އޮޓޯ ވާމްބިއާގެ މަރަކީ "ގޮތް ނޭނގޭ" މަރެއް: އުތުރު ކޮރެއާ

އުތުރު ކޮރެއާއިން ހައްޔަރުކޮށްގެން ގެންގުޅުނު އުމުރުން 22 އަހަރުގެ ޒުވާނެއް ކަމަށްވާ އޮޓޯ ވާމްބިއާ ދޫކޮށްލިތާ ހަފްތާއެއް ވެސް ނުވަނީސް އޭނާ މަރުވި މަރުވުމަކީ "ގޮތްނޭގޭ" މަރެއް ކަމަށް އުތުރު ކޮރެއާގެ ދައުލަތުގެ މީޑިއާ އިން ބުނެފިއެވެ.

މީގެ އިތުރުން، 17 މަސް ވަންދެން އުތުރު ކޮރެއާގައި ހައްޔަރުކޮށްފައި ހުރި އިރު ވާމްބިއާ އަށް އަނިޔާ ކުރި ކަމަށް ކުރެވޭ ތުހުމަތު ވެސް އުތުރު ކޮރެއާގެ ދައުލަތުގެ މީޑިއާ އިން ވަނީ ދޮގުކޮށްފައެވެ.

ވާމްބިއާ މިނިވަންވެ އެނބުރި ގައުމަށް ދިއުމުން އޭނާ ބެލި އެމެރިކާގެ ޑޮކްޓަރުން ބުނެފައި ވަނީ ވާމްބިއާގެ ސިކުނޑިއަށް ވަރަށް ބޮޑަށް ގެއްލުންވެފައިވާ ކަމަށެވެ.

އުތުރު ކޮރެއާގެ ބަންދުން ވާމްބިއާ މިނިވަންވެ އޭނާ ކޯމާއަށް ދިޔަ ދިޔުމާ ބެހޭ ގޮތުން އުތުރު ކޮރެއާގެ އޮފިޝަލުން ވިދާޅުވެފައި ވަނީ ކޯމާއަށް ވާމްބިއާ ދިޔައީ ނިދާ ބޭސް ބޭނުންކުރުމުގެ ސަބަބުންނާއި އަދި ނުރައްކާތެރި ބައްޔެއް ކަމަށްވާ ބޮޗުލިޒަމް ޖެހުމުގެ ސަބަބުން ކަމަށެވެ.

ވާމްބިއާ ހައްޔަރުކުރީ ޓޫރިސްޓް ވިސާގައި އުތުރުކޮރެއާއަށް ދިޔަ ދިއުމެއްގައި، އުތުރު ކޮރެއާގެ ލީޑަރު، ކިމް ޖޮންގ އުންގެ ޕްރޮޕެގެންޑާ ފެތުރުމަށް ދަމާފައިހުރި ބެނާއެއް ވަގަށް ނެގި މައްސަލާގައެވެ. މި ދައުވާއަށް އޭނާ އިއުތިރާފް ވުމާއެކު އޭނާގެ މައްޗަށް ވަނީ "ހާޑް ލޭބާ" ގެ 15 އަހަރު ދުވަހުގެ ހުކުމެއް އިއްވާފައެވެ.

ވާމްބިއާ މަރުވުމާ ގުޅޭ ގޮތުން އޭނާގެ އާއިލާއިން ނެރެފައިވާ ބަޔާނެއްގައި ބުނެފައި ވަނީ، ވާމްބިއާއަށް އުތުރު ކޮރެއާއިން ދީފައި ވަނީ ލާއިންސާނީ އަނިޔާތަކެއް ކަމަށާއި، އެހެންކަމުން ޑޮކްޓަރުން ގެ މިންނެތް މަސައްކަތުން ވެސް ދަރިފުޅު ރަނގަޅު ނުވާނެކަން ކުރިން ވެސް އެނގޭ ކަމަށެވެ.