ރައީސް ސިރިސޭނާ ލަންކާގެ ގާނޫނު ހަދާ މަޖިލީސް ސަސްޕެންޑް ކުރައްވައިފި
ރާޖަޕްކްސަ ހުވާކުރެއްވީ ގާނޫނާ ޚިލާފަށް: ޔޫއެންޕީ
ރައީސް ސިރިސެނާ މަޖިލީސް ސަސްޕެންޑްކުރެއްވީ މަޖިލީހުގެ ކުއްލި ޖަލްސާ އެއް ބޭއްވުމަށް ރަނިލް މަސައްކަތް ކުރައްވަމުން ގެންދަވަނިކޮށް
ސްރީލަންކާގެ ރައީސް މައިތިރިޕާލާ ސިރިސޭނާ އެގައުމުގެ ގާނޫނު ހަދާ މަޖިލީސް ސަސްޕެންޑް ކުރައްވައިފިއެވެ.
ގާނޫނުހަދާ މަޖިލީސް ސަސްޕެންޑް ކުރައްވާފައި މިވަނީ އެޤައުމުގެ ކުރީގެ ރައީސް މަހިންދަ ރާޖަޕަކްސަ ބޮޑުވަޒީރުކަމުގެ ހުވަހާ، ހުކުރު ދުވަހު ކުރައްވާފައި ވަނިކޮށެވެ.
ރާޖަޕަކްސަ ބޮޑުވަޒީރުކަމަށް ވަޑައިގަތް ކަމަށް ރިޕޯޓްކޮށްފައި މިވަނީ ލަންކާގައި ވެރިކަން ކުރަމުން އައި ޔޫއެންޕީ-ޔޫޕީއެފްއޭ ކޯލިޝަނުން ޔޫޕީއެފްއޭ ވަކިވެފައިވާ ކަމަށް އެކޯލިޝަންގެ ސެކްރެޓަރީ ޖެނެރަލް އަދި ވަޒީރުންގެ މަޖިލީހުގެ މެމްބަރު މަހިންދަ އަމަރަވީރަ ލަންކާގެ މީޑިއާތަކަށް ޔަޤީންކޮށްދެއްވާފައި ވަނިކޮށެވެ.
މަގާމުން ވަކިވެގެންދިޔަ ބޮޑުވަޒީރު ރަނިލް ގެންދެވީ މަޖިލީހުގެ ކުއްލި ޖަލްސާ އެއް ބޭއްވޭތޯ މަސައްކަތް ކުރައްވަމުންނެވެ.
ބޮޑުވަޒީރު ކަމުގައި 2015 ވަނަ އަހަރުން ފެށިގެން ހުންނެވީ ޔޫއެންޕީގެ ލީޑަރު ރަނިލް ވިކްރަމަ ސިންހައެވެ.
ބޮޑުވަޒީރުގެ މަގާމަށް ރާޖަ ޕަކްސަ ވަޑައިގެންފައި ވަނީ ގާނޫނު އަސާސީ އާ ޚިލާފަށް ކަމަށް ރަނިލް ގެންދަ ވަނީ ވިދާޅުވަމުންނެވެ.
ޔޫއެންޕީ އިން ވެސް ބުނެފައި ވަނީ ބޮޑުވަޒީރަކީ އަދިވެސް ރަނިލް ކަމަށެވެ. އަދި ލަންކާގައި ކޮށްގެން އުޅެނީ ބަޣާވާތެއް ކަމަށް ޔޫއެންޕީގެ އިސް ބޭފުޅުންނާއި ވަޒީރުންގެ މަޖިލީހުގެ ބޭފުޅުން ގެންދަވަނީ ވިދާޅުވަމުންނެވެ.
