މަޖިލީހުގެ ޖަލްސާތައް ހުއްޓިފައި އޮންނަތާ ގާތްގަނޑަކަށް ތިން މަސް ދުވަސް ވެފައިވާއިރު، އަލުން ޖަލްސާތައް ފެށުމަށް މަސައްކަތް ކުރަމުން އަންނަ ކަމަށް، މަޖިލީހުގެ ނައިބު ރައީސް މޫސާ މަނިކު ވިދާޅުވެއްޖެ އެވެ. 

ރައީސް އަބްދުﷲ ޔާމީނަށް އޮތް ސުޕަ މެޖޯރިޓީ ގެއްލިގެން ދިއުމުން ސަލާމަތީ ހިދުމަތްތައް މެދުވެރިކޮށް މަޖިލިސް ހިސޯރުކޮށްފައިވާއިރު، އެންމެ ފަހުން ޖަލްސާއެއް ބާއްވާފައި ވަނީ އޯގަސްޓް 1 ގަ އެވެ. 

ހުޅުހެންވޭރު ދާއިރާގެ މެމްބަރުގެ ގޮތުގައި ވެސް ހުންނެވި މޫސާ މަނިކު ވިދާޅުވި ރައްޔިތުންނާ ގުޅުންހުރި ވަރަށް މުހިންމު މަސައްކަތްތަކެއް ހުރުމާއެކު، މަޖިލީހުގެ ރައީސް އަބްދުﷲ މަސީހާ ވާހަކަ ދައްކަވައިގެން ޖަލްސާތައް ފެށުމަށް މަސައްކަތް ކުރަމުން އަންނަ ކަމަށެވެ. 

"މަޖިލީހުގެ ޖަލްސާތައް ބާއްވާނީ އެ އޮންނަ އިޖުރާއަތްތަކާ އެއްގޮތަށް، ޖަލްސާއެއް ބާއްވަން ތާވަލުކޮށްފި ނަމަ އެކަން މެމްބަރުންނަށް އަންނާނެ،" މޫސަ ވިދާޅުވި އެވެ. 

މަޖިލީހުގެ ޖަލްސާތައް އަވަހަށް ފެށުމަށް ގުޅިފައިވާ ޕާޓީތަކުން ވެސް އެދިފައިވާ ކަމަށް މޫސަ ވިދާޅުވި އެވެ. 

ޖުމްހޫރީ ޕާޓީގެ ޑެޕިއުޓީ ލީޑަރ އަދި ކިނބިދޫ ދާއިރާގެ މެމްބަރު އަބްދުﷲ ރިޔާޒު ވިދާޅުވީ ހޯމަ ދުވަހު މަޖިލީހުގެ ޖަލްސާއެއް ބާއްވާނެ ކަމުގެ ޔަގީން ކަން މަޖިލީހުގެ ނައިބު ރައީސް މޫސާ މަނިކު ދެއްވާފައިވާކަމަށެވެ. 

ގުޅިފައިވާ ސިޔާސީ ޕާޓީތަކުގެ މަޖިލިސް މެމްބަރުން ވަނީ މޫސާ މަނިކާއި ބައްދަލުކުރައްވައި ޖަލްސާތައް އަވަހަށް ފެށުމަށް އެދިލައްވާފައި ކަމަށާއި ހޯމަ ދުވަހުގެ ޖަލްސާގައި އެންމެ ފުރަތަމަ ކަމަކަށްވެސް އޮންނާނީ ބުދަ ދުވަހު ހުށައެޅި ރައީސް މުހައްމަދު ނަޝީދު މިނިވަން ކުރުމަށް ހުށައެޅި ގަރާރު ކަމަށް ރިޔާޒު ވިދާޅުވިއެވެ.

ތޭރަ އަހަރުގެ ޖަލު ހުކުމެއް އިއްވާފައިވާ ކުރީގެ ރައީސް މުހައްމަދު ނަޝީދު މިނިވަން ކުރުމަށް ބުދަ ދުވަހު ރައްޔިތުންގެ މަޖިލީހަށް ގަރާރު ހުށައަޅާފައިވަނީ 49 މެމްބަރުންގެ ސޮޔާ އެކީގައެވެ. 

އެ ގަރާރުގައި ބުނެފައިވަނީ ނަޝީދަށް ހުކުމް ކޮށްފައިވަނީ ރާއްޖެ ބައިވެރިވެފައިވާ މުއާހަދާތަކާ ހިލާފަށް ކޮށްފައިވާ ޝަރީއަތަކުން ކަމަށްވާތީ ރައީސް ނަޝީދު ވަގުތުން މިނިވަން ކުރަން ޖެހޭ ކަމަށެވެ.