މަރާލާފައިވާ ނޫސްވެރިޔާ ޖަމާލް ޚަޝޯގީގެ ހަށިގަނޑުގެ ބައިތަކެއް ފެނިފައިވާ ކަމަށް ބައެއް ރިޕޯޓްތައް ބުނެފިއެވެ.

ސްކައި ނިއުސްގައި ބުނެފައިވާ ގޮތުގައި ޚަޝޯގީގެ ހަށިގަނޑުގެ ބައިތައް ބުރިކޮށް، މޫނު ވަނީ ސިފަ ގެއްލުވާލާފައެވެ.

އެއް މަސްދަރަކުން ބުނެފައިވާ ގޮތުގައި ޚަޝޯގީގެ ހަށިގަނޑުފެނިފައި ވަނީ ކޮންސިއުލޭޓް އޮފީހާ 500 ވަރަކަށް މީޓަރު ދުރުގައި ހުންނަ ސައުދީ ކޮންސުލް ޖެނެރަލްގެ ގޭގެ ބަގީޗާ ތެރެއިންނެވެ.

މި ވާހަކަތަކަކީ ސައުދީގެ އޮފިޝަލުން ޚަޝޯގީގެ ހަށިގަނޑު ކާޕެޓަކަށްލައި އޮޅާލުމަށް ފަހު ހެކި ނައްތާލުމަށް ތުރުކީގެ މީހަކާ ހަވާލުކުރި ކަމަށް ބުނާ ވާހަކަތަކަށް ބާރު ލިބޭ ވާހަކަތަކެކެވެ.

މި ވާހަކަތައް ފެންމަތިވެފައި މި ވަނީ ޚަޝޯގީގެ ފިރެހެން ދަރިފުޅު ސަލާހް ޚަޝޯގީއާ ސައުދީ ރަސްގެފާނު ސަލްމާން ބިން އަބްދުލް އަޒީޒް އަދި ރަސްގެފާނުގެ ދަރިކަލުން ވަލީއަހުދު މުހައްމަދު ބިން ސަލްމާން ރިޔާޛްގައި ހުންނަ ގެކޮޅުގައި ބައްދަލުކުރެއްވި ފޮޓޯތަކެއް ދައުރުވެފައި ވަނިކޮށެވެ.

އޮކްޓޯބަރު މަހުގެ 2 ވަނަ ދުވަހު ސައުދީގެ ކޮންސިއުލޭޓަށް ވަން ފަހުން ޚަބަރެއް ނުވެގެން އުޅުނު ޖަމާލް ޚަޝޯގީ މަރާލާފައިވާ ކަމަށް 18 ދުވަހަށް ފަހު ސައުދީން އެއްބަސްވެފައި ވަނީ އޮކްޓޯބަރު މަހުގެ 20 ވަނަ ދުވަހުއެވެ.

ސައުދީ އިން ބުނެފައިވަނީ ޚަޝޯގީ މަރުވެފައި ވަނީ ތުރުކީގައި ހުންނަ ސައުދީ ކޮންސިއުލޭޓް ތެރޭގައި ހުރި މީހަކާއި ޚަޝޯގީއާ ދޭތެރޭ ހިނގައިދިޔަ ޒުވާބެއްގެ ތެރޭގައި ކަމަށެވެ.