ނަޝީދު މިނިވަންކުރަންވާނީ ރާއްޖޭގައި އެކަމަށް އޮންނަ ނިޒާމުގެ ތެރެއިން: ދުންޔާ

ކުރީގެ ރައީސް މުހައްމަދު ނަޝީދަށް އިންސާފު ލިބެން އެދޭ ކަމަށާއި އެކަމަކު އެކަން ކުރަންވާނީ ދިވެހިރާއްޖޭގައި އެކަމަށް އޮންނަ ނިޒާމްގެ ތެރެއިން ކަމަށް ުރީގެ ފޮރިން މިނިސްޓަރ ދުންޔާ މައުމޫނު ވިދާޅުވެއްޖެ އެވެ.

އޮންލައިން ނޫހެއް ކަމަށްވާ "އަވަސް" އިން އަލަށްފެށި "އަވަސް ހުކުރު" ޕްރޮގްރާމް ގައި ވާހަކަދައްކަވަމުން ދުންޔާ ވިދާޅުވީ ރައީސް ނަޝީދަށް ފުރިހަމަ އިންސާފެއް ލިބިވަޑައިގަތުމަކީ ވަރަށް ބޮޑަށް ބޭނުންފުޅުވާ ކަމެއް ކަމަށާއި ނަމަވެސް ބޭރުގެ ޖަމިއްޔާ އަކުން ނުވަތަ ޖަމާއަތަކުން ނިންމިޔަސް އެކަން ނުކުރެވޭނެ ކަމަށެވެ.

Advertisement

ދުންޔާ ވިދާޅުވި ގޮތުގައި ނަޝީދަށް މިނިވަންކަން ލިބިވަޑައިގަތުމަކީ ވަރަށް މުހިތްމު ކަމެކެވެ. އަދި ކަމަށް ކުރަންޖެހޭ ހުރިހާ މަސައްކަތެއް ހައްލުވާނީ ރާއްޖޭގައި އެކަމަށް އުފެދިފައި އޮތް ނިޒާމުގެ ތެރެއަށް ވަދެގެން ކަމަށް ދުންޔާ ވިދާޅުވިއެވެ.

ދުންޔާ ފާހަގަ ކުރައްވާ ގޮތުގައި ރައީސް ނަޝީދަށް ކުރިމަތިވެވަޑައިގެންނެވި ކަންތައްތަކުގައި އެމަނިކުފާނަށް ދުނިޔޭގެ ސަމާލުކަން ވަރަށް ބޮޑަށް ލިބިވަޑައިގަތެވެ.

ރައީސް ނަޝީދުގެ މައްސަލައިގައި އދގެ ވޯކިން ގްރޫޕުން ކުރިމަތިކުރުވި ކަންކަމަށް ޖަވާބުދާރީވާން ޖެހިވަޑައިގެންނެވި ކަމަށާއި، އެގޮތުން ބައިނަލް އަޤްވާމީ ޤާނޫނުތަކާއި ރާއްޖެ ބައިވެރިވެފައިވާ މުއާހަދާ ގުޅިގެން ކުރިމަތިވި ކަންކަމަށްވެސް ޖަވާބުދާރީވާން މަސައްކަތް ކުރެއްވި ކަމަށް ދުންޔާ ވިދާޅުވިއެވެ. އަދި ހުރިހާ ރައްޔިތުންނަށް ވެސް އިންސާފު ލިބެންޖެހޭނެ ކަމަށާއި އެމީހަކު ކުރި ކަމަށް ތުހުމަތުކުރާ ކުރެވޭ ކުށަކުން ބަރީޢަވުމުގެ ފުރުސަތުވެސް އެމީހަކަށް ލިބިދޭން ޖެހޭނެ ކަމަށް ދުންޔާ ވިދާޅުވިއެވެ.

ދުންޔާ ވިދާޅުވީ އަލަށް އިންތިޚާބުވެ ވަޑައިގަންނަވާ އިބްރާހީމް މުހައްމަދު ސޯލިހުގެ ވެރިކަމުގެ ޖުޑިޝަރީ ހަރުދަނާ ވެގެން ދިއުމަކީ ރައްޔިތުން ވަރަށް ބޮޑަށް ކުރައްވާ އުއްމީދެއް ކަމަށެވެ. އަދި ޝަރުޢީ ނިޒާމްގެ ތެރެއިން ލިބިދޭންޖެހޭ އިންސާފު ކަށަވަރުވަރު ކުރުމަކީ ކޮންމެ މީހެއްގެ ވެސް ޙައްޤެއް ކަމަށް ދުންޔާ ވިދާޅުވިއެވެ. އެ ގޮތުން ހުރިހާ މީހުންނަށް ވެސް ޖަސްޓިސް ލިބެން ޖެހޭ ކަމަށާއި ދިވެހި ރައްޔިތުންނަށް ރައްކާތެރިކަން އިހުސާސް ވާނީ އޭރުން ކަމަށް ދުންޔާ ވިދާޅުވި އެވެ.

ދުންޔާ ވިދާޅުވީ ސިޔާސީ މައިދާނުގައި ހަރަކާތްތެރިވެ އިސްކޮށް އުޅުއްވި ގިނަ ބޭފުޅުންތަކެއްގެ އާއިލާތައް ތިބި ބިރުވެރިކަން އޭނާއަށް ވަރަށް ރަނގަޅަށް ވަޒަންކުރެވެއެވެ.

އެ ބޭފުޅުންނާއި އެ އާއިލާތައް ވެފައިވަނީ ބޮޑު ގުރުބާނީއެއްކަން ދުންޔާ ވަނީ ފާހަގަކުރައްވާފައެވެ. އަދި ވޭދުވެދިޔަ ދުވަސްތަކަކީ އޭނާއަށް ވެސް ފަސޭހަ ދުވަސްތަކެއް ނޫން ކަމަށް ދުންޔާ ވިދާޅުވި އެވެ.