ޗައިނާގެ ކިންޑަރގާޓެން ސްކޫލެއްގައި ވަޅިން ހަމަލާދީ މަދުވެގެން 14 ކުއްޖަކު ޒަޚަމްކޮށްލައިިފި
27 އޮކްޓޯބަރު 2018 | ހޮނިހިރު 14:05ހަމަލާ ދިނީ އުމުރުން 39 އަހަރުގެ އަންހެނެއް
ހަމަލާ ދިން ކަމަށް ބެލެވޭ މީހާ ހައްޔަރުކޮށްގެން ގެންދަނީ
ޗައިނާގެ އިރުދެކުނުގެ ޗޮންކިންގގެ ކިންޑަރގާޓެން ސްކޫލެއްގައި ވަޅިން ހަމަލާދީ މަދުވެގެން 14 ކުއްޖަކު ޒަޚަމްކޮށްލައިިފިއެވެ.
ފުލުހުން ބުނީ ހުކުރު ދުވަހުގެ ހެނދުނު އުމުރުން 39 އަހަރުގެ އަންހެނަކު ވަޅިއެއް ހިފައިގެން ސްކޫލަށް ވަދެފައި ވަނީ ޕްލޭ ގްރައުންޑްގައި ކުދިން އުޅެނިކޮށްކަމަށެވެ.
ހަމަލާ ދީފައިވާ ސަބަބެއް އެނގިފައި ނުވާއިރު އެ ގައުމުގެ ބައެއް މީޑިއާ ރިޕޯޓްތައް ބުނާގޮތުން އަންހެން މީހާ ސަރުކާރާމެދު ހިތްހަމަ ނުޖެހުންތަކެއް އޮތެވެ.
އާއިލީ ނަމެއްގެ ގޮތުގައި ލިއު ގެ ނަން ދީފައިވާ އެ އަންހެންމީހާވަނީ އެތަނުން ހައްޔަރުކުރެވިފައެވެ.
ސޯޝަލް މީޑިއާގައި ދައުރުވަމުންދާ ވީޑިއޯ އިން ފެންނަގޮތުގައި ޒަޚަމްވި ކުދިން ވަނީ މަގުމައްޗަށް ނުކުމެފައެވެ. ބައެއް ކުދިންގެ މޫނުމަތި ޒަޚަމްވެފައި ވާތަން ވެސް ވަނީ ފެނިފައެވެ.
މީގެ އިތުރުން އެހެން ވީޑިއޯ އެއްގައި، ހަމަލާދިން ކަމަށް ބެލޭ މީހާ ފުލުހުން ގެންދާ މަންޒަރު ފެންނެއެވެ.
ދެ ކުއްޖަކު މަރުވި ކަމަށް ސޯޝަލް މީޑިއާގެ ދައުރުވި ޚަބަރުތައް ދޮގުކޮށް ފުލުހުން ވަނީ ދޮގު ޚަބަރުތައް ނުފެތުރުމަށް އެދިފައެވެ.
