އިންތިޚާބު ބޭއްވި ފަހުން ހއ ގޮއްވާފުށި 10 އަހަރަށް ބަޔަކަށް ދީފި
ވަރުވާ އަށް ދޫކޮށްފައި ވަނީ މިމަހުގެ 15 ވަނަ ދުވަހު
ހއ ގޮއްވާފުށި
ރިޔާސީ އިންތިޚާބު ނިމި މިހާރު މި އޮތް ސަރުކާރު ބަދަލު ކުރުމުގެ މަރުހަލާ ފެށިފައިވަނިކޮށް ހއ ގޮއްވާފުށި ކިޔާ ފަޅުރަށް ބަޔަކަށް 10 އަހަރަށް ދީފިއެވެ.
ހއ އަތޮޅު ކައުންސިލުން އެއަތޮޅުގެ ރަށްރަށުގެ ކައުންސިލް އިދާރާތަކަށް ފޮނުވާފައިވާ ޓެކްސްޓް މެސެޖެއްގައި ބުނެފައިވަނީ ހއ އަތޮޅުގައި ހިމެނޭ ފަޅުރަށްތަކުގެ ތެރެއިން ހއ ގޮއްވާފުށި އެގްރީމެންޓްކޮށް 10 އަހަރު ދުވަހަށް ވަރުވާ އަށް ލިޔެ ދީފައިވާ ކަމަށް މިނިސްޓްރީ އޮފް ފިޝަރީޒް އެންޑް އެގްރިކަލްޗަރ އިން ވަނީ އަންގާފައި ކަމަށެވެ.
މިރަށް ދޫކޮށްފައި ވަނީ ޓެގް-ކޮމް ކޮންސްޓްރަކްޝަން މޯލްޑިވްސް ޕްރައިވެޓް ލިމިޓެޑް އަށެވެ.
ވަރުވާ އަށް ލިޔެދިން ތާރީޚެއް ކަމުގައި ބުނެފައި ވަނީ މިމަހުގެ 15 ވަނަ ދުވަހެވެ.
މިރަށް 10 އަހަރު ދުވަހުގެ ދިގު މުއްދަތަކަށް ވަރުވާ އަށް ދޫކޮށްފައި މި ވަނީ ވެރިކަން ބަދަލު ވުމުގެ މި މަރުހަލާގެ މުއްދަތުގެ ތެރޭގައި ތަފާތު ބޮޑެތި މަޝްރޫޢުތައް ނު ހިންގުމަށް އިންތިޚާބީ ރައީސް އިބްރާހީމް މުހައްމަދު ސޯލިހް އެދިވަޑައިގަންނަވާފައި ވަނިކޮށެވެ.
