައިވާގޮތުން ފާއިތުވެ ދިޔަ އަހަރުގެ މާލީ ބަޔާން އޮކްޓޯބަރު މަހުގެ 31 ގެ ކުރިން ރައްޔިތުންގެ މަޖިލީހުގެ އިދާރާއަށް ހުށައަޅަންޖެހެ އެވެ.
ރައްޔިތުންގެ މަޖިލީހުގެ ރައީސް އަބްދުﷲ މަސީހަށް އެޑްރެސްކޮށް ފާރިސް ފޮނުވި ސިޓީގައި ވަނީ މާލީ ބަޔާން ހުށަހަޅަން ބޭނުންވިނަމަވެސް ގިނަ ސަބަބުތަކަކާއިހުރެ މާލީ ބަޔާން ހުށަހެޅެން ނެތް ކަމަށެވެ. އެގޮތުން 18 ޖުލައި 2017 އިން ފެށިގެން ދޮގު ތުހުމަތެއްގައި ޤާނޫނާއި ހިލާފަށް އޭނާ ބަންދުކޮށްފައިވާކަން ފާރިސް ފާހަގަކުރައްވާފައިވެއެވެ.
އޭގެއިތުރުން ރައްޔިތުންގެ މަޖިލީހުގެ މެމްބަރަކު ބަންދުކުރުމާއި ގުޅިގެން އަމަލުކުރުމަށް ރައްޔިތުންގެ މަޖިލީހުގެ ގަވައިދާއި، ރައްޔިތުންގެ މަޖިލީހުގެ އިމްތިޔާޒްތަކުގެ ޤާނޫނުގައި ލާޒިމްކޮށްފައިވާ ގޮތުގެ މަތިން މަޖިލީހުގެ ރައީސާއި، މަޖިލީހުގެ އަމިންއާމާއި، މަޖިލީހުގެ އިދާރާއިން އަމަލުކޮށްފައިނުވާކަމަށް ފާރިސް ފާހަގަކުރައްވާފައިވެއެވެ. އަދި ރައްޔިތުންގެ މަޖިލީހުގެ މެމްބަރަކު ބަންދުކުރުމާއި ގުޅިގެން އަމަލުކުރުމަށް ރައްޔިތުންގެ މަޖިލީހުގެ ގަވައިދާއި، ރައްޔިތުންގެ މަޖިލީހުގެ އިމްތިޔާޒްތަކުގެ ޤާނޫނުގައި ލާޒިމްކޮށްފައިވާ ގޮތުގެމަތިން އަމަލުކުރެއްވުުމަށް ޤާނޫނީ އެއްވެސް ޢުޛުރެއް ނެތި އިންކާރުކުރައްވައި ޤާނޫނަށް ކަނޑައެޅިގެން ނުކިޔަމަންތެރިކަންމަތީގައި މަޖިލީހުގެ ރައީސާއި، ރައްޔިތުންގެ މަޖިލީހުގެ އަމިންއާމާއިި، މަޖިލީހުގެ އިދާރާގެ ކަމާއިބެހޭ މުވައްޒިފުން ދެމިތިއްބަވާ ތިއްބެވުމަށް މިއަދަށް 106 ދުވަސްވެފައިވާކަން ފާރިސްގެ ސިޓީގައި ފާހަގަކުރައްވާފައިވެއެވެ.
އެ ކަންތައްތަކުގެ އިތުރުން ރައްޔިތުންގެ މަޖިލީހުގެ މެމްބަރެއްގެ ހައިސިއްޔަތުން ޤާނޫނީ މަސްއޫލިއްޔަތުތަކާއި ވާޖިބުތައް އަދާކުރުމަށްޓަކައި ރައްޔިިތުންގެ މަޖިލީހުގެ އަމީންްއާމާއި ރައްޔިތުންގެ މަޖިލީހުގެ އއިދާރީ މުވައްޒިފުންގެ ކިބައިން ބޭނުންވާ އެހީތެރިކަން ފޯރުކޮށްދިނުމަށް އޭނާގެ ފަރާތުންނާއި ޤާނޫނީ ވަކީލުންގެ ފަރާތުން ދަންނަވާފައިވާ ދެންނެވުމަށް އެއްވެސް އިޖާބައެއް ދެއްވުމެއް ނެތި އެކަންތައްތައް މަތީގައި އެ ފަރާތްތައް ދެމިތިބެފައިވާކަން ފާރިސް ފާހަގަކުރައްވާފައިވެއެވެ. އަދި މާލީ ބަޔާން އެކުލަވާލުމަށް އެއްވެސް މަސައްކަތެއް ކުރުމުގެ ފުރުސަތު ދައުލަތުގެ ކަމާއިބެހޭ އެއްވެސް ފަރާތަކުން މިއަދާ ހަމައަށް ދެއްވާފައިނުވާކަން ފާރިސް ފާހަގަކުރައްވާފައިވެއެވެ.
ފާރިސްގެ ސިޓީގައި ފާހަގަކުރައްވާފައިވަނީ އެކަންތައްތައް އެހެން ހުރުމާއި ގުޅިގެން މާލީ ބަޔާން މިވަގުތު ހުށަހެޅެން ނެތްކަމަށެވެ. ނަމަވެސް މާލީ ބަޔާން ހުށަހަޅަން ބޭނުންވާކަމަށް ފާރިސްގެ ސިޓީގައި ފާހަގަކުރައްވާފައިވެއެވެ. އަދި ބުނެފައިވަނީ މާލީ ބަޔާން ތައްޔާރުކުރެވޭނެފަދަ ހާލަތެއް މެދުވެރިވުމުން މާލީ ބަޔާން ހުށަހަޅާނެކަމަށްވެސް އެ ސިޓީގައި ބުނެފައިވެއެވެ.
