މި މަހުގެ 2 ވަނަ ދުވަހު ތުރުކީގައި ހުންނަ ސައުދީ ކޮންސިއުލޭޓް ތެރޭގައި ނޫސްވެރިޔާ ޖަމާލް ޚަޝޯގީ މަރާލާފައި ވަނީ ސިޔާސީ ސަބަބަކަށްޓަކައި ކަމަށާއި އެއީ ދުރާލާ ސައުދީން ރާވައިގެން ހިންގާފައިވާ ޖަރީމާއެއް ކަމަށް ތުރުކީގެ ރައީސް ރަޖެބް ތައްޔިބު އުރުދުޣާން ވިދާޅުވެއްޖެއެވެ.

ތުރުކީގެ ގާނޫނު ހަދާ މަޖިލީހުގައި ވާހަކަ ދައްކަވަމުން އުރުޣާން ވިދާޅުވީ ޚަޝޯގީ މަރާލާފައި ވަނީ ދުރާލާ ރާވައިގެން ކަމަށެވެ. އެކަމުގައި ބައިވެރިވާ މީހުން އިންސާފުގެ ކުރިމައްޗަށް ގެނައުމަށް އުރުދުޣާން ވަނީ ސައުދީއަށް ގޮވާލައްވާފައެވެ. އަދި އެކަމުގެ ބައިވެރިވި އެންމެންނަށް ހައްގު އަދަބު ލިބެންޖެހޭނެ ކަމަށް އެމަނިކުފާނު ވިދާޅުވިއެވެ.

ޚަޝޯގީގެ މަރާ ބެހޭ ގޮތުން ސައުދީން މީގެ ކުރިން ބުނެފައި ވަނީ ޚަޝޯގީ މަރުވެފައި ވަނީ ސައުދީ ކޮންސިއުލޭޓް ތެރޭގައި ހުރި މީހަކާއި އެކީގައި ހިނގައިދިޔަ ޒުވާބެއްގެ ތެރޭގައި ހިނގި ހަމަނުޖެހުމެއްގެ ތެރޭގައި ކަމަށެވެ. އެހެން ނަމަވެސް އުރުދުޣާން ވިދާޅުވީ އެއީ ދޮގެއް ކަމަށާއި ޚަޝޯގީ ގެއްލުނު ދުވަހު ކުއްލި ގޮތަކަށް 15 މެމްބަރުންގެ ޓީމެއް ތުރުކީއަށް ގޮސްފައިވާ ކަމަށް ތަހުގީގު ޓީމުން ހާމަކޮށްފައިވާ ކަމަށެވެ. އެހެންކަމުން ޚަޝޯގީ މަރާލާފައި ވަނީ ދުރާލާ ރާވައިގެން ކަމަށް ޔަގީންކުރެވޭ ކަމަށް އުރުދުޣާން ވިދާޅުވިއެވެ.

ޚަޝޯގީގެ މަރާ ގުޅިގެން އުރުދުޣާން ވިދާޅުވީ ޚަޝޯގީ މަރާލުމުގެ އެއް ދުވަސް ކުރިން އެގައުމުގެ ޖަންގަލި ބަލާފައިވާ ކަމުގެ ހެކި ފެނިފައިވާ ކަމަށެވެ. އެ ތިން މީހުން ތުރުކީއަށް ގޮސްފައި ވަނީ އޮކްޓޯބަރ 1 ވަނަ ދުވަހު ކަމަށް ތަހުގީގުން ހާމަވާ ކަމަށް އުރުދުޣާން ވިދާޅުވިއެވެ.

ޚަޝޯގީ ގެއްލުނުކަން އެނގުނު ހިސާބުން ތުރުކީގެ އޮފިޝަލުން ގެންދިޔައީ ޚަޝޯގީ ކޮންސިއުލޭޓުން ނުކުމެފައިވާ ވީޑިއޯ ދެއްކުމަށް ސައުދީއަށް ބާރުއަޅަމުންނެވެ. ނަމަވެސް ތުރުކީން ގެންދިޔައީ އެ ގައުމުން ބުނަމުންދިޔަ ކަންކަމަށް ބާރުދޭ ހެކިތައް ހޯދަމުންނެވެ.

އުރުދުޣާން ވިދާޅުވީ ޚަޝޯގީ ސައުދީ ކޮންސިއުލޭޓަށް ވަތް ހިސާބުން އޭނާގެ ޚަބަރެއް ނުވެގެން ކޮންސިއުލޭޓް ބޭރުގައި ހުރެ އޭނާގެ ލޯބިވެރިޔާ އެކަން ފުލުހުންގެ ސަމާލުކަމަށް ގެނައި ކަމަށެވެ. އަދި ވަގުތުން ތަހުގީގު ކުރިއަށް ގެންދިޔަ ކަމަށެވެ.  

ސައުދީގެ އިންޓެލިޖެންސް އޮފިސަރުންތަކެއް އިސްތަންބޫލް އެއާޕޯޓަށް އެތެރެވާ މަންޒަރާއި އެ އަށް ފަހު އަނބުރާ ދާ މަންޒަރު ފެންނަ ފުޓޭޖްތަކެއް ވެސް ތުރުކީ އިން ވަނީ ހޯދާފައެވެ.

މީގެ އިތުރުން ޚަޝޯގީ ހޯދުމުގެ މަސައްކަތުގެ ތެރެއިން ތުރުކީގެ ތަހުގީގު ޓީމަށް އިތުރު ފުރުސަތެއް ލިބިގެންދިޔައީ ކޮންސިއުލޭޓް ބަލަން ފުރުސަތު ލިބުމުންނެވެ. ތަހުގީގު ޓީމުގައި އިސްކޮށް ހުރި ތުރުކީގެ ޑެޕިއުޓީ ޕްރޮސިކިއުޓަރ ޖެނެރަލްއެވެ.

ތުރުކީގެ އޮފިޝަލުން ކޮންސިއުލޭޓާއި، ކޮންސުލް ޖެނެރަލްގެ ގެކޮޅާއި، ޑިޕްލޮމޭޓުންގެ ކާރުކޮޅުތައް ވެސް ތަހުގީގު ޓީމުން ބަލާ ފާސްކުރިއެވެ.

ޚަޝޯގީ މަރާލާފައިވާ އަޑުތައް ރެކޯޑްކުރެވިފައިވާ ކަމަށް ބުނާ އޯޑިއޯތަކެއް ލިބިފައިވާ ކަމަށް ބުނި ނަމަވެސް އެ އޯޑިއޯތައް ތުރުކީ އިން ހާމައެއް ނުކުރެއެވެ.

ޚަޝޯގީ މަރުވެފައިވާ ކަމަށް ސައުދީން އެއްބަސްވީ 18 ދުވަސް ފަހުންނެވެ. އޭގެ ކުރިން ދިޔައީ އެކަން ދޮގުކުރަމުންނެވެ. އަދި ތަހުގީގު ފަށާފައިވާ ކަމަށް އެ ގައުމުން ބުނެއެވެ. އަދި މިހާތަނަށް ސައުދީގެ 18 މީހަކު ވަނީ ހައްޔަރު ވެސް ކޮށްފައެވެ.