ވޯލްޑް ލަގްޒަރީ ސްޕާ އެންޑް ރެސްޓޯރެންޓް އެވޯރޑްސް ގެ ފަސް އެވޯރޑެއް ޖުމެއިރާއަށް

ދެހާސް ނަވާރަ ވަނަ އަހަރުގެ ވޯލްޑް ލަގްޒަރީ ސްޕާ އެންޑް ރެސްޓޯރެންޓް އެވޯރޑްސް ގެ ފަސް އެވޯޑެއް ޖުމެއިރާ ވިޓަވެލިން ކާމިޔާބު ކޮށްފިއެވެ.

ރަޝިއާގެ ސެއިންޓް ޕީޓަރސްބަރގް ގެ ސްޓޭޓް ހާރމިޓޭޖް މިއުޒިއަމް އޮފިޝަލް ހޮޓެލް ގައި ޖުލައި ހަ ވަނަ ދުވަހު ބޭއްވި ވޯލްޑް ލަގްޒަރީ ސްޕާ އެންޑް ރެސްޓޯރެންޓް އެވޯރޑްސް ގައި އެވޯޑުތައް ލިބިފައިވަނީ ޖުމައިރާގެ ސްވަރނާ ރެސްޓޯރެންޓް، ފެނެސީ ރެސްޓޯރެންޓް އަދި ޓެލިސް ސްޕާ އަށެވެ.

ސްވަރނާ ރެސްޓޯރެންޓް އޭޝިއާ ބައްރުގެ "ބެސްޓް އިންޑިއަށް ކޫޒީން" އަދި "މޯސްޓް ލަގްޒަރިއަސް އެމްބިއެންސް" އެވޯޑް ހާސިލް ކޮށްފައިވާ އިރު ރިސޯޓުގެ ފެނެސީ ރެސްޓޯރެންޓް ވަނީ އޭޝިއާގެ "ބެސްޓް ފްރެންޗް ކޫޒީން" އަދި "މޯސްޓް ރޮމޭންޓިކް އެޓްމޮސްފެއަރ" އެވޯޑް ހާސިލް ކޮށްފައެވެ. ސަރަހައްދުގެ "ލީޑިންގް ލަގްޒަރީ ވެލްނެސް ސްޕާ" ގެ އެވޯޑް ރިސޯޓްގެ ޓެލިސް ސްޕާ އިން ވަނީ މި ހަފްލާގައި ކާމިޔާބު ކޮށްފައެވެ.

ޖުމެއިރާގެ ޖެނެރަލް މެނޭޖަރ އަމިތް މަޖުމްޑާރ ވިދާޅުވީ ވިދިވިދިގެން ތިން އަހަރު މި އެވޯޑްތައް ހާސިލް ކުރެވުމުން ދޭހަވަނީ ރިސޯޓުން ދެވޭ ކެއުމުގެ ހިދުމަތަކީ ކަސްޓަމަރުން ބަލައިގަންނަ ފެންވަރުގެ ރަނގަޅު ހިދުމަތެއް ކަމުގައެވެ. އަދި ރިސޯޓު ގެ ހިދުމަތްތައް ދުނިޔޭގެ ފެންވަރުގައި ގަބޫލު ކުރެވިގެން ދިއުމަކީ ރިސޯޓަށް ލިބުނު ވަރަށް ބޮޑު ފަހުރެއް ކަމުގައެވެ.

ވޯލްޑް ލަގްޒަރީ ސްޕާ އެންޑް ރެސްޓޯރެންޓް އެވޯޑްސް އަކީ ދުނިޔޭގެ އެންމެ ވަރުގަދަ ސްޕާތަކަށާއި ރެސްޓޯރެންޓް ތަކަށް އޮންލޮއިން ވޯޓިންގް މެދުވެރިކޮށް ދެވޭ ވޯޓުގެ ނަތީޖާއިން އަރުވާ އެވޯޑްތަކެކެވެ. މި އީ ޖުމައިރާ އިން މި އެވޯޑްތައް ވިދި ވިދިގެން ހާސިލް ކުރި ތިންވަނަ އަހަރެވެ. ޖުމައިރާ ވިޓަވެލި ވަނީ 2017 ވަނަ އަހަރު " ގްލޯބަލް ހޮޓެލް އޮފް ދަ އިޔަރ" ގެ އެވޯޑް ވެސް ހާސިލް ކޮށްފައެވެ.