ބޭސްފަރުވާއަށް މައުމޫން މެލޭޝިޔާ އަށް ވަޑައިގެންފި

ކުރީގެ ރައީސް މައުމޫން އަބްދުލްގައްޔޫމް ބޭސްފަރުވާއަށް މެލޭޝިއާ އަށް ވަޑައިގެންފިއެވެ.

ރައީސް މައުމޫނާއި އެމަނިކުފާނުގެ އަނބިކަނބަލުން ނަސްރީނާ އިބްރާހީމް މެލޭޝިއާ އަށް ފުރާވަޑައިގަތީ އަންގާރަ ދުވަހުގެ ރެއެވެ. މައުމޫން ކުރެއްވި ޓުވީޓެއްގައި ވިދާޅުވި ގޮތުގައި، އެމަނިކުފާނާއި އަނބިކަނބަލުން ނަސްރީނާ މެލޭޝިއާ އަށް ވަޑައިގެންނެވީ މެޑިކަލް ޗެކަޕެއް ހެއްދެވުމަށެވެ. ޖަލުގައި އަށް މަހެއްހާ ދުވަހު އޮންނެވުމުގެ ސަބަބުން، އެމަނިކުފާނަށް މެޑިކަލް ޗެކަޕެއް މުހިންމު ކަމަށް މައުމޫން ވިދާޅުވި އެވެ.

ރައީސް މައުމޫނު ފުރުވަން އިންތިހާބީ ރައީސްގެ ނާއިބު ފައިސަލް ނަސީމާއި ރަހްމަތްތެރިންނާއި ސަޕޯޓަރުން ވެލާނާ އިންޓަނޭޝަނަލް އެއާޕޯޓަށް ދިއުމާ ގުޅިގެން އެ ހުރިހާ އެންމެންނަށް އެމަނިކުފާނު ވަނީ ޝުކުރު އަދާކުރައްވާފައެވެ.

މައުމޫން ޖަލުގައި ހުންނެވި ދުވަސްތަކުގައި ސިއްހީ ހާލުކޮޅު ގޯސްވެގެން، ޖަލަށް ޑޮކްޓަރުން ވެސް ގެންދަން ޖެހުނެވެ. އަދި އެމަނިކުފާނު މާލެ ގެނެސްގެން ވެސް ފަރުވާ ދޭން ޖެހުނެވެ.

މިދިޔަ ފެބްރުއަރީ މަހު ކުއްލި ނުރައްކަލުގެ ހާލަތުގެ ދަށުން އެމަނިކުފާނު ހައްޔަރުކޮށް، ފޯނު ދޭން ފުލުހުން އެންގުމުން އެކަން ނުކުރެއްވި މައްސަލާގައި ކްރިމިނަލް ކޯޓުން އިއްވި އެއް އަހަރާއި ހަތް މަހުގެ ޖަލު ހުކުމް ހައި ކޯޓުން މިހާރު ވަނީ ބާތިލްކޮށްފައެވެ.