ހާޒިރުވި މެމްބަރުން މަދުވުމުން ޕީޕީއެމުން ވިޕް ލައިން ނުނެރުނު!
ބައްދަލުވުމަށް ހާޒިރުވީ ޕީޕީއެމްގެ 14 މެމްބަރުން
ޕީޕީއެމް ޕާލަމެންޓްރީ ގްރޫޕުގެ ބައެއް މެމްބަރުން
އާދީއްތަ ދުވަހު ބާއްވާ ރައްޔިތުންގެ މަޖިލީހުގައި ޖަލްސާއަށް އެޖެންޑާކޮށްފައިވާ ކަންތައްތަކާ ގުޅޭ ގޮތުން ގޮތެއް ނިންމުމަށް ބޭއްވި ޕީޕީއެމް ޕާލަމެންޓްރީ ގްރޫޕުގެ ބައްދަލުވުމަށް ހާޒިރުވެވަޑައިގެންނެވި މެމްބަރުންގެ އަދަދު މަދުވުމުން، ގޮތެއް ނުނިންމައި ބައްދަލުވުން ނިންމާލައިފިއެވެ.
ހޮނިހިރު ދުވަހު ވަހީރު ރައްޔިތުންގެ މަޖިލީހުގައި ބޭއްވި ޕީޕީއެމް ޕީޖީ ގްރޫޕުގެ އެ ބައްދަލުވުމަށްފަހު މީޑިއާއަށް މައުލޫމާތު ދެއްވަމުން އެ ޕާޓީގެ ޕާލަމެންޓްރީ ގްރޫޕުގެ ލީޑަރު އަހުމަދު ނިހާން ހުސައިން މަނިކު ވިދާޅުވީ ބައްދަލުވުމަށް ވަޑައިގެންނެވީ 14 މެމްބަރުން ކަމަށެވެ. ޕީޕީއެމް ޕާލަމެންޓްރީ ގްރޫޕުގައި ހިމެނެނީ 36 މެމްބަރުންނެވެ.
ރައީސް ނަޝީދު މިނިވަން ކުރުމަށް ގޮވާލައި ހުށަހަޅާފައިވާ ގަރާރާއި އަބުރުގެ ގާނޫނުގެ ބާތިލު ކުރުމަށާއި އެންޓި ޑިފެކްޝަންގެ ގާނޫނު ބާތިލު ކުރުމަށް ހުށަހަޅާފައިވާ ޖަލްސާގައި ޕީޕީއެމުން އަމަލު ކުރާނެ ގޮތެއް ދެން ނިންމާނީ މާދަމާ މެންދުރުފަހު 12:30ގައި ރައްޔިތުންގެ މަޖިލީހުގައި ބާއް ޖަލްސާގައި ކަމަށް ނިހާން ވިދާޅުވިއެވެ.
ނިހާނު ވިދާޅުވީ އާދިއްތަ ދުވަހުގެ ޖަލްސާއަށް އެޖެންޑާ ކޮށްފައިވާ، އިންތިހާބީ ރައީސް އިބްރާހީމް މުހައްމަދު ސޯލިހު ރައީސުލްޖުމްހޫރިއްޔާ ކަމުގެ މަގާމުގެ ހުވާ ކުރެއްވުމަށް ބާއްވަން ޖެހޭ ޖަލްސާ އޮންނާނެ ދުވަސް ކަނޑައެޅުމުގެ އެޖެންޑާއާ މެދު ޕީޕީއެމް ޕާލަމެންޓްރީ ގްރޫޕުން ބޭއްވި ބައްދަލުވުމުގައި ވަކި ގޮތެއް ނުނިންމާ ކަމަށެވެ. އެހެންކަމުން ޕީޕީއެމް މެމްބަރުންގެ ހިޔާލު ހުރި ގޮތް އާތީއްދަ ދުވަހު މަޖިލީހުގެ ތަޅުމުގައި ކުރިއަށް ގެންދާ ބަހުސްއިން އެނގިގެންދާނެ ކަމަށް ނިހާން ވިދާޅުވިއެވެ.
ނިހާނު ވިދާޅުވީ ރައީސް މުހައްމަދު ނަޝީދުގެ މައްޗަށް ކޮށްފައިވާ ހުކުމް ބާތިލު ކުރުމާއި، އދ. ގެ ނިންމުންތައް ތަންފީޒު ކުރުމަށް އިލްތިމާސްކޮށް ރައްޔިތުންގެ މަޖިލީހުގެ ގަވާއިދުގެ 142 ވަނަ މާއްދާގެ ދަށުން ހުށަހަޅުއްވާފައިވާ ޤަރާރާ މެދުވެސް ވަކި ގޮތެއް އެ ޕާޓީގެ ޕާލަމެންޓްރީ ގްރޫޕުން ނުނިންމާ ކަމަށެވެ.
ނިހާނު ވިދާޅުވީ މަޖިލީހުގެ ރައީސް އަބްދުﷲ މަސީހު މުހައްމަދުގެ އިތުބާރު ނެތްކަމުގެ މައްސަލަ އާއި ރައީސް ނަޝީދު މިނިވަން ހުށަހެޅި ގަރާރުގައި ސޮއި ކުރެއްވި މެމްބަރުން ވެސް ޕީޖީ ބައްދަލުވުމަށް ވަޑައިގެންނެވި ކަމަށެވެ. އޭނާ ވިދާޅުވި ގޮތުގައި ޕީޕީއެމްގެ މަޖިލިސް މެމްބަރުން މަސައްކަތް ކުރަނީ ޓީމެއްގެ ގޮތުގަ އެވެ.
އޭނާ ވިދާޅުވީ މަސީހުގެ އިތުބާރު ނެތްކަމުގެ މައްސަލާގައި ކުރިން ސޮއި ކުރެއްވުމަށްފަހު، ސޮއި ނުކުރައްވާ ކަމަށް ވިދާޅުވީ އިސްދޫ ދާއިރާގެ މެމްބަރު އަހުމަދު ރަޝީދު ވެސް މިފަހަރު މަސީހުގެ އިތުބާރު ނެތްކަމުގެ މައްސަލާގައި ސޮއި ކުރެއްވި ކަމަށް އެއްބަސްވެވަޑައިގެންފައިވާ ކަމަށެވެ. އަދި ސޮއި ކުރެއްވީ ވެސް އޭގައިވާ އެއްޗެއް އެނގިގެން ކަމަށް މެމްބަރު އަހުމަދު ރަޝީދު ވިދާޅުވި ކަމަށް ނިހާނު ވިދާޅުވިއެވެ.
ނިހާނު ވިދާޅުވީ އެންޓި ޑިފެންޝަން ގާނޫނު އުވާލުމަށް ހުށަހަޅާފައިވާ ބިލާމެދު، މާފަންނު ދެކުނު ދާއިރާގެ މެމްބަރު އަބްދުﷲ ރިފާއު (ބޮޗޭ) އާއި ބާރަށު ދާއިރާގެ މެމްބަރު އިބްރާއީމް ސުޖާ ދެކޮޅު ކަމަށާއި ނަމަވެސް އެބިލާމެދު ވެސް ތްރީ ލައިން ވިޕެއް ނެރެފައި ނުވާ ކަމަށެވެ. އަދި އަބުރު ރައްކާކޮށްދިނުމާއި ހިޔާލުފާޅުކުރުމުގެ މިނިވަން ކަމުގެ ގާނޫނު އުވާލުމަށް ހުށަހަޅާފައިވާ ބިލަށް ޕީޕީއެމް ޕީޖީގެ ބައެއް މެމްބަރުން ދެކޮޅު ކަމަށާއި ނަމަވެސް އާދިއްތަ ދުވަހުގެ ބައްދަލުވުމުގައި ވަކި ގޮތެއް ނިންމާފައި ނުވާ ކަމަށް ވެސް ނިހާނު ވިދާޅުވިއެވެ.
